Lalai 21 - ŊMALƐ KRƆŊKRƆŊ LƐ

Yijiemɔ yɛ kunimyeli hewɔ

David Lala ni ekɛha lalatsɛ nukpa lɛ.

¹ Yehowa, ohewalɛ lɛ mli maŋtsɛ lɛ naa miishɛɛ yɛ; ni oyelikɛbuamɔ mli maŋtsɛ lɛ nyaa yɛ.

² Nɔ ni etsui shweɔ lɛ, ohãa lɛ; ni nɔ ni ebiɔ lɛ, okamãaa lɛ.

³ Ejaakɛ okɛ nii kpakpai amli jɔɔmɔi kumaa lɛ, ni okɛ shika krɔŋŋ akekre fiɔ eyitso.

⁴ Eba wala yɛ odɛ̃ŋ, ni ohã lɛ; wala kakadaŋŋ kɛaatee naanɔ.

⁵ Oyelikɛbuamɔ hewɔ lɛ, enunyam lɛ da; oduro lɛ woo kɛ agbojee.

⁶ Ojɔɔ lɛ kɛmiiya naanɔ. Na ni enaa bo hãa emii shɛɔ ehe.

⁷ Maŋtsɛ lɛ hiɛ kã Yehowa nɔ; ni ŋwɛi flooflonyo lɛ suɔmɔ ni tsakeee lɛ hewɔ lɛ, edidãŋ.

⁸ Maŋtsɛ lɛ nine aaashɛ ehenyɛlɔi fɛɛ anɔ; mɛi ni nyɛɔ bo lɛ, onine aaashɛ amɛnɔ.

⁹ Kɛ ojie ohe kpo lɛ, oooŋala amɛ tamɔ flɔɔnɔɔ mli la. Yehowa aaakpãtã amɛhiɛ yɛ emlifu lɛ naa, ni la lɛ aaashã amɛ wɛɛ.

¹⁰ Oookpãtã amɛshwiei lɛ ahiɛ kɛje shikpɔŋ lɛ nɔ; oookpãtã amɛbii lɛ hu ahiɛ kɛje gbɔmɛi adesai ateŋ.

¹¹ Kɛ amɛjwɛŋ ohe efɔŋ, ni amɛto ohe ŋaa gbonyo lɛ, amɛyeŋ kunim.

¹² Ejaakɛ ooota ogãi lɛ oma amɛhiɛ ni amɛaatsɔ̃ amɛsɛɛ amɛjo foi.

¹³ Oo, Yehowa, wɔmiiwo onɔ gojoo yɛ ohewalɛ kpele lɛ hewɔ! Wɔbaala kɛjie ohewalɛ lɛ yi.