Lalai 115 - ŊMALƐ KRƆŊKRƆŊ LƐ

Nyɔŋmɔ Anɔkwafo koome lɛ

¹ Jeee wɔ, Yehowa, jeee wɔ, shi ogbɛi lɛ moŋ aŋɔ anunyam ahã, yɛ osuɔmɔ ni tsakeee kɛ onɔkwayeli lɛ hewɔ!

² Mɛɛba majimaji lɛ aaakɛɛ akɛ, “Nɛgbɛ amɛNyɔŋmɔ lɛ yɔɔ?”

³ WɔNyɔŋmɔ lɛ, Ŋwɛii amli ŋwɛi lɛ eyɔɔ; ni nɔ fɛɛ nɔ ni esumɔɔ lɛ, no efeɔ.

⁴ Amɛmãgãi lɛ, jwiɛtɛi kɛ shika ni; gbɔmɔ adesa ninenaa nitsumɔ ni.

⁵ Amɛyɛ naabui, shi amɛwieee; amɛyɛ hiŋmɛii, shi amɛnaaa nii.

⁶ Amɛyɛ toii, shi amɛnuuu nii; amɛyɛ gugɔji, shi amɛfuuu nii.

⁷ Amɛyɛ niji, shi amɛmɔ̃ɔɔ nɔ mli; amɛyɛ naji hu, shi amɛnyiɛɛɛ; ni amɛtswaaa amɛsɛŋ tete.

⁸ Mɛi ni fee amɛ lɛ tamɔ amɛ nɔŋŋ; nakai nɔŋŋ mɔ fɛɛ mɔ ni kɛ ehiɛ fɔ̃ɔ amɛnɔ lɛ hu tamɔ amɛ.

⁹ Oo Israelbii, nyɛŋɔa nyɛhiɛ nyɛfɔ̃a Yehowa nɔ! Lɛ ji nyɛbualɔ kɛ nyɛtsɛŋ.

¹⁰ Oo Aaronwe, nyɛŋɔa nyɛhiɛ nyɛfɔa Yehowa nɔ! Lɛ ji nyɛbualɔ kɛ nyɛtsɛŋ!

¹¹ Nyɛ mɛi ni nyɛsheɔ Yehowa gbeyei, nyɛŋɔa nyɛhiɛ nyɛfɔa Yehowa nɔ. Lɛ ji nyɛbualɔ kɛ nyɛtsɛŋ.

¹² Yehowa ekai wɔ, ni eeejɔɔ wɔ; Eeejɔɔ Israel we lɛ; eeejɔɔ Aaron we lɛ.

¹³ Eeejɔɔ mɛi ni sheɔ Yehowa gbeyei lɛ, mɛi bibii kɛ mɛi wuji fɛɛ.

¹⁴ Yehowa aaahã nyɛshwere babaoo, nyɛ kɛ nyɛbii fɛɛ.

¹⁵ Yehowa, ŋwɛi kɛ shikpɔŋ bɔlɔ lɛ aaajɔɔ nyɛ.

¹⁶ Ŋwɛi lɛ, Yehowa ŋwɛi ni; shi shikpɔŋ lɛ, eŋɔ ehã gbɔmɛi abii.

¹⁷ Jeee gbohii jieɔ Yehowa yi, ni jeee mɛi ni kpelekeɔ shi kɛyaa gbohiiaje lɛ;

¹⁸ shi wɔ, hiɛkãalɔi lɛ moŋ wɔɔjie Yehowa yi, kɛjɛ be nɛɛ mli, aahu kɛyaashi naanɔ fɛɛ. Nyɛjiea Yehowa yi!