Lalai 12 - ŊMALƐ KRƆŊKRƆŊ LƐ

Sɔlemɔ hã yelikɛbuamɔ

David Lala ni ekɛha lalatsɛ nukpa lɛ yɛ Sheminith gbɛjianɔtoo naa.

¹ Yehowa, ye obua wɔ! Ejaakɛ Nyɔŋmɔ gbeyeishelɔ ko bɛ dɔŋŋ; ni anɔkwafoi etã yɛ gbɔmɛi ateŋ.

² Mɔ fɛɛ mɔ lakaa enaanyo. Amɛnaa dɔkɔbii kɛ amɛlilɛi nta.

³ Yehowa ahã mɛi ni wieɔ dɔkɔbii lɛ afee dioo, kɛ lilɛi ni shwãa nibii wuji lɛ,

⁴ mɛi hu ni kɛɔ akɛ, “Wɔkɛ wɔlilɛi aaana nɔ ni wɔtaoɔ. Wɔnaabui lɛ wɔ diɛŋtsɛ wɔnɔ ni. Namɔ yeɔ wɔnɔ Nuŋtsɔ?”

⁵ Yehowa kɛɛ akɛ, “Akɛni awaa ohiafoi ayi, ni mɛi ni efĩ amɛ lɛ kɛ̃mɔɔ hewɔ lɛ, agbɛnɛ, mate shi, ni mɔ ni shweɔ yiwalaheremɔ lɛ mahere eyiwala.”

⁶ Yehowa shiwoi lɛ, shiwoi ni yɔɔ krɔŋŋ ni; amɛtamɔ jwiɛtɛi ni aka yɛ shikpɔŋ flɔnɔɔ mli, ni atsuu he nɔtoonɔtoo shii kpawo.

⁷ Oo Yehowa, buu wɔhe; baamɔ wɔyi daa kɛjɛ nɛkɛ yinɔbii nɛɛ adɛŋ.

⁸ Mɛi fɔ̃ji foɔ sa kɛkpeɔ, ni mɛi fɔ̃ji nyaa yaka saji ahe yɛ gbɔmɛi abii ateŋ.