Lalai 119 - ŊMALƐ KRƆŊKRƆŊ LƐ

Yehowa Mla lɛ

¹ Ajɔɔ mɛi ni shwamɔ ko bɛ amɛjeŋba he, ni amɛyeɔ Yehowa mla lɛ nɔ lɛ.

² Ajɔɔ mɛi ni yeɔ ekpɔi lɛ anɔ ni amɛkɛ amɛtsui muu fɛɛ taoɔ esɛɛgbɛ lɛ,

³ mɛi ni efeee nɔ ni ejaaa gbɛ hu, shi amɛbaa amɛjeŋ yɛ Yehowa gbɛ lɛ nɔ lɛ.

⁴ Yehowa, okɛ omlai lɛ hã wɔ, ni ofã wɔ akɛ wɔye nɔ pɛpɛɛpɛ.

⁵ Oo, mina ni kulɛ mikɛ anɔkwayeli aaaye omlai lɛ anɔ.

⁶ Kɛji mikɛ okitãi lɛ fɛɛ eto mihiɛ lɛ, no lɛ mihiɛ eshwieŋ shi.

⁷ Mikɛ tsui krɔŋŋ aaajie oyi kɛji mikase ojalɛ mlai lɛ.

⁸ Maye okpɔi lɛ anɔ, Oo, kaakwa mi kwrakwra.

Yehowa Mla lɛ nɔyeli

⁹ Te oblanyo aaafee tɛŋŋ, ni eeehã ejeŋba he atse hu? No ji akɛ ekwɛ ehe nɔ jogbaŋŋ yɛ owiemɔ lɛ naa.

¹⁰ Mitaoɔ osɛɛgbɛ kɛ mitsui muu lɛ fɛɛ; kaahã migba afã kɛje okitãi lɛ ahe.

¹¹ Mikɛ owiemɔ lɛ eto mitsui mli koni mikafee esha mishi bo.

¹² Oo Yehowa, majie oyi, tsɔ̃ɔmɔ mi okpɔi lɛ.

¹³ Mikɛ minaabu jajeɔ omlai lɛ fɛɛ ni jɛɔ onaa lɛ.

¹⁴ Minaa okpɔi lɛ ahe miishɛɛ fe bɔ ni mimli filiɔ mi yɛ ninamɔ kpɔtɔɔ he.

¹⁵ Majwɛŋ okpɔi lɛ ahe, ni mihiɛ aaakã otsɔ̃ɔmɔi lɛ anɔ.

¹⁶ Mimli aaafli mi yɛ okpɔi lɛ ahe; mihiɛ kpaŋ owiemɔ lɛ nɔ.

Yehowa Mla lɛ he miishɛɛnamɔ

¹⁷ Okɛ otsulɔ aye mlihilɛ naa koni miyi ana wala, koni maye owiemɔ lɛ nɔ.

¹⁸ Gbelemɔ mihiŋmɛii koni mana omla lɛ mli naakpɛɛnii lɛ.

¹⁹ Gbɔ ji mi yɛ shikpɔŋ lɛ nɔ; kaaŋɔ okitãi lɛ otee mi.

²⁰ Shwee ni mishweɔ omlai lɛ be fɛɛ be lɛ, ewo misusuma hela.

²¹ Okãa hewolɔi, ni mɛi ni duɔ gbɛ kɛjeɔ okitãi lɛ ahe lɛ, alomɔ amɛ.

²² Jiemɔ mi kɛje ahorabɔlɔi kɛ heguɔgbelɔi adɛŋ, ejaakɛ miye omlai lɛ anɔ.

²³ Lumɛi tete po taraa shi amɛkpãŋɔ miyi nɔ; shi mi, otsulɔ lɛ, majwɛŋ okpɔi lɛ ahe.

²⁴ Otsɔ̃ɔmɔi lɛ hãa mimli filiɔ mi, nomɛi woɔ mi ŋaa.

Yehowa Mla lɛ nɔyeli he hiɛdɔɔ

²⁵ Misusuma kã mlu mli; hã miyi ana wala yɛ owiemɔ lɛ naa.

²⁶ Be ni mijaje mijeŋba fɛɛ mitsɔ̃ɔ bo lɛ, obo mi toi; tsɔ̃ɔmɔ mi okpɔi lɛ.

²⁷ Hã manu omlai lɛ ashishi koni majwɛŋ onaakpɛɛ nitsumɔi lɛ ahe.

