Lalai 137 - ŊMALƐ KRƆŊKRƆŊ LƐ

Israelbii nomii lɛ awerɛho

¹ Babilon fai lɛ anaa wɔ ho wɔtara shi yɛ ni wɔfofoo, be ni wɔkai Zion lɛ.

² Jɛi faa naa gãlãi lɛ anɔ wɔŋɔ wɔsaŋkui lɛ wɔtsotsoro.

³ Ejaakɛ jɛi mɛi ni ŋɔ wɔ nom lɛ bi wɔ koni wɔla lalai yɛ. Wɔhaolɔi lɛ tao akɛ wɔjie amɛhiɛtserɛ: Amɛkɛɛ, “Nyɛlaa Zion lalai lɛ eko nyɛtsɔ̃a wɔ!”

⁴ Te aaafee tɛŋŋ ni wɔɔla Yehowa lala yɛ mɛi kpɔji aje hu?

⁵ Oo Yerusalɛm, kɛji mihiɛ kpa onɔ lɛ, no lɛ, hã mininejurɔ agbo yɛ mihe.

⁶ Yerusalɛm, kɛji mikaiii bo, ni mibuuu bo fe mimiishɛɛ nɔ titri ko lɛ, hã mililɛi akpɛtɛ midaaŋ.

⁷ Oo Yehowa, kaimɔ bɔ ni Edombii lɛ fee lɛ, gbi nɔ ni aŋɔ Yerusalɛm lɛ, bɔ ni amɛkɛɛ akɛ, “Nyɛkumɔa, nyɛkumɔa kɛyamɔa eshishitoo lɛ tɔ̃ɔ” lɛ!

⁸ Oo, Babilon, abaakpãtã ohiɛ; Aaajɔɔ mɔ fɛɛ mɔ ni aaatɔ nɔ ni ofee wɔ lɛ he owele.

⁹ Aaajɔɔ mɔ ni aaaŋɔ obii bibii lɛ atswia tɛsaa lɛ!