Lalai 136 - ŊMALƐ KRƆŊKRƆŊ LƐShidaa lala 1 Oo, nyɛdaa Yehowa shi, ejaakɛ ehi; ejaakɛ naanɔ esuɔmɔ ni tsakeee lɛ hiɔ shi kɛyaa! 2 Oo, nyɛdaa nyɔŋmɔi aNyɔŋmɔ lɛ shi; ejaakɛ naanɔ esuɔmɔ ni tsakeee lɛ hiɔ shi kɛyaa! 3 Oo, nyɛdaa nuŋtsɔmɛi aNuŋtsɔ lɛ shi; ejaakɛ naanɔ esuɔmɔ ni tsakeee lɛ hiɔ shi kɛyaa! 4 Mɔ koome ni efeɔ naakpɛɛnii wuji lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 5 Lɛ mɔ ni ekɛ nilee bɔ ŋwɛi amli ŋwɛii lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 6 Lɛ mɔ ni elɛɛ shikpɔŋ lɛ mli eha nui lɛ anɔ lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 7 Lɛ mɔ ni ebɔ hulu kɛ nyɔɔŋtsere lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 8 Ebɔ hulu koni eye shwane nɔ; ejaakɛ naanɔ esuɔmɔ ni tsakeee lɛ hiɔ shi kɛyaa! 9 Ebɔ nyɔɔŋtsere kɛ ŋulamii koni amɛye nyɔɔŋ nɔ; ejaakɛ naanɔ esuɔmɔ ni tsakeee lɛ hiɔ shi kɛyaa! 10 Lɛ mɔ ni etswia Ijipt kromɔbii lɛ nii lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 11 Lɛ ejie Israelbii lɛ kɛje Ijipt lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 12 Ekɛ nineshiwalɛ kɛ kpɔiaŋwalɛ tsu enɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 13 Lɛ mɔ ni egba Ŋshɔ Tsuru lɛ mli lɛ; ejaakɛ naanɔ esuɔmɔ ni tsakeee lɛ hiɔ shi kɛyaa; 14 ni ekpala Israelbii kɛtsɔ̃ teŋ kɛho lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 15 Shi eplenee Farao kɛ eta lɛ yɛ Ŋshɔ Tsuru lɛŋ; ejaakɛ naanɔ esuɔmɔ ni tsakeee lɛ hiɔ shi kɛyaa! 16 Lɛ mɔ ni ekpala emaŋ lɛ kɛtsɔ̃ ŋa lɛ nɔ lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 17 Lɛ mɔ ni etswia maŋtsɛmɛi wuji nii lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 18 Ni egbegbee maŋtsɛmɛi ni yɔɔ gbɛi lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 19 Sihon, Amorbii amaŋtsɛ lɛ, ejaakɛ naanɔ esuɔmɔ ni tsakeee lɛ hiɔ shi kɛyaa! 20 Kɛ Og, Bashan maŋtsɛ lɛ, hu; ejaakɛ naanɔ esuɔmɔ ni tsakeee lɛ hiɔ shi kɛyaa! 21 Ni eŋɔ amɛshikpɔŋ lɛ ehã ewebii akɛ gboshinii lɛ ejaakɛ naanɔ esuɔmɔ ni tsakeee lɛ hiɔ shi kɛyaa! 22 Eŋɔ ehã etsulɔ Israel akɛ gboshinii; ejaakɛ naanɔ esuɔmɔ ni tsakeee lɛ hiɔ shi kɛyaa! 23 Lɛ ji mɔ ni ekai wɔ be ni wɔfee butuu lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 24 Lɛ ejie wɔ yɛ wɔhenyɛlɔi lɛ adɛŋ lɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 25 Lɛ elɛɔ heloo fɛɛ; ejaakɛ naanɔ esuɔmɔ ni tsakeee lɛ hiɔ shi kɛyaa! 26 Oo, nyɛdaa Ŋwɛi Nyɔŋmɔ lɛ shi; ejaakɛ naanɔ esuɔmɔ ni tsakeee lɛ hiɔ shi kɛyaa! |
Bible in Ga Language © Bible Society of Ghana, 2020.
Bible Society of Ghana