Lalai 147 - ŊMALƐ KRƆŊKRƆŊ LƐ

Nyɔŋmɔ Ofe lɛ yijiemɔ

¹ Nyɛjiea Yehowa yi! Ehi akɛ ala ajie wɔNyɔŋmɔ lɛ yi; ejaakɛ durolɔ ji lɛ, ni yijiemɔ lala sa lɛ.

² Yehowa ji mɔ ni maa Yerusalɛm maŋ lɛ; ebuaa Israelbii ni agbɛ amɛ ashwã lɛ anaa.

³ Lɛ etsaa mɛi ni tsuii ekumɔ lɛ, ni efimɔɔ amɛpilamɔi lɛ anɔ.

⁴ Lɛ etsɔ̃ɔ ŋulamii lɛ ayibɔ, ni ewoɔ eko fɛɛ eko gbɛi lɛ.

⁵ WɔNuŋtsɔ lɛ je agbo; ni ehewalɛ fa naakpa, ni enilee lɛ anaaa naa.

⁶ Yehowa woɔ heshibalɔi anɔ, shi yiwalɔi lɛ etsirɛɔ amɛ etswiaa shi.

⁷ Nyɛlaa shidaa lala nyɛhãa Yehowa, nyɛkɛ saŋku alaa kɛjiea wɔNyɔŋmɔ lɛ yi.

⁸ Lɛ ekɛ atatui haa ŋwɛi, ni ehãa nu nɛɔ shikpɔŋ lɛ nɔ, ni ehãa jwɛi kwɛ̃ɔ yɛ gɔ̃ŋkpɔi anɔ.

⁹ Lɛ ehãa kooloi niyenii, ni elɛɔ kwãakwãalabitei abii ni bolɔɔ lɛ hu.

¹⁰ Emiishɛɛnamɔ bɛ okpɔŋɔ hewalɛ mli, ni ebɛ tabilɔi ahewalɛ he miishɛɛ hu.

¹¹ Shi moŋ Yehowa naa mɛi ni sheɔ lɛ gbeyei lɛ ahe miishɛɛ, kɛ mɛi hu ni kɛ amɛhiɛ fɔ̃ɔ esuɔmɔ ni sɛɛ efooo lɛ nɔ lɛ.

¹² Oo Yerusalɛm, kafomɔ Yehowa! Oo Zion, jiemɔ oNyɔŋmɔ lɛ yi!

¹³ Ejaakɛ lɛ ewajeɔ ogboi lɛ asɛɛ adabaŋi lɛ kpɛŋŋ; ejɔɔ obii ni yɔɔ omli lɛ.

¹⁴ Ehãa ohusui anɔ jɔɔ; ehãa otɔɔ kɛ ŋmãa kpakpa.

¹⁵ Efãa shikpɔŋ lɛ, ni nɔ ni ekɛɔ lɛ afeɔ lɛ oya.

¹⁶ Ehãa snoo nyɔɔ futaa tamɔ too he tsɔi yɛŋ; egbɛɔ bɔ́ ni efĩ eshwãa tamɔ lamlu.

¹⁷ Eshɛrɛɔ enutɛi lɛ eshwieɔ shi tamɔ fɔbitɛi. Namɔ aaanyɛ efɛ̃i lɛ naa edamɔ?

¹⁸ Efãa, ni ewiemɔ lɛ naa lɛ, nutɛi lɛ sereɔ. Ehãa ekɔɔyɔɔ lɛ tswaa, ni nui lɛ hoɔ.

¹⁹ Ejajeɔ ewiemɔ lɛ etsɔ̃ɔ Israel, ekɛ ekpɔi kɛ emlai lɛ hãa Israel.

²⁰ Efeko nakai nɔ ko ehãko maŋ ko maŋ ko dã; emlai lɛ hu, amɛleee. Nyɛjiea Yehowa yi!