Lalai 107 - ŊMALƐ KRƆŊKRƆŊ LƐ

WOLO NI JI ENUMƆ (Lalai 107—150 ) Nyɔŋmɔ mlihilɛ kafomɔ

¹ Nyɛdaa Yehowa shi, ejaakɛ ehi ejaakɛ naanɔ esuɔmɔ ni tsakeee lɛ hiɔ shi kɛyaa.

² Mɛi ni Yehowa ekpɔ̃ amɛ lɛ akɛɛ nakai, mɛi ni akpɔ̃ amɛ kɛjɛ haomɔ mli lɛ.

³ Mɛi ni ebua amɛnaa kɛjɛ shikpɔji lɛ anɔ lɛ, kɛjɛ bokãgbɛ kɛ anaigbɛ lɛ, kɛjɛ kooyigbɛ kɛ wuoyigbɛ lɛ, akɛɛ nakai.

⁴ Amɛteŋ mɛi komɛi tsomlo yɛ shiaŋa ni nɔ ko nɔ ko bɛ nɔ lɛ nɔ; amɛnaaa gbɛ ko ni kã kɛyaa maŋ ni gbɔmɛi yɔɔ mli mli.

⁵ Hɔmɔ kɛ kumai ye amɛ, ni amɛtɔ biti.

⁶ Kɛkɛ ni amɛbolɔ amɛtsɛ Yehowa yɛ amɛfimɔ lɛ mli, ni ejie amɛ kɛjɛ amɛmanehului lɛ amli;

⁷ ni enyiɛ amɛhiɛ kɛtsɔ̃ gbɛ trɔmɔɔ nɔ, kɛyashɛ maŋ ni gbɔmɔ hiɔ mli mli.

⁸ Esa akɛ amɛda Yehowa shi, yɛ esuɔmɔ ni tsakeee lɛ hewɔ, yɛ enaakpɛɛnii ni etsuɔ ehãa gbɔmɛi abii lɛ hewɔ.

⁹ Mɔ ni kumai yeɔ lɛ lɛ, ehãa lɛ nu enuɔ; ni mɔ ni hɔmɔ yeɔ lɛ lɛ, ehãa etɔɔ kɛ nii kpakpai.

¹⁰ Mɛi komɛi hu tara duŋ kɛ awerɛho mli, gboklɛfoi ni awo amɛ kɔsɔŋkɔsɔ ni amɛyɔɔ amanehulu mli.

¹¹ Ejaakɛ amɛte shi amɛshi Nyɔŋmɔ wiemɔ lɛ, ni amɛnyaŋe Ŋwɛi Flooflonyo lɛ ŋaawoo lɛ.

¹² Akɛ nitsumɔ keketee jɔɔ amɛhe; amɛgbeegbee shi ni bualɔ ko bɛ.

¹³ Ni amɛbolɔ amɛtsɛ Yehowa yɛ amɛfimɔ lɛ mli; ni ejie amɛ kɛjɛ amɛmanehului lɛ amli.

¹⁴ Ejie amɛ kɛjɛ duŋ kɛ awerɛhoo mli, ni etserɛ amɛkɔsɔŋkɔsɔi lɛ amli.

¹⁵ Esa akɛ amɛda Yehowa shi yɛ esuɔmɔ ni tsakeee kɛ enaakpɛɛnii ni etsuɔ ehãa gbɔmɛi adesai abii lɛ ahewɔ.

¹⁶ Ejaakɛ ekumɔ akɔɔble agboi lɛ, ni efolɔ dade adabaŋi lɛ amli.

¹⁷ Mɛi komɛi lɛ, amɛnishaianii wo amɛ hela; ni amɛnifɔɔjianii lɛ ahewɔ amɛna nɔ.

¹⁸ Niyenii ko niyenii ko baaa amɛtsine, ni amɛbɛŋkɛ gbonyobu naa kpaakpa,

¹⁹ ni amɛbolɔ amɛtsɛ Yehowa yɛ amɛfimɔ lɛ mli; ni ejie amɛ kɛjɛ amɛmanehului lɛ amli.

²⁰ Efã, ni ewiemɔ lɛ tsa amɛ; ni ejie amɛ kɛjɛ hiɛkpãtãmɔ mli.

²¹ Esa akɛ amɛda Yehowa shi, yɛ esuɔmɔ ni tsakeee kɛ enaakpɛɛnii ni etsuɔ ehãa gbɔmɛi adesai abii lɛ hewɔ.

²² Hã amɛshã shidaa afɔlei, ni amɛkɛ nyamɔ lalai agba enitsumɔi lɛ.

²³ Mɛi komɛi kɛ lɛji yanyiɛ ŋshɔ hiɛ, ni amɛtsu nii yɛ nui wuji lɛ ahiɛ;

²⁴ amɛ amɛna Yehowa nitsumɔi lɛ; amɛna enaakpɛɛnii lɛ yɛ ŋshɔ kwɔŋkwɔŋ lɛ mli.

²⁵ Ejaakɛ lɛ efã ni ehã ahum ni naa wa tswa; ni ehã ŋshɔkei lɛ fee hamahama.

²⁶ Ŋshɔkei lɛ holeɔ amɛhe nɔ kɛyaa ŋwɛi, ni amɛnyɔɔ shi kɛyaa ŋshɔ kwɔŋkwɔŋ lɛŋ, ni amlakui lɛ atsui fãa yɛ amɛmanehulu lɛ mli.

²⁷ Amɛkpaa, ni amɛdidãa tamɔ dãatɔlɔi, ni amɛŋaa fɛɛ laajeɔ amɛ.

²⁸ Ni amɛbolɔ amɛtsɛ Yehowa yɛ amɛfimɔ lɛ mli, ni ejie amɛ kɛjɛ amɛmanehului lɛ amli.

²⁹ Ehã ahum lɛ fɔ̃ɔ tswaa kwraa, ni ŋshɔkei lɛ ŋmɛ dɛŋŋ.

³⁰ Amɛmii shɛ amɛhe ejaakɛ haomɔi lɛ asɛɛ efo, ni ekɛ amɛ eshɛ amɛbele ni amɛshweɔ lɛ mli shweshweeshwe.

³¹ Esa akɛ amɛda Yehowa shi yɛ esuɔmɔ ni tsakeee kɛ enaakpɛɛnii ni etsuɔ ehãa gbɔmɛi adesai abii lɛ hewɔ.

³² Hã amɛkafo lɛ yɛ maŋ asafo lɛŋ, ni amɛ jie eyi yɛ onukpai akpee lɛŋ.

³³ Ehãa fai tsɔ̃mɔɔ shiaŋa; ni ehãa he ni nuhiŋmɛi baa yɛ tsɔ̃ɔ shikpɔŋ gbiŋ.

³⁴ Ehãa shikpɔŋ ni baa nii tsɔ̃ɔ ŋoo shikpɔŋ yɛ mɛi ni hiɔ jɛi lɛ anifeemɔnii hewɔ.

³⁵ Ehãa shiaŋa tsɔ̃ɔ kpaakpo ni ehãa nuhiŋmɛi tueɔ kɛjɛɔ shikpɔŋ gbiŋ mli.

³⁶ Ehãa mɛi ni hɔmɔ yeɔ amɛ lɛ hiɔ jɛi, ni amɛtoɔ maŋ amɛhiɔ mli.

³⁷ Amɛfeɔ ŋmɔji, ni amɛduɔ nii; amɛfeɔ waintromi, ni amɛkpaa nii babaoo.

³⁸ Ejɔɔ amɛ, ni amɛyi faa naakpa; ehãaa amɛtsinai ayifalɛ nɔ agbɔ.

³⁹ Kɛji akɛ yiwalɛ kɛ haomɔ kɛ awerɛho hã amɛnɔ gbɔ, ni aba amɛshi tete lɛ,

⁴⁰ egbeɔ lumɛi ahiɛ, ni ehãa amɛtsomloɔ yɛ shiaŋa ni gbɛ kadimɔ nɔ bɛ nɔ;

⁴¹ shi ejieɔ ohiafoi kɛjɛɔ amanehului amli, ni ehãa amɛshwiei shwereɔ tamɔ tookui.

⁴² Jalɔi naa kɛ amɛhiŋmɛi, ni amɛmii shɛɔ amɛhe, shi efɔŋfeelɔi tɔɔ mu.

⁴³ Hã mɔ fɛɛ mɔ ni ji nilelɔ lɛ ekase nii kɛjɛ enɛɛmɛi amli; Hã amɛsusu Yehowa suɔmɔ ni tsakeee lɛ he.