Lalai 149 - ŊMALƐ KRƆŊKRƆŊ LƐ

Yijiemɔ lala

¹ Nyɛjiea Yehowa yi! Nyɛlaa lala hee nyɛhãa Yehowa, nyɛjiea eyi yɛ anɔkwafoi agwabɔɔ lɛ mli.

² Hã Israel anya ebɔlɔ lɛ he, ni Zion bihii lɛ amli afili amɛ yɛ emaŋtsɛ lɛ hewɔ.

³ Hã amɛkɛ joo ajie egbɛi lɛ yi, ni amɛkɛ miji kɛ saŋku ala amɛkɛjie eyi.

⁴ Ejaakɛ Yehowa naa emaŋbii lɛ ahe tsuijurɔ; ehãa humii yeɔ ta mli kunim.

⁵ Hã anɔkwafoi lɛ anya yɛ anunyam mli; hã amɛla nyamɔ lala yɛ amɛsai anɔ.

⁶ Hã Nyɔŋmɔ kafomɔ akã amɛlilɛi nɔ, ni amɛhiɛ klante kɛ enaa nta yɛ amɛdɛ̃,

⁷ koni amɛkɛtɔ owele yɛ majimaji lɛ anɔ, koni amɛkɛgbala maŋbii lɛ atoi,

⁸ koni amɛkɛ kɔsɔŋkɔsɔi afimɔ amɛmaŋtsɛmɛi lɛ, ni amɛwo amɛbladei lɛ dade gboklɛi,

⁹ koni amɛkɛ toigbalamɔ ni aŋma ato agbala amɛtoi. Enɛ ji anunyam hã emɛi krɔŋkrɔŋi lɛ fɛɛ. Nyɛjiea Yehowa yi!