Lalai 145 - ŊMALƐ KRƆŊKRƆŊ LƐ

Yijiemɔ lala

Yijiemɔ lala. David Lala.

¹ Makafo bo, miNyɔŋmɔ kɛ miMaŋtsɛ, ni majie ogbɛi lɛ yi daa kɛaatee naanɔi anaanɔ.

² Daa gbi lɛ majie oyi, ni majie ogbɛi lɛ yi daa kɛaatee naanɔi anaanɔ.

³ Yehowa je agbo; ni esa yijiemɔ babaoo, ni egbojee lɛ anaaa naa.

⁴ Yinɔ kome aaakafo onitsumɔi lɛ atsɔ̃ɔ yinɔ kroko; ni amɛaajaje ohewalɛ nifeemɔi lɛ amɛtsɔ̃ɔ.

⁵ Majwɛŋ onunyam falɛ kɛ ogbojee kɛ onaakpɛɛ nitsumɔi lɛ ahe.

⁶ Mɛi aaagba ohewalɛ nitsumɔi ni yɔɔ gbeyei lɛ, ni majaje ogbojee lɛ matsɔ̃ɔ.

⁷ Amɛaajaje omlihilɛ kpeteŋkple lɛ; amɛaala ojalɛ lɛ he lala waa.

⁸ Durolɔ kɛ mɔbɔnalɔ ji Yehowa; emli fuuu mra, ni esuɔmɔ ni tsakeee lɛ fa babaoo.

⁹ Yehowa hi hã mɛi fɛɛ, ni emusuŋ tsɔ̃ɔ lɛ yɛ ebɔɔnii lɛ fɛɛ he.

¹⁰ Yehowa, obɔɔnii lɛ fɛɛ aaada bo shi; ni omɛi krɔŋkrɔŋi lɛ fɛɛ aaajie oyi.

¹¹ Amɛaawie omaŋtsɛyeli lɛ anunyam lɛ he, ni amɛaagba ohewalɛ lɛ,

¹² koni amɛhã gbɔmɛi adesai abii ale ohewalɛ nitsumɔi lɛ, kɛ omaŋtsɛyeli lɛ nyam kɛ egbojee.

¹³ Omaŋtsɛyeli lɛ, naanɔ maŋtsɛyeli ni; ni olumɔyeli lɛ hiɔ shi kɛyaa yinɔi fɛɛ nɔ.

¹⁴ Yehowa sɔoɔ mɛi fɛɛ ni miigbee shi lɛ, ni eholeɔ mɛi fɛɛ ni edɔrɔ kɔmɔɔ lɛ anɔ.

¹⁵ Bɔɔnii fɛɛ kwɛɔ bo gbɛ, ni bo ohãa amɛ niyenii yɛ be ni sa mli.

¹⁶ Ogbɛɔ odɛ̃ŋ, ni ohãa nɔ fɛɛ nɔ ni hiɛ kã tɔɔ kɛ nii ni etaoɔ.

¹⁷ Yehowa ja yɛ egbɛi fiaa mli, ni emli hi yɛ enifeemɔi fiaa mli.

¹⁸ Yehowa bɛŋkɛ mɛi fɛɛ ni tsɛɔ lɛ lɛ; ebɛŋkɛɔ mɛi fɛɛ ni tsɛɔ lɛ yɛ anɔkwale mli lɛ.

¹⁹ Mɛi ni sheɔ lɛ gbeyei lɛ, efeɔ amɛnitaomɔnii ehãa amɛ; eboɔ amɛbolɔmɔ toi ni ehereɔ amɛyiwala.

²⁰ Yehowa baa mɛi fɛɛ ni sumɔɔ lɛ lɛ ayi; shi yiwalɔi lɛ, eeekpãtã amɛhiɛ.

²¹ Minaabu aaajie Yehowa yi ni bɔɔnii fɛɛ aaajie egbɛi krɔŋkrɔŋ lɛ yi daa kɛaatee naanɔi anaanɔ.