Lalai 109 - ŊMALƐ KRƆŊKRƆŊ LƐ

Mɔ ko ni ehao mligbigblimɔ

David Lala kɛha lalatsɛ nukpa lɛ.

¹ Oo bo Nyɔŋmɔ, mɔ yi ni mijieɔ, kaamua onaa!

² Ejaakɛ mɛi fɔ̃ji kɛ osatofoi miitswa mi lilɛi; amɛmiimale mihe.

³ Amɛhetsɛ̃ wiemɔi efo sa ewo mihe; amɛtua mi yakatswaa ni mifeko nɔ ko.

⁴ Be ni miisumɔ amɛ ni miisɔle miihã amɛ lɛ, amɛ lɛ amɛmiinyɛ mi moŋ.

⁵ Amɛkɛ efɔŋ toɔ mi ekpakpa najiaŋ, ni amɛkɛ nyɛɛ toɔ misuɔmɔ lɛ najiaŋ.

⁶ Amɛkɛɔ akɛ, “Fãa yiwalɔ ko owo ehe, hã naafolɔlɔ ko afolɔ enaa.

⁷ Kɛ akojo lɛ lɛ, hã abu lɛ fɔ; ni aŋɔ esɔlemɔ po akɛ eshafeemɔ.

⁸ Afo ewala gbii anɔ kuku; ni enii fɛɛ atsɔ̃ mɔ kroko nɔ.

⁹ Hã ebii atsɔ̃mɔ awusãi, ni eŋa atsɔ̃ okulafo.

¹⁰ Hã ebii akpa shi amɛsisɛ̃; hã ashwie amɛ yɛ amaŋfɔ̃i tete ni amɛyɔɔ mli lɛ amli.

¹¹ Enyɔmɔtsɛ ashɔ̃ nii ni eyɔɔ fɛɛ yɛ edɛŋ; ni gbɔi hu aha edeŋmegbomɔ lɛ mli nii fɛɛ.

¹² Mɔ ko mɔ ko akafee lɛ ejurɔ, ni mɔ ko mɔ ko hu akana ebii awusãi lɛ mɔbɔ.

¹³ Hã aplenee eshwiei fɛɛ, ni agbe egbɛi yɛ yinɔi ni baaba lɛ ateŋ.

¹⁴ Yehowa akai etsɛmɛi lɛ anishaianii lɛ, ni akɛ enyɛ he esha lɛ hu akafa lɛ.

¹⁵ Yehowa akai amɛhe eshai lɛ daa; amɛ diɛŋtsɛ lɛ, akakai amɛ yɛ shikpɔŋ lɛ nɔ dɔŋŋ.

¹⁶ Ejaakɛ nakai gbɔmɔ lɛ ejwɛŋŋ ejurɔfeemɔ he; shi moŋ ewa ohiafo kɛ mɔ ni efi lɛ kɛ mɔ ni ewerɛ eho ehe lɛ yi, kɛyashiɔ egbele mli.

¹⁷ Esumɔɔ loomɔ; hewɔ lɛ loomɔ aba enɔ; esumɔɔɔ jɔɔmɔ; hewɔ lɛ ekɛ jɔɔmɔ teŋ ajekɛ.

¹⁸ Ewo loomɔ tamɔ atade; loomɔ lɛ abote ehewojiaŋ tamɔ nu, ni ebote ewuiaŋ tamɔ mu.

¹⁹ Loomɔ lɛ atsɔ̃ mama ni ebu daa; kɛ mlifiinɔ, ni ekɛfi emli daa.

²⁰ Hã enɛ afee nyɔmɔwoo ni aaajɛ Yehowa dɛŋ ahã minaaflɔlɔi kɛ mɛi ni wieɔ mihe efɔŋ lɛ.

²¹ Oo miNuŋtsɔ Nyɔŋmɔ, Ogbɛi lɛ hewɔ lɛ ye misane lɛ ohã mi; ejaakɛ osuɔmɔ ni tsakeee lɛ hewɔ lɛ heremɔ mi.

²² Ejaakɛ ohiafo ji mi, ni minii yɛ mɔbɔ; ni mitsui ekumɔ yɛ mimli.

²³ Milaaje tamɔ gbɛkɛnaashi hɔ̃ɔŋ ahwanya mi tamɔ baalabi.

²⁴ Ŋmaahilɛ sɔŋŋ ehã minakutseiaŋ egbɔjɔ, mitã loo, ni mifee kanyakanya.

²⁵ Mitsɔ̃ ahorabɔɔnɔ mihã minaaflɔlɔi lɛ; ni kɛji amɛna mi lɛ, amɛhosoɔ amɛyitsei.

²⁶ Oo Yehowa, miNyɔŋmɔ, ye obua mi. Heremɔ miyiwala yɛ osuɔmɔ ni tsakeee lɛ naa.

²⁷ Hã amɛle akɛ, bo Yehowa, oninenaa nitsumɔ nɛ, akɛ bo ohere miyiwala.

²⁸ Hã amɛ lɛ, amɛlomɔ mi; shi bo lɛ ojɔɔ mi! Hã mɛi ni heɔ mi agbe lɛ ahiɛ agboi. Shɛjemɔ otsulɔ mii.

²⁹ Hã minaaflɔlɔi lɛ awula kɛ hiɛshishwiemɔ; ni amɛhiɛgbele lɛ akpɛtɛ amɛhe tamɔ mama.

³⁰ Mikɛ minaabu aaada Yehowa shi babaoo, ni majie eyi yɛ mɛi babaoo ateŋ,

³¹ ejaakɛ lɛ efãa ohiafo he, ni ehereɔ eyiwala kɛjɛɔ mɛi ni buɔ lɛ gbele fɔ lɛ adɛŋ.