Lalai 146 - ŊMALƐ KRƆŊKRƆŊ LƐ

Nyɔŋmɔ yiwalaherelɔ lɛ yijiemɔ

¹ Jiemɔ Yehowa yi! Oo misusuma, jiemɔ Yehowa yi!

² Gbii abɔ ni mihiɛ kã nɛɛ, majie Yehowa yi! Mala majie miNyɔŋmɔ lɛ yi miwala be fɛɛ.

³ Nyɛkaŋɔa nyɛhiɛ nyɛfɔa lumɛi loo gbɔmɔ adesa bi ko ni yelikɛbuamɔ bɛ edɛŋ lɛ nɔ.

⁴ Kɛji emumɔ je emli lɛ, ekuɔ esɛɛ kɛyaa esu lɛ mli ekoŋŋ; nakai gbi lɛ nɔŋŋ eyiŋtoo fɛɛ laajeɔ.

⁵ Ajɔɔ gbɔmɔ ni Yakob Nyɔŋmɔ lɛ ji eyelikɛbualɔ, mɔ ni ehiɛ kãa Yehowa, eNyɔŋmɔ lɛ nɔ lɛ.

⁶ Lɛ ebɔ ŋwɛi kɛ shikpɔŋ kɛ ŋshɔ kɛ nɔ fɛɛ nɔ ni yɔɔ mli lɛ; lɛ lɛ eyeɔ anɔkwa kɛyaa naanɔ.

⁷ Mɛi ni ayeɔ amɛ amim lɛ, eyeɔ amɛsane ehãa amɛ; mɛi ni hɔmɔ yeɔ amɛ lɛ, ehãa amɛ niyenii. Yehowa fɛneɔ gboklɛfoi agboklɛi.

⁸ Yehowa gbeleɔ shwilafoi ahiŋmɛii; Yehowa holeɔ mɛi ni edɔrɔ kɔmɔɔ lɛ anɔ; Yehowa sumɔɔ jalɔi.

⁹ Yehowa baa gbɔi ayi; efĩɔ awusa kɛ okulafo sɛɛ; shi mɛi fɔ̃ji agbɛ lɛ, ebutuɔ.

¹⁰ Yehowa baaye maŋtsɛ kɛaatee naanɔ, Zion, oNyɔŋmɔ lɛ aaaye maŋtsɛ kɛaatee yinɔi fɛɛ nɔ. Nyɛjiea Yehowa yi!