Lalai 116 - ŊMALƐ KRƆŊKRƆŊ LƐ

Mɔ ko ni ahere lɛ miijie Nyɔŋmɔ yi

¹ Miisumɔ Yehowa, ejaakɛ ebo migbee kɛ mifaikpamɔ lɛ toi.

² Akɛni egboo etoi shi ehã mi hewɔ lɛ, gbii abɔ ni mihiɛ kã nɛɛ lɛ, lɛ mabolɔ matsɛ.

³ Gbele tsɔnei lɛ bɔle mi kɛkpe, gbohiiaje gbeyei lɛ mɔ mi; mina nɔ̃, ni miwerɛ ho mihe.

⁴ Kɛkɛ ni mibo mitsɛ Yehowa akɛ, “Oo Yehowa, miikpa bo fai, heremɔ miyiwala!”

⁵ Durolɔ kɛ jalɔ ji Yehowa; wɔNyɔŋmɔ lɛ mɔbɔnalɔ ni.

⁶ Yehowa baa humii ayi; be ni aba mi shi lɛ ehere miyiwala.

⁷ Oo, misusuma, kuu osɛɛ ni oyajɔɔ ohe, ejaakɛ Yehowa efee bo ejurɔ pii.

⁸ Ejaakɛ ojie mi yɛ gbele dɛŋ, ofo mihiŋmɛiŋ yaafonu sɛɛ, ni ohãaa mashane ni magbee shi.

⁹ Yehowa hiŋmɛi aaakã mihe yɛ hiɛkãalɔi ashikpɔŋ lɛ nɔ.

¹⁰ Mihiɛ mihemɔkɛyeli lɛ mli kpɛŋŋ, be ni mikɛɛ akɛ, “Ahao mi naakpa” lɛ.

¹¹ Mikɛ tsuifãa kɛɛ akɛ, “Gbɔmɔ ko kwraa bɛ ni aaaŋɔ he afɔ enɔ.”

¹² Mɛni maŋɔ to Yehowa najiaŋ, yɛ ejuji fɛɛ ni efee mi lɛ hewɔ?

¹³ Mawo yiwalaheremɔ kpulu lɛ nɔ, ni matsɛ Yehowa gbɛi lɛ.

¹⁴ Maye mishiwoi lɛ anɔ yɛ maŋ lɛ fɛɛ hiɛ.

¹⁵ Yehowa mɛi krɔŋkrɔŋi lɛ agbele jara wa yɛ ehiɛ.

¹⁶ Oo Yehowa, otsulɔ ji mi; otsulɔ kɛ oweyoo bi ji mi. Okpɔlɔ migboklɛi lɛ.

¹⁷ Mashã shidaa afɔle mahã bo, ni maja Yehowa.

¹⁸ Maye mishiwoi lɛ anɔ mahã Yehowa yɛ emaŋ muu lɛ fɛɛ hiɛ,

¹⁹ yɛ Yehowa we lɛ kpoi lɛ anɔ yɛ bo omli. Oo Yerusalɛm! Nyɛjiea Yehowa yi.