²⁸ Miwerɛ eho kɛteke nɔ; wo mi hewalɛ yɛ owiemɔ lɛ naa.

²⁹ Kaahã amale jeŋba miigbale mi; ni omlihilɛ naa lɛ, tsɔ̃ɔmɔ mi omla lɛ.

³⁰ Miŋɔ anɔkwayeli gbɛ, mikɛ omlai lɛ eto mihiɛ.

³¹ Oo Yehowa, mikpɛtɛ omlai lɛ, kaahã mihiɛ miishwie shi.

³² Manyiɛ okitãi agbɛ lɛ nɔ pɛpɛɛpɛ kɛji ogbele mijwɛŋmɔ mli.

Niiashishinumɔ he Sɔlemɔ

³³ Oo Yehowa, tsɔ̃ɔmɔ mi omlai lɛ ashishi; koni maye nɔ be fɛɛ be.

³⁴ Dromɔ mi niiashishinumɔ, bɔ ni afee ni maye omla lɛ nɔ kɛ mitsui muu lɛ fɛɛ.

³⁵ Kplamɔ mi kɛnyiɛ okitãi lɛ agbɛ lɛ nɔ, ejaakɛ nomɛi ahe mimii shɛɔ.

³⁶ Hã mashwe omlai lɛ anɔyeli fe ninamɔ.

³⁷ Kaahã minya yakanii kwɛmɔ he, shi moŋ hã mana wala yɛ owiemɔ lɛ naa.

³⁸ Shi ni owo mɛi ni sheɔ bo gbeyei lɛ, hã aba mli nakai ahã mi, otsulɔ.

³⁹ Hã ahorabɔɔ ni misheɔ lɛ akagbale mi, ejaakɛ okpɔi lɛ fɛɛ hi.

⁴⁰ Naa, miishwe omlai lɛ; ni ojalɛ naa lɛ hã miyi ana wala.

Yehowa Mla lɛ nɔ hiɛnɔkãmɔ

⁴¹ Oo Yehowa, hã osuɔmɔ ni tsakeee lɛ, kɛ oyiwalaheremɔ lɛ afee minɔ yɛ oshiwoo lɛ naa;

⁴² kɛkɛ lɛ, mana hetoo mahã mɛi ni bɔɔ mi ahora lɛ; ejaakɛ mihiɛ kã owiemɔ lɛ nɔ.

⁴³ Asaŋ kaajie anɔkwa wiemɔ lɛ kɛmiije midaaŋ kwrakwra; ejaakɛ mihiɛ kã omlai lɛ anɔ.

⁴⁴ Maye omla lɛ nɔ daa kɛyaashi naanɔi anaanɔ;

⁴⁵ ni maye mihe kɛnyiɛ, ejaakɛ otsɔ̃ɔmɔi lɛ asɛɛgbɛ mitao.

⁴⁶ Majaje okpɔi lɛ yɛ maŋtsɛmɛi ahiɛ, ni mihiɛ gboŋ he;

⁴⁷ ejaakɛ mimii shɛɔ mihe yɛ okitãi ni misumɔɔ lɛ ahewɔ.

⁴⁸ Mibuɔ okitãi ni misumɔɔ lɛ, ni mijwɛŋɔ okpɔi lɛ ahe.

Yehowa Mla lɛ mli ekãanamɔ

⁴⁹ Kaimɔ owiemɔ ni okɛ otsulɔ wie ni ehã mina hiɛnɔkãmɔ lɛ.

⁵⁰ Enɛ ji mimiishɛjemɔ yɛ mimanehulu lɛ mli, akɛ owiemɔ lɛ hãa miyi naa wala.

⁵¹ Mɛi ni sheee Nyɔŋmɔ gbeyei yeɔ mihe fɛo naakpa; kɛ̃lɛ mijeko omla lɛ sɛɛ.

⁵² Oo Yehowa, kɛji mikai oteteete mlai lɛ, ehãa mimii shɛɔ mihe.

⁵³ Mimli ewo la naakpa yɛ mɛi fɔ̃ji ni kwaa omla lɛ ahewɔ.

⁵⁴ Okpɔi lɛ ji lalai ni milaa yɛ migbɔtoo be yɛ shikpɔŋ nɛɛ nɔ lɛ.

