Lalai 138 - ŊMALƐ KRƆŊKRƆŊ LƐ

Shidaa sɔlemɔ

David Lala ko.

¹ Oo Yehowa, mikɛ mitsui muu lɛ fɛɛ miida bo shi, mala majie oyi yɛ nyɔŋmɔi lɛ ahiɛ!

² Matsɔ̃ mihiɛ mahã oSɔlemɔ we krɔŋkrɔŋ lɛ, ni makula shi, ni majie ogbɛi lɛ yi, yɛ osuɔmɔ ni tsakeee lɛ kɛ onɔkwayeli lɛ hewɔ; ejaakɛ ohã ogbɛi lɛ kɛ owiemɔ lɛ ehehe fe nɔ fɛɛ nɔ.

³ Gbi nɔ ni mitsɛ bo lɛ, ohere mi nɔ; owo mi ekãa, ni misusuma na hewalɛ.

⁴ Oo Yehowa, shikpɔŋ lɛ nɔ maŋtsɛmɛi fɛɛ aaajie oyi; ejaakɛ amɛnu onaa wiemɔi lɛ.

⁵ Amɛaala Yehowa nifeemɔi lɛ ahe lala, ejaakɛ Yehowa anunyam lɛ da!

⁶ Yehowa yɛ ŋwɛi shɔŋŋ moŋ nɛ, shi kɛ̃lɛ ehiɛ kã humi he; shi hewolɔ nyɛɛɛ ehe etee yɛ Yehowa hiɛ.

⁷ Kɛji minyiɛ haomɔ mli lɛ, ohãa miyi naa wala. Kɛji mihenyɛlɔi amli fu mi lɛ, owoɔ onine nɔ yɛ amɛnɔ, ni okɛ ohewalɛ lɛ hereɔ miyiwala.

⁸ Yehowa aaahã eyiŋtoo lɛ aba mli ahã mi. Oo Yehowa, naanɔ osuɔmɔ ni tsakeee lɛ hiɔ shi kɛyaa; gbee bo diɛŋtsɛ oninenaa nitsumɔi lɛ anaa.