Lalai 141 - ŊMALƐ KRƆŊKRƆŊ LƐ

Gbɛkɛ Sɔlemɔ

David Lala ko.

¹ Oo Yehowa, bo mibolɔɔ mitsɛɔ nɛɛ; ba miŋɔɔ mra! Ba otoi shi ohã mi kɛji mitsɛ bo lɛ.

² Hã mifaikpamɔ afee tamɔ tsofakɛŋma yɛ ohiɛ; ni miniji anɔholemɔ afee tamɔ gbɛkɛ afɔle!

³ Oo Yehowa, wo mililɛi manyoflɛ; ni ahã mamɔ minaabu mli.

⁴ Kaadɔ mitsui kɛmiiya nɔ fɔŋ ko he, ni mikafata mɛi fɔ̃ji ahe kɛtsu yiwalɛnii; ni kaahã miye amɛdɔkɔdɔkɔ nii lɛ eko.

⁵ Hã jalɔ agbala mitoi kɛ mlihilɛ; hã anɔkwafoi akã mi; shi kɛji mɔ fɔŋ miiwo mihiɛ nyam lɛ, hã makwa; ejaakɛ misɔleɔ daa mishiɔ amɛnifɔ̃ɔjianii lɛ.

⁶ Kɛji aŋɔ mɛi fɔ̃ji ahã kojolɔi, ni amɛbu amɛ fɔ lɛ, no dani amɛaale akɛ miwiemɔi lɛ anɔkwale ni.

⁷ Bɔ ni kɛ mɔ ko miihu ni egbɛɔ shikpɔŋ lɛ, nakai agbɛ wɔwui ashwã gbonyobu toi.

⁸ Shi bo Yehowa, miNyɔŋmɔ, bo onɔ mikɛ mihiɛ fɔ̃ɔ. Bo nɔŋŋ abo mibaa! Kaashi mi tamɔ mɔ ni bɛ hefãlɔ.

⁹ Buu mihe yɛ tsɔne ni amɛtsɔ̃ɔ mi lɛ he buu mihe kɛjɛ mɛi ni tsuɔ nishaianii akpai lɛ ahe.

¹⁰ Hã mɛi fɔ̃ji adu amɛ diɛŋtsɛ amɛtsɔne lɛ, ni mi lɛ, hã maje mli sɔkee.