⁵⁵ Oo Yehowa, nyɔɔŋ tete mikaiɔ ogbɛi, ni miyeɔ omla lɛ nɔ.

⁵⁶ Nɛkɛ jɔɔmɔ nɛɛ feɔ minɔ, ejaakɛ miyeɔ okpɔi lɛ anɔ.

Yehowa Mla lɛ nɔyeli

⁵⁷ Yehowa, bo ji migbɛfaŋnɔ; miiwo shi akɛ maye owiemɔi lɛ anɔ.

⁵⁸ Mikɛ mitsui muu lɛ fɛɛ miikpa fai koni ona mi mɔbɔ yɛ oshiwoo lɛ naa.

⁵⁹ Kɛji mijwɛŋ mijeŋba he lɛ, mikuɔ misɛɛ kɛbaa okpɔi lɛ ahe.

⁶⁰ Mihe feɔ oya koni maye okitãi lɛ anɔ, ni mishashaooo shi.

⁶¹ Mɛi fɔ̃ji akpãi lɛ fimɔɔ mi moŋ nɛ; shi kɛ̃lɛ mihiɛ kpaaa omla lɛ nɔ.

⁶² Miteɔ shi nyɔɔŋteŋ mijieɔ oyi yɛ ojalɛ kojomɔi lɛ ahewɔ.

⁶³ Mɛi fɛɛ ni sheɔ bo gbeyei lɛ kɛ mɛi fɛɛ ni yeɔ okpɔi lɛ anɔ lɛ anaanyo ji mi.

⁶⁴ Oo Yehowa, osuɔmɔ ni tsakeee lɛ eyi shikpɔŋ lɛ nɔ tɔ; tsɔ̃ɔmɔ mi koni male omlai lɛ.

Yehowa Mla lɛ jarawalɛ

⁶⁵ Oo Yehowa, ofee otsulɔ ejurɔ yɛ owiemɔ lɛ naa.

⁶⁶ Hã mi jwɛŋmɔ kpakpa kɛ nilee, ejaakɛ miheɔ okitãi lɛ miyeɔ.

⁶⁷ Midu gbɛ dani agbala mitoi lɛ, shi agbɛnɛ lɛ, mibo owiemɔ lɛ toi.

⁶⁸ Ohi, ni ofeɔ ejurɔ; tsɔ̃ɔmɔ mi okpɔi lɛ.

⁶⁹ Mɛi ni sheee Nyɔŋmɔ gbeyei folɔɔ amale saji shwieɔ minɔ; shi mi lɛ, mikɛ mitsui muu lɛ fɛɛ yeɔ otsɔ̃ɔmɔi lɛ anɔ.

⁷⁰ Hewolɔi nɛɛ, amɛtsui wa, shi mi lɛ, omla lɛ he mimii shɛɔ.

⁷¹ Ehi akɛ agbala mitoi, koni makase okpɔi lɛ.

⁷² Mla ni jɛ onaa lɛ, ehi hã mi fe shika kɛ jwiɛtɛi akpei abɔ.

Yehowa Mla lɛ jalɛ

⁷³ Bo obɔ mi, ni okɛ oniji shɔ̃ mi; hã mi niiashishinumɔ koni makase okitãi lɛ.

⁷⁴ Mɛi ni sheɔ bo gbeyei lɛ aaana mi, ni amɛaana miishɛɛ; ejaakɛ mihiɛ kã owiemɔ lɛ nɔ.

⁷⁵ Oo Yehowa, mile akɛ okojomɔi lɛ ja, ni anɔkwayeli okɛgbala mitoi!

⁷⁶ Hã osuɔmɔ ni tsakeee lɛ ashɛje mimii, tamɔ bɔ ni owo otsulɔ shi lɛ.

⁷⁷ Naa mi mɔbɔ koni miyi ana wala; ejaakɛ omla lɛ he mimii shɛɔ.

⁷⁸ Mɛi ni sheee bo, Nyɔŋmɔ, gbeyei lɛ, hã amɛhiɛ ashwie shi; ejaakɛ yakatswaa amɛfolɔ minaa lɛ; shi mi lɛ, majwɛŋ otsɔ̃ɔmɔi lɛ ahe.

⁷⁹ Hã mɛi ni sheɔ bo gbeyei lɛ akpale kɛba miŋɔɔ koni amɛbale okpɔi lɛ.

⁸⁰ Kaahã kpa ko miihi mitsui mli yɛ omlai lɛ agbɛfaŋ, koni mihiɛ akashwie shi.

Kpɔmɔ he sɔlemɔ

⁸¹ Misusuma miiye oyiwalaheremɔ lɛ he kumai, ejaakɛ mihiɛ kã owiemɔ lɛ nɔ.

⁸² Mihiŋmɛi miiye oshiwoo lɛ he kumai. Mibiɔ akɛ, “Te be ni oooshɛje mimii hu?”

⁸³ Ejaakɛ mitsɔ̃ tamɔ wain wolo tɔ momo yɛ lasu mli; kɛ̃lɛ mihiɛ kpaaa okpɔi lɛ anɔ.

⁸⁴ Mɛɛbe otsulɔ aaamɛ kɛyashi? Mɛɛbe ooogbala mɛi ni waa mi yi lɛ atoi.

⁸⁵ Mɛi ni sheee bo gbeyei, mɛi ni yeee omlai lɛ anɔ lɛ, etsatsaa bui amɛto mi.

⁸⁶ Okitãi lɛ fɛɛ lɛ, anɔkwale sɔŋŋ ni; amɛkɛ amale folɔɔ minaa; ye obua mi.

⁸⁷ Shwɛ shrao ni amɛplenee mi yɛ shikpɔŋ lɛ nɔ; shi mi lɛ, mikwako okpɔi lɛ.

⁸⁸ Yɛ osuɔmɔ ni tsakeee lɛ naa lɛ hã miyi ana wala, koni maye okpɔi ni jɛ onaa lɛ anɔ.

Yehowa Mla lɛ ma shi shiŋŋ

⁸⁹ Oo Yehowa, owiemɔ lɛ ma shi shiŋŋ yɛ ŋwɛi kɛmiiya naanɔ.

⁹⁰ Onɔkwayeli lɛ yɛ kɛmiiya yinɔi fɛɛ nɔ. Bo oto shikpɔŋ lɛ shishi, ni ema shi shiŋŋ nɛɛ.

⁹¹ Bo ofãmɔ naa lɛ, amɛyɛ kɛbashi ŋmɛnɛ; ejaakɛ otsuji ji nibii fɛɛ kwa.

⁹² Eji jeee omla lɛ he mimii shɛɔ kulɛ, be nɛ mihiɛ ekpãtã momo, yɛ mimanehulu lɛ mli.

⁹³ Mihiɛ kpaŋ omlai lɛ anɔ gbi ko gbi ko; ejaakɛ nomɛi anɔ otsɔ̃ ni ohã miyi na wala.

⁹⁴ Onɔ ji mi, heremɔ mi, ejaakɛ mitao omlai lɛ asɛɛgbɛ.

⁹⁵ Mɛi fɔ̃ji woɔ mi ka koni amɛkpãtã mihiɛ, shi mi lɛ, mijwɛŋɔ omlai lɛ anɔ.

⁹⁶ Mina akɛ nɔ fɛɛ nɔ yɛ naagbee, shi okitã lɛ, ebɛ naagbee.

Yehowa Mla lɛ he suɔmɔ

⁹⁷ Oo, misumɔɔ omla lɛ akɛ nɔ ko! Gbi muu fɛɛ lɛ, no he mijwɛŋɔ.

⁹⁸ Okitãi lɛ hãa mileɔ nii fe mihenyɛlɔi lɛ; ejaakɛ mihiɛ mli kpɛŋŋ.

⁹⁹ Miyɛ niiashishinumɔ fe mitsɔ̃ɔlɔi lɛ fɛɛ, ejaakɛ okpɔi lɛ ahe mijwɛŋɔ.

¹⁰⁰ Minuɔ niiashishi kwraa fe hiimeji tete po, ejaakɛ miyeɔ okpɔi lɛ anɔ.

¹⁰¹ Mikɔ minane kɛje gbɛ fɔŋ fɛɛ gbɛ fɔŋ nɔ, koni maye owiemɔ lɛ nɔ.

¹⁰² Migbako afã kɛjeko owiemɔi lɛ ahe, ejaakɛ bo otsɔ̃ɔ mi nii.

¹⁰³ Owiemɔi lɛ ŋɔɔ minaa akɛ nɔ ko; eŋɔɔ minaa fe wo tete!

¹⁰⁴ Kɛtsɔ̃ omlai lɛ anɔ lɛ, minaa niiashishinumɔ; hewɔ lɛ miihi jeŋba fɔŋ fɛɛ jeŋba fɔŋ.

La ni kpɛɔ kɛjɛɔ Yehowa Mla lɛŋ lɛ

¹⁰⁵ Owiemɔ ji kane hã minanefaamɔ, kɛ la ni kpɛɔ yɛ migbɛ nɔ.

¹⁰⁶ Mikã kitã, ni mima nɔ mi akɛ maye ojalɛ mlai lɛ anɔ.

¹⁰⁷ Miina nɔ naakpa! Oo Yehowa, hã miyi ana wala yɛ owiemɔ lɛ naa!

¹⁰⁸ Oo Yehowa, ŋɔɔ oyi ni mijieɔ lɛ akɛ afɔle, koni otsɔ̃ɔ mi omlai lɛ.

¹⁰⁹ Mihiɛ miwala yɛ midɛŋ be fɛɛ be; shi omla lɛ mihiɛ kpaaa nɔ.

¹¹⁰ Mɛi fɔ̃ji etsɔ̃ mi tsɔne moŋ nɛ, shi miduko gbɛ kɛjeko otsɔ̃ɔmɔi lɛ ahe.

¹¹¹ Miŋɔ omlai lɛ mifee migbɛfaŋnɔ kɛmiiya naanɔ, ejaakɛ nomɛi ahe miishɛɛ mitsui naa.

¹¹² Mikpɛ miyiŋ akɛ maye omlai lɛ anɔ daa kɛyaashi naanɔ.

Shweshweeshwe yɛ Yehowa Mla lɛ naa

¹¹³ Jwɛŋmɔ enyɔnyɔɔnyɔtsɛmɛi lɛ miihi amɛ; shi misumɔɔ omla lɛ.

¹¹⁴ Bo ji miteemɔhe kɛ mitsɛŋ; owiemɔ lɛ nɔ mihiɛ kã.

¹¹⁵ Nyɛ efɔŋfeelɔi, nyɛjea minɔ nyɛyaa, koni maye miNyɔŋmɔ lɛ kitãi lɛ anɔ.

¹¹⁶ Hiɛmɔ mimli yɛ oshiwoo lɛ naa, koni miyi ana wala; ni mihiɛnɔkãmɔ lɛ hewɔ lɛ kaahã mihiɛ miishwie shi.

¹¹⁷ Hiɛmɔ mimli koni mafee shweshweeshwe, koni maye okpɔi lɛ anɔ be fɛɛ be.

¹¹⁸ Mɛi fɛɛ ni duɔ gbɛ kɛjeɔ okpɔi lɛ ahe lɛ, okwaa amɛ; ejaakɛ amɛnilee fɛɛ lɛ shishiumɔ ni.

¹¹⁹ Shikpɔŋ lɛ nɔ mɛi fɔ̃ji fɛɛ lɛ, oshɛrɛɔ amɛ oshwieɔ tamɔ dadefei; no hewɔ lɛ, miisumɔ okitãi lɛ.

¹²⁰ Ohe gbeyei naa lɛ, mihe kpokpoɔ; ni miishe odɛ̃ŋ kojomɔi lɛ agbeyei.

Yehowa Mla lɛ nɔyeli

¹²¹ Nɔ ni ja ni hi lɛ, mifee; kaaŋmɛɛ mihe ohã mɛi ni waa mi yi lɛ.

¹²² Daamɔ mli ohã otsulɔ, koni ahi ahã lɛ; kaahã mɛi ni sheee bo, Nyɔŋmɔ, gbeyei miiwa mi yi.

¹²³ Etɔ mi kɛ oyiwalaheremɔ kɛ ojalɛ shiwoo lɛ gbɛkwɛmɔ.

¹²⁴ Okɛ otsulɔ aye yɛ osuɔmɔ ni tsakeee lɛ naa; ni tsɔ̃ɔmɔ mi omlai lɛ.

¹²⁵ Otsulɔ ji mi; dromɔ mi niiashishinumɔ, koni male omlai lɛ.

¹²⁶ Be ni Yehowa baafee nɔ ko lɛ eshɛ; ejaakɛ akwa omla lɛ.

¹²⁷ No hewɔ lɛ, miisumɔ okitãi lɛ fe shika; hɛɛ fe shika krɔŋŋ.

¹²⁸ No hewɔ lɛ, mibaa mijeŋ yɛ okpɔi lɛ anaa. Miihi kutumpɔo gbɛi fɛɛ.

Ashweɔ Yehowa Mla lɛ nɔyeli

¹²⁹ Omlai lɛ yɛ naakpɛɛ, no hewɔ lɛ, misusuma yeɔ nɔ.

¹³⁰ Owiemɔi lɛ amlitsɔ̃ɔmɔ, gbeleɔ jwɛŋmɔ mli fãŋŋ, ni ehãa mɔ ni leee nii leɔ nii.

¹³¹ Migbɛɔ midaaŋ kɛ tsuisuu, yɛ shwee ni mishweɔ okitãi lɛ ahewɔ.

¹³² Tsɔ̃ ohiɛ okwɛ mi, ni ona mi mɔbɔ, tamɔ bɔ ni ofeɔ ohãa mɛi ni sumɔɔ ogbɛi lɛ.

¹³³ Hã minane amɔ shi yɛ oshiwoo lɛ naa, ni kaahã nɔsha ko miiye minɔ.

¹³⁴ Heremɔ mi kɛjɛ adesa yiwalɛ mli, koni maye omlai lɛ anɔ.

¹³⁵ Tse ohiɛ ohã otsulɔ koni otsɔ̃ɔ mi omlai lɛ.

¹³⁶ Mihiŋmɛiŋ yaafonu hoɔ tamɔ faa, ejaakɛ ayeee omlai lɛ anɔ.

Yehowa Mla lɛ naa jalɛ saneyeli

¹³⁷ Oo Yehowa, jalɔ ji bo, ni okojomɔi lɛ hu ja kɛmɔ shi.

¹³⁸ Kitãi ni awo yɛ omlai lɛ ahe lɛ, jalɛ kɛ anɔkwale sɔŋŋ ni.

¹³⁹ Mihiɛdɔɔ hãa mimli woɔ la fe nine; ejaakɛ mihenyɛlɔi lɛ ahiɛ kpaa owiemɔi lɛ anɔ.

¹⁴⁰ Aka oshiwoo lɛ akwɛ, ni ana akɛ anɔkwale ni; no hewɔ ni otsulɔ sumɔɔ oshiwoi lɛ.

¹⁴¹ Mi lɛ, fufɔoo ji mi, ni abuuu mi; shi kɛ̃lɛ mihiɛ kpaaa omlai lɛ anɔ.

¹⁴² Ojalɛ lɛ, naanɔ jalɛ ni, ni omla lɛ, anɔkwale ni.

¹⁴³ Haomɔ kɛ piŋmɔ kã minɔ, shi kɛ̃lɛ okitãi lɛ ji nɔ ni shɛjeɔ mimii.

¹⁴⁴ Omlai lɛ ja kɛmiiya naanɔ. Hã mi niiashishinumɔ koni miyi ana wala.

Kpɔ̃mɔ he sɔlemɔ

¹⁴⁵ Mikɛ mitsui muu lɛ fɛɛ bolɔɔ tsɛɔ bo! Oo Yehowa, heremɔ mi nɔ, ni maye omlai lɛ anɔ.

¹⁴⁶ Miibolɔ miitsɛ bo! Heremɔ miyiwala koni maye omlai lɛ anɔ.

¹⁴⁷ Miteɔ shi maŋkɛ mra mibolɔɔ. Hɛɛ, mibolɔɔ mitsɛɔ bo kɛhã yelikɛbuamɔ! Mihiɛ kã owiemɔi lɛ anɔ.

¹⁴⁸ Mibɛɛɛ mihiŋmɛi nyɔɔŋnyɔɔŋ fɛɛ; koni majwɛŋ oshiwoi lɛ ahe.

¹⁴⁹ Bo mi toi yɛ osuɔmɔ ni tsakeee lɛ naa. Oo Yehowa, yɛ ojalɛ naa lɛ baamɔ miyi!

¹⁵⁰ Mɛi ni kɛ yiŋsha waa mi yi lɛ miibɛŋkɛ mi. Amɛ lɛ amɛkɛ omla lɛ tsuuu nii.

¹⁵¹ Shi Yehowa, bo lɛ obɛŋkɛ mi, ni okitãi lɛ fɛɛ lɛ anɔkwale ni.

¹⁵² Mile kɛjɛ jeeŋmɔ beebe, kɛtsɔ̃ omlai lɛ anɔ, akɛ oto omlai lɛ oma shi shiŋŋ kɛmiiya naanɔ.

Yelikɛbuamɔ he faikpamɔ

¹⁵³ Kwɛmɔ mimanehulu, ni ohere mi; ejaakɛ mihiɛ kpaaa omla lɛ nɔ.

¹⁵⁴ Ye misane lɛ ohã mi ni okpɔ̃ mi; hã miyi ana wala yɛ oshiwoo lɛ naa.

¹⁵⁵ Mɛi fɔ̃ji lɛ ahereŋ amɛyiwala; ejaakɛ amɛdiii omlai lɛ asɛɛ.

¹⁵⁶ Oo Yehowa, omɔbɔnalɛ fa babaoo, ojalɛ saneyeli naa lɛ, hã miyi ana wala.

¹⁵⁷ Mɛi ni waa mi yi kɛ mihenyɛlɔi lɛ ayi fa naakpa; kɛ̃lɛ mishiko omlai lɛ.

¹⁵⁸ Mikwɛɔ mɛi ni bɛ hemɔkɛyeli lɛ, ni amɛnii feɔ mi taŋ; ejaakɛ amɛyeee okitãi lɛ anɔ.

¹⁵⁹ Kwɛ bɔ ni misumɔɔ omlai lɛ! Hã miyi ana wala, yɛ osuɔmɔ ni tsakeee lɛ naa.

¹⁶⁰ Owiemɔ tso muu lɛ fɛɛ lɛ, anɔkwale sɔŋŋ ni; ni ojalɛ kojomɔi lɛ fɛɛ hiɔ shi kɛyaa naanɔ.

Henɔjɔɔmɔ kɛ Yehowa Mla lɛ hãmɔ

¹⁶¹ Lumɛi folɔɔ minaa yakatswaa kɛ yiwalɛ shi mijɛɔ mitsui mli mibuɔ owiemɔi lɛ.

¹⁶² Minaa owiemɔ lɛ he miishɛɛ tamɔ mɔ ko ni eto jwetri wulu ahuu.

¹⁶³ Minyɛɔ, ni mihiɔ apasa; shi misumɔɔ omla lɛ.

¹⁶⁴ Mijieɔ oyi shii kpawo daa gbi, yɛ ojalɛ mlai lɛ ahewɔ.

¹⁶⁵ Mɛi ni sumɔɔ omla lɛ, amɛyɛ toiŋjɔlɛ babaoo naakpa ni nɔ ko nɔ ko bɛ ni woɔ amɛnajiaŋ.

¹⁶⁶ Oo Yehowa, mihiɛ kã oyiwalaheremɔ lɛ nɔ; ni miyeɔ okitãi lɛ anɔ.

¹⁶⁷ Misusuma yeɔ omlai lɛ anɔ; miisumɔ mlai lɛ naakpa.

¹⁶⁸ Miyeɔ omlai kɛ okpɔi lɛ anɔ, ejaakɛ ohiŋmɛi jwere nɔ fɛɛ nɔ ni mifeɔ nɔ.

Yelikɛbuamɔ he sɔlemɔ

¹⁶⁹ Oo Yehowa, bo mibolɔmɔ toi; hã mi niiashishinumɔ yɛ owiemɔ lɛ naa.

¹⁷⁰ Hã mifaikpamɔ lɛ ashɛ oŋɔɔ; heremɔ mi yɛ oshiwoo lɛ naa.

¹⁷¹ Minaabu aaafɔse oyijiemɔ, ejaakɛ otsɔ̃ɔ mi omlai lɛ.

¹⁷² Mililɛi aaala omla lɛ he lala, ejaakɛ okitãi lɛ fɛɛ ja.

¹⁷³ Feemɔ kralo ni oye obua mi, ejaakɛ miŋɔ omlai lɛ.

¹⁷⁴ Oo Yehowa, miishwe odɛ̃ŋ yiwalaheremɔ lɛ; ni omla lɛ ji nɔ ni shɛjeɔ mimii.

¹⁷⁵ Hã miyi ana wala bɔ ni afee ni majie oyi; ni ohã omlai lɛ aye abua mi.

¹⁷⁶ Midu gbɛ tamɔ too ni elaaje; blɛ baatao mi, otsulɔ, ejaakɛ okitãi lɛ mihiɛ kpako nɔ.