Lalai 104 - ŊMALƐ KRƆŊKRƆŊ LƐ

Bɔlɔ lɛ yijiemɔ

¹ Oo, misusuma, jiemɔ Yehowa yi! Oo Yehowa, miNyɔŋmɔ, oda naakpa! Owula naakpa kɛ woo kɛ agbojee.

² Oha la tamɔ ahaa mama, ni olɛɛ ŋwɛi mli oha shi tamɔ buu.

³ Oma oshĩa lɛ yɛ nui anɔ; oŋɔ atatui okɛfee oshwiilii; otaa kɔɔyɔɔ fiji anɔ okɛsheraa shi.

⁴ Oŋɔɔ kɔɔyɔɔ ofeɔ otsuji; ni oŋɔɔ la kɛ la srɛmi ofeɔ osɔ̃ɔlɔi.

⁵ Oto shikpɔŋ lɛ oma shi shiŋŋ yɛ shishitoo nɔ koni ekahoso kɔkɔɔkɔ.

⁶ Okɛ nu ha he tamɔ mama, ni nu lɛ su gɔji lɛ ayi.

⁷ Oŋa nui lɛ ayi, ni amɛjo foi; oŋwɛi shiimɔ naa lɛ, amɛjo foi oya.

⁸ Gɔji lɛ holeholee amɛhe nɔ, ni jɔi lɛ hu babaa shi kɛtee he ni oto ohã amɛ lɛ.

⁹ Oto husu ohã nui koni amɛkateke ni amɛku amɛsɛɛ amɛbaha shikpɔŋ lɛ nɔ ekoŋŋ.

¹⁰ Ohãa nuhiŋmɛii tueɔ kɛjɛɔ jɔi amli, ni amɛhoɔ yɛ gɔji lɛ ateŋ.

¹¹ Amɛhãa ŋaŋ kooloi fɛɛ nu amɛnuɔ, ni ŋaŋ tejii lɛ kɛgbeɔ amɛkumai.

¹² Loofɔji feɔ amɛtsui yɛ fai lɛ ahe; ni amɛlaa yɛ tsei aniji lɛ ateŋ.

¹³ Ojɛɔ oshihilɛhe ni yɔɔ ŋwɛi shɔŋŋ lɛ, onɛɔ nu oshwieɔ gɔji lɛ anɔ. Onitsumɔi amli yibii lɛ hãa shikpɔŋ lɛ tɔɔ.

¹⁴ Ohãa jwɛi kwɛ̃ɔ hãa kooloi ni tsei kwɛ̃ɔ hãa gbɔmɛi koni niyenii ajɛ shikpɔŋ aba;

¹⁵ kɛ wain ni hãa adesa tsui nyɔɔ emli, kɛ mu ni hãa gbɔmɔ hiɛ kpɛɔ; kɛ aboloo ni hãa gbɔmɔ adesa hewalɛ lɛ.

¹⁶ Lebanon tsei lɛ ni Yehowa diɛŋtsɛ tɛo lɛ, eshwie amɛnɔ nu jogbaŋŋ.

¹⁷ Tsei nɛɛ anɔ loofɔji feɔ amɛtsui yɛ. Gɔ̃dɔ̃i lɛ, sɛsɛoi lɛ amli amɛtsui yɔɔ.

¹⁸ Gɔji somromoi lɛ anɔ ji duji abobaahe; ni afutuɔkɔi anɔ ji tɛsai amli.

¹⁹ Oto nyɔɔŋtsere koni ekadi nyɔji lɛ; hulu hu le eshinyɔɔ be.

²⁰ Ohãa duŋ woɔ, ni je naa; no mli kooŋ kooloi fɛɛ jeɔ kpo.

²¹ Jatabii hũɔ kɛtaoɔ milɛ loo; amɛkɛtaoɔ amɛniyenii kɛjɛɔ Nyɔŋmɔ dɛŋ.

²² Kɛji hulu je lɛ amɛgbalaa amɛhe shi; ni amɛyabumɔɔ amɛwɔɔhei.

²³ Kɛkɛ lɛ gbɔmɔ jeɔ kpo eyaa enitsumɔ, ni eyagboɔ deŋme kɛyashiɔ gbɛkɛ.

²⁴ Oo Yehowa, onitsumɔi lɛ fa naakpa, fɛɛ jɛ onilee mli. Shikpɔŋ lɛ nɔ eyi tɔ kɛ onibɔɔnii sɔŋŋ.

²⁵ Ŋshɔ nɛ, eda, ni elɛɛ tɛtɛrɛɛ; nibii ni anyɛɛɛ akane wamɔɔ yɛ mli, loi bibii kɛ ewuji fɛɛ.

²⁶ Lɛji nyiɛɔ ŋshɔ lɛ hiɛ; emli nɔŋŋ leviatan ni obɔ lɛ shwɛɔ yɛ.

²⁷ Amɛ fɛɛ lɛ bo pɛ gbɛ amɛkwɛɔ, koni ohã amɛ amɛniyenii yɛ be ni sa mli.

²⁸ Ohãa amɛ nii, ni amɛbuaa naa; Ogbeleɔ odɛ̃, ni amɛtɔrɔɔ kɛ nii kpakpai.

²⁹ Kɛ okɛ ohiɛ tee lɛ, amɛhaoɔ, kɛ oŋɔ amɛmumɔ lɛ, amɛgboiɔ; ni amɛkuɔ amɛsɛɛ kɛyaa amɛsu ni amɛjɛ mli lɛŋ ekoŋŋ.

³⁰ Kɛji okɛ omumɔ lɛ wo amɛmli lɛ, wala baa amɛmli; ni wala hee baa shikpɔŋ lɛ nɔ.

³¹ Yehowa anunyam lɛ aaahi shi kɛya naanɔ. Yehowa aaanya enitsumɔi lɛ ahe!

³² Lɛ ji mɔ ni kɛ ekwɛ shikpɔŋ lɛ, shikpɔŋ lɛ hosoɔ, kɛ eta gɔji lɛ ahe lɛ, amɛjeɔ lasu.

³³ Gbii abɔ ni mihiɛ kã nɛɛ, mala mahã Yehowa. Gbii abɔ ni miyɔɔ wala mli nɛɛ, mala majie miNyɔŋmɔ lɛ yi.

³⁴ Miyiŋsusumɔ asa Yehowa hiɛ, ejaakɛ lɛ ehãa minaa miishɛɛ.

³⁵ Hã eshafeelɔi atã yɛ shikpɔŋ lɛ nɔ; ni efɔŋfeelɔi akahi shi dɔŋŋ. Oo misusuma, jiemɔ Yehowa yi! Jiemɔ Yehowa yi!