Lalai 24 - ŊMALƐ KRƆŊKRƆŊ LƐ

Maŋtsɛ Wulu lɛ

David Lala ko.

¹ Shikpɔŋ lɛ kɛ enɔ nii fɛɛ lɛ, Yehowa nɔ ni; ni je lɛ kɛ mɛi fɛɛ ni yɔɔ mli lɛ, enɔ ni.

² Ejaakɛ lɛ eto shishi yɛ ŋshɔi ashishi tɔ̃ɔ̃ ni ehã ema shi shiŋŋ yɛ fai anɔ.

³ Namɔ aaakwɔ Yehowa gɔŋ lɛ? Ni namɔ aaadamɔ ehe krɔŋkrɔŋ lɛ?

⁴ Mɛi ni amɛdɛŋ bɛ esha ko ni amɛtsuii amli tse. Mɛi ni kɛ amɛgbɔmɔtsei hãaa yakayaka nifeemɔ, ni amɛkãaa amale kitã.

⁵ Gbɔmɛi ni tamɔ nɛkɛ lɛ, amɛaana jɔɔmɔ kɛaajɛ Yehowa dɛŋ. Amɛaana bembuu kɛaajɛ amɛyiwalaheremɔ Nyɔŋmɔ lɛ dɛŋ.

⁶ Mɛnɛɛmɛi ji gbɔmɛi ni taoɔ esɛɛgbɛ lɛ, mɛi ni baa Yakob Nyɔŋmɔ lɛ hiɛ.

⁷ Oo nyɛ agboi, nyɛholea nyɛyitsei anɔ! Oo nyɛ blema shinai, nyɛholea nyɛhe nɔ koni anunyam maŋtsɛ lɛ aba mli.

⁸ Namɔ ji anunyam maŋtsɛ nɛɛ? Lɛ ji Yehowa, hewalɔ kɛ kãkãlɔ lɛ. Lɛ ji Yehowa, ta mli kunimyelɔ lɛ.

⁹ Nyɛgbelea agboi lɛ nyɛfɔ̃a, nyɛgbelea blema shinai lɛ, koni anunyam maŋtsɛ lɛ aba mli.

¹⁰ Namɔ ji anunyam maŋtsɛ nɛɛ? Yehowa Taiatsɛ lɛ ni. Lɛ ji anunyam maŋtsɛ lɛ.