Lalai 103 - ŊMALƐ KRƆŊKRƆŊ LƐ

Nyɔŋmɔ dɛŋ suɔmɔ

David Lala ko.

¹ Jiemɔ Yehowa yi misusuma, ni nibii fɛɛ ni yɔɔ mimli, nyɛjiea egbɛi krɔŋkrɔŋ lɛ yi.

² Oo, misusuma, jiemɔ Yehowa yi, ni ohiɛ akakpa nibii juji ni efeɔ lɛ fiaa nɔ.

³ Lɛ ji mɔ ni kɛ onishaianii fɛɛ faa; ni etsaa ohelai fiaa kwa lɛ.

⁴ Lɛ ehereɔ oyiwala kɛjeɔ gbonyobu mli, ni ekɛ mlihilɛ kɛ musuŋtsɔlɛ fiɔ bo akekre.

⁵ Lɛ ekɛ nii kpakpai duroɔ bo owalabeiaŋ fɛɛ; ni oblahiiaŋ tsɔ̃ɔ ehee tamɔ okropɔŋ.

⁶ Yehowa kojoɔ, ni eyeɔ jalɛ sane ehãa mɛi ni ayeɔ amɛ amim.

⁷ Lɛ ehã Mose le eyiŋtoi lɛ, ni ehã Israelbii lɛ le enifeemɔnii lɛ.

⁸ Mɔbɔnalɔ kɛ durolɔ ji Yehowa, emli fuuu mra, ni esuɔmɔ ni tsakeee lɛ fa babaoo.

⁹ Jeee be fɛɛ be ekãa mɔ, ni ebɛɛɛ mɔ ewooo emli.

¹⁰ Ekɛ wɔ yeee yɛ wɔhe eshai anaa, ni ewooo wɔ nyɔmɔ yɛ wɔnishaianii lɛ anaa.

¹¹ Shi moŋ, bɔ ni ŋwɛi kwɔ fe shikpɔŋ lɛ, nakai esuɔmɔ ni tsakeee lɛ fa hã mɛi ni sheɔ lɛ gbeyei lɛ.

¹² Bɔ ni bokã kɛ anai teŋ jɛkɛ lɛ, nakai ehãa wɔ kɛ wɔtɔ̃mɔi lɛ ateŋ jekɛɔ.

¹³ Bɔ ni tsɛ musuŋ tsɔ̃ɔ lɛ yɛ ebii ahe lɛ, nakai Yehowa musuŋ tsɔ̃ɔ lɛ yɛ ebii ni sheɔ lɛ gbeyei lɛ ahe.

¹⁴ Ejaakɛ ele wɔsu kɛ wɔbaŋ; ekaiɔ akɛ sũ kɛkɛ ji wɔ.

¹⁵ Gbɔmɔ adesa lɛ, egbii tamɔ jwɛi; efeɔ floŋŋ tamɔ jwɛiiaŋ fɔfɔi.

¹⁶ Kɛji kɔɔyɔɔ tswa nɔ kɛho pɛ, ebɛ dɔŋŋ; ni he ni ema lɛ leee lɛ dɔŋŋ.

¹⁷ Shi Yehowa suɔmɔ ni tsakeee lɛ eyɛ kɛjɛ naanɔ kɛmiiya naanɔ. Eyɛ hã mɛi ni sheɔ lɛ gbeyei lɛ, ni ejalɛ lɛ yɛ hã bii abii.

¹⁸ Eyɛ hã mɛi ni toɔ ekpãŋmɔ lɛ, ni amɛkaiɔ ekitãi lɛ ni amɛyeɔ nɔ lɛ.

¹⁹ Yehowa lɛ, ekɛ emaŋtsɛ sɛi lɛ ma shi shiŋŋ yɛ ŋwɛi; ni lɛ eyeɔ jeŋ fɛɛ nɔ.

²⁰ Oo, nyɛ ebɔfoi ni he wa, ni nyɛyeɔ ewiemɔ lɛ nɔ, ni nyɛboɔ egbee toi, nyɛjiea Yehowa yi!

²¹ Nyɛ etai lɛ fɛɛ kwa, nyɛ esɔ̃ɔlɔi ni feɔ esuɔmɔnaanii, nyɛjiea Yehowa yi!

²² Nyɛ nibii fɛɛ ni Yehowa bɔ ni yɔɔ enɔyelihei lɛ fɛɛ, nyɛjiea Yehowa yi. Oo mikla, jiemɔ Yehowa yi!