Lalai 105 - ŊMALƐ KRƆŊKRƆŊ LƐ

Nyɔŋmɔ kɛ ewebii

¹ Oo, nyɛdaa Yehowa shi, Nyɛtsɛa lɛ, nyɛjaa lɛ. Nyɛhãa alea enifeemɔnii lɛ yɛ majimaji lɛ ateŋ.

² Nyɛlaa nyɛhãa lɛ; nyɛlaa nyɛjiea eyi. Nyɛgbaa enaakpɛɛ nitsumɔi lɛ fiaa.

³ Nyɛshwãa nyɛfɔ̃a egbɛi krɔŋkrɔŋ lɛ nɔ. Mɛi ni taoɔ Yehowa sɛɛgbɛ lɛ atsui anyɔ amɛmli.

⁴ Nyɛtaoa Yehowa kɛ ehewalɛ lɛ sɛɛgbɛ; nyɛtaoa ehiɛgbɛ daa.

^5-6 Oo nyɛ, etsulɔ Abraham shwiei, nyɛ Yakobbii ni ehala, nyɛkaia naakpɛɛ nitsumɔi ni etsu lɛ; kɛ kojomɔi ni ekojo lɛ.

⁷ Lɛ ji Yehowa wɔNyɔŋmɔ lɛ, emlai lɛ yɛ hã jeŋ muu fɛɛ.

⁸ Ehiɛ yɛ ekpãŋmɔ lɛ nɔ kɛmiiya naanɔ. Ehiɛ yɛ ewiemɔ ni ekɛ ma shi ehã yinɔi akpe lɛ nɔ;

⁹ kpãŋmɔ ni ekɛ Abraham kpãŋ lɛ, kitã ni ekã Isak lɛ;

¹⁰ kpãŋmɔ ni Yehowa ma nɔ mi ehã Yakob akɛ akpɔ lɛ; nɔ ni ekɛhã Israel hu akɛ naanɔ kpãŋmɔ lɛ.

¹¹ Ekɛɛ akɛ, “Bo maŋɔ Kanaan shikpɔŋ lɛ mahã akɛ nyɛgbɛfaŋnɔ kɛ gboshinii.”

¹² No be mli be ni amɛyi faaa ko, ni amɛyi shɛɛɛ nɔ ko, ni gbɔi ji amɛ yɛ Kanaan shikpɔŋ lɛ nɔ,

¹³ ni amɛtsomlo kɛjɛ maŋ kome nɔ kɛtee maŋ kroko nɔ; kɛjɛ maŋtsɛyelihe kome nɔ kɛtee ekroko mli lɛ.

¹⁴ Yehowa eŋmɛɛɛ mɔ ko mɔ ko gbɛ, ni efee amɛ efɔŋ ko; ni ekã majiatsɛmɛi ahiɛ yɛ amɛhewɔ.

¹⁵ Ekɛɛ akɛ, “Nyɛkataa mimɛi ni mifɔ amɛmu lɛ ahe; ni migbalɔi lɛ hu, nyɛkafea amɛ efɔŋ ko.”

¹⁶ Be ni Yehowa hã hɔmɔ ba shikpɔŋ lɛ nɔ, ni anaaa nii aye lɛ,

¹⁷ etsu nuu ko kɛtsɔ̃ amɛhiɛ, Yosef mɔ ni ahɔ̃ɔ lɛ akɛ nyɔŋ lɛ.

¹⁸ Awo enaji gboklɛ, ni apiŋ lɛ, ni awo ekuɛ dade kɔsɔŋkɔsɔ,

¹⁹ kɛyashi beyinɔ ni ewiemɔ lɛ ba mli, ni Yehowa wiemɔ lɛ ma ewiemɔ lɛ nɔ mi.

²⁰ Ijipt maŋtsɛ lɛ tsu ni ayafɛne lɛ; maji anɔyelɔ lɛ hã eye ehe tswaa.

²¹ Ewo lɛ onukpa yɛ ewe lɛ, ni efee lɛ enibii fɛɛ nɔyelɔ;

²² koni etsɔ̃ɔ maŋtsɛ lɛ lumɛi lɛ nɔ ni sa akɛ amɛfee, ni etsɔ̃ɔ emaŋ onukpai lɛ hu nilee.

²³ Kɛkɛ ni Yakob tee Ijipt, ni eyato gbɔ yɛ Ham shikpɔŋ lɛ nɔ.

²⁴ Ni Yehowa hã Yakobbii lɛ shwere naakpa; ni ehã amɛhe wa hu fe amɛhenyɛlɔi kwraa.

²⁵ Yehowa hã Ijiptbii lɛ nyɛ Yakob webii lɛ, ni amɛkɛ amɛ ye ŋaa mli.

²⁶ Kɛkɛ ni etsu etsulɔ Mose kɛ Aaron, mɛi ni ehala lɛ.

²⁷ Amɛtsu Nyɔŋmɔ naakpɛɛ nitsumɔi lɛ yɛ Ijipt; amɛfee naakpɛɛ nii lɛ yɛ Ijipt shikpɔŋ lɛ nɔ.

²⁸ Nyɔŋmɔ hã duŋ wo, ni shikpɔŋ lɛ nɔ wo duŋ; shi kɛ̃lɛ Ijiptbii lɛ booo efamɔ lɛ toi.

²⁹ Ehã amɛfai amli nui lɛ tsɔ̃ lá, ni amɛmli loi lɛ gboi.

³⁰ Amɛshikpɔŋ lɛ nɔ yi tɔ kɛ kɔkɔdenei; amɛbote amɛmaŋtsɛ we lɛ piai amli tete.

³¹ Nyɔŋmɔ fã, kɛkɛ ni adɔdɔji kɛ ofɔii bayi shikpɔŋ lɛ nɔ tɔ.

³² Ehã nyɔŋmɔŋtɛ nɛ yɛ nu najiaŋ; ni srawa gbala yɛ amɛshikpɔŋ lɛ nɔ hei fɛɛ.

³³ Ekumɔ amɛwaintsei kɛ agbãmitsei lɛ; ekpãtã amɛshikpɔŋ lɛ nɔ tsei fɛɛ ahiɛ.

³⁴ Efã, kɛkɛ ni baalabii kɛ otukpɛi ni aleee amɛyibɔ ba.

³⁵ Amɛye shikpɔŋ lɛ nɔ bai fɛɛ, ni amɛ ye ŋmɔjiashi nii fɛɛ hu.

³⁶ Nyɔŋmɔ kpãtã kromɔbi fɛɛ ni ji amɛhewalɛ fɛɛ shishijee lɛ ahiɛ yɛ Ijipt shikpɔŋ lɛ nɔ.

³⁷ Ni ejie Israelbii lɛ kɛje Ijipt shikpɔŋ lɛ nɔ; ni amɛhiɛ jwiɛtɛi kɛ shika, ni Israelbii lɛ amɛteŋ mɔ fɛɛ mɔ yɛ hewalɛ kpiŋtiŋkpliŋŋ

³⁸ Ijipt nya yɛ amɛjɛijee lɛ hewɔ, ejaakɛ Israelbii lɛ ahe ŋmiŋmi emɔmɔ amɛ.

³⁹ Yehowa lɛɛ atatu mli ekɛha amɛnɔ. Ehã amɛ la ni hã jeŋ tse nyɔɔŋ.

⁴⁰ Amɛbi, ni ehã trakɔkɔi ba; ni ehã amɛ niyenii, babaoo ni jɛ ŋwɛi.

⁴¹ Egbele tɛsaa naa, ni nu tue kɛho; nu lɛ ho kɛnyiɛ shiaŋa lɛ nɔ tamɔ faa.

⁴² Ejaakɛ ekai eshiwoo krɔŋkrɔŋ, ni ewo etsulɔ Abraham lɛ.

⁴³ Hewɔ lɛ ejie emaŋ lɛ kɛje kpo kɛ miishɛɛ, ehalamɔbii lɛ kɛ nyamɔ lala.

⁴⁴ Eŋɔ majimaji lɛ ashikpɔji lɛ ehã amɛ, ni amɛŋɔ mɛi lɛ adeŋmegbomɔ mli nitsumɔnii lɛ amɛfee amɛnɔ,

⁴⁵ bɔ ni afee ni amɛto ekpɔi lɛ ni amɛye nɔ. Nyɛjiea Yehowa yi!