Lalai 143 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David Lala ko.

¹ Oo Yehowa, bo misɔlemɔ toi, feemɔ toi ohã mifaikpamɔ lɛ; heremɔ mi nɔ yɛ onɔkwayeli kɛ ojalɛ lɛ naa.

² Okɛ otsulɔ akakojo, ejaakɛ hiɛkãalɔ ko hiɛkãalɔ ko yeŋ bem yɛ ohiɛ.

³ Ejaakɛ henyɛlɔ lɛ etiu mi, ekpãtã miwala hiɛ kɛmɔ shi; ehã mita duŋ mli tamɔ mɛi ni egboi jeeŋmɔ lɛ.

⁴ No hewɔ lɛ, mimumɔ etɔ biti yɛ mimli; mitsui efee shikplikpii yɛ mimli.

⁵ Mikaiɔ blema gbii lɛ, mijwɛŋɔ nii ni ofee lɛ fiaa he; misusuɔ oninenaa nitsumɔi lɛ ahe.

⁶ Miholeɔ miniji anɔ mihãa bo yɛ sɔlemɔ mli; ohe kumai yeɔ misusuma tamɔ shikpɔŋ gbiŋ.

⁷ Oo Yehowa, heremɔ mi nɔ oya; mimumɔ miitɔ biti; kaaŋɔ ohiɛ otee mi, kɛjee nakai lɛ, matamɔ mɛi ni kpelekeɔ shi kɛyaa gbohiiaje lɛ.

⁸ Leebi lɛ hã manu osuɔmɔ ni tsakeee lɛ he, ejaakɛ bo onɔ mihiɛ kã. Hã male gbɛ ni sa akɛ manyiɛ nɔ, ejaakɛ bo miŋɔɔ misusuma mihãa.

⁹ Oo Yehowa, jiemɔ mi yɛ mihenyɛlɔi lɛ adɛŋ! Bo oŋɔɔ mijoɔ foi kɛbaa mibatee yɛ!

¹⁰ Tsɔ̃ɔmɔ mi koni mafee osuɔmɔnaanii, ejaakɛ bo ji miNyɔŋmɔ. Hã omumɔ kpakpa lɛ atsɔ̃ɔ mi gbɛ kɛnyiɛ gbɛ tɛ̃ɛ nɔ.

¹¹ Oo Yehowa, ogbɛi lɛ hewɔ lɛ, hã miyi ana wala! Ojalɛ lɛ hewɔ lɛ, jiemɔ mi kɛje haomɔ mli.

¹² Osuɔmɔ ni tsakeee hã mi lɛ hewɔ lɛ, folɔmɔ mihenyɛlɔi lɛ oshwie; ni okpãtã mɛi ni waa mi yi lɛ fɛɛ ahiɛ; ejaakɛ otsulɔ ji mi.