Lalai 16 - ŊMALƐ KRƆŊKRƆŊ LƐ

Hiɛnɔkãmɔ he sɔlemɔ

David Lala ko.

¹ Oo Yehowa, buu mihe, ejaakɛ bo abo mibaa.

² Mikɛɔ Yehowa akɛ, “Bo ji miNuŋtsɔ; osɛɛ lɛ mibɛ nɔ kpakpa ko.”

³ Hetselɔi ni yɔɔ shikpɔŋ lɛ nɔ lɛ, amɛ lɛ, anunyam gbɔmɛi ji amɛ, ni miyɛ amɛhe tsuijurɔ.

⁴ Shi mɛi ni yanyiɛɔ nyɔŋmɔ kroko sɛɛ lɛ, amɛhaomɔi faa. Mifɔseŋ lá ni amɛkɛba afɔleshãa lɛ mishwieŋ shi akɛ afɔle; ni mikɛ minaabu etsiŋ amɛgbɛii atã tete.

⁵ Yehowa, bo ji minɔ fɛɛ nɔ, bo ohãa mi mihiamɔ nii fɛɛ. Bo odɛ̃ŋ miwala yɔɔ.

⁶ Mihusu kpãi eyaje he ni yɔɔ fɛo ehã mi; lɛɛlɛŋ, mina gboshinii ni hi naakpa.

⁷ Majie Yehowa mɔ ni woɔ mi ŋaa lɛ yi; Mitsui tete kɛ mi wieɔ nyɔɔŋ.

⁸ Mikɛ Yehowa ema mihiɛ daa; akɛni eyɔɔ mininejurɔ nɔ nɛɛ, mididaŋ.

⁹ No hewɔ lɛ, mitsui enyɔ mimli, ni misusuma tete miinya; migbɔmɔtso hu yɛ shweshweeshwe.

¹⁰ Ejaakɛ oŋmɛŋ mihe ohaŋ gbohiiaje, ni mɔ ni heɔ onɔ eyeɔ lɛ enaŋ gbohiiaje.

¹¹ Bo otsɔ̃ɔ mi wala gbɛ. Ohiɛ lɛ, miishɛɛ sɔŋŋ; ni mimii eshɛ kɛmiiya naanɔ.