Lalai 102 - ŊMALƐ KRƆŊKRƆŊ LƐ

Oblanyo ni ehao sɔlemɔ

Sɔlemɔ kɛha mɔ ko ni efee yeyeeye ni ejaje ehaomɔi lɛ etsɔɔ Yehowa.

¹ Oo, Yehowa, bo misɔlemɔ toi; hã mibolɔmɔ lɛ ashɛ oŋɔɔ.

² Mifimɔ gbi lɛ nɔ lɛ, kaaŋɔ ohiɛ otee mi. Ba otoi shi ohã mi. Gbi nɔ ni mabɔlɔ matsɛ bo lɛ, heremɔ mi nɔ nɔŋŋ.

³ Ejaakɛ migbii lɛ hoɔ yaa tamɔ lasu, ni miwui ahe edɔ tamɔ latɛŋ.

⁴ Mitsui eboo, ni egbi tamɔ jwɛi. Mihiɛ kpaa miniyeli tete po nɔ.

⁵ Mikɛ̃mɔɔ waa; mitã loo kanyakanya.

⁶ Mitsɔ ŋa nɔ patu, mitsɔ̃ tamɔ amaŋfɔ̃i amli patu.

⁷ Mibɛɛɛ mihiŋmɛi nyɔɔŋnyɔɔŋ fɛɛ. Mitsɔ̃ tamɔ loofɔlɔ ni ekome too eyɔɔ tsu yiteŋ.

⁸ Mihenyɛlɔi bɔɔ mi ahora gbi muu fɛɛ. Mɛi ni yeɔ mihe fɛo lɛ kɛ migbɛi lomɔɔ.

⁹ Ejaakɛ lamlu etsɔ̃ miniyenii tamɔ aboloo; ni midãa lɛ mikɛ yaafonu futuɔ mli,

¹⁰ yɛ omlila kɛ omlifu lɛ hewɔ; ejaakɛ owo mi, ni oshɛ mi ofɔ̃.

¹¹ Miwala gbii hoɔ tamɔ gbɛkɛnaashi hɔɔŋ ni migbi tamɔ jwɛi;

¹² shi, bo Yehowa, ooye maŋtsɛ kɛmiiya naanɔ. Ogbɛi lɛ hiɔ shi kɛmiiya yinɔi fɛɛ nɔ.

¹³ Obaate shi, ni obaana Zion mɔbɔ; ejaakɛ omɔbɔnalɛ be nɛ; be ni ato lɛ eshɛ.

¹⁴ Ejaakɛ Zion mli tɛi lɛ ajara wa yɛ otsuji lɛ ahiɛ; ni amɛmusuŋ tsɔ̃ɔ amɛ yɛ bɔ ni etsɔ̃ amaŋfɔ̃ lɛ hewɔ.

¹⁵ Majimaji lɛ aaashe Yehowa gbɛi lɛ gbeyei, ni shikpɔŋ lɛ nɔ maŋtsɛmɛi fɛɛ aaashe onunyam lɛ.

¹⁶ Kɛji Yehowa tswa Zion ema shi ekoŋŋ lɛ, eeepue yɛ enunyam mli.

¹⁷ Eeegboo etoi shi ehã shitswialɔi asɔlemɔ; ni enyaŋeŋ amɛfaikpamɔ lɛ.

¹⁸ Hã aŋma enɛ afɔ shi ahã yinɔbii ni baa lɛ, koni mɛi ni afɔko amɛ tete po ajie Yehowa yi.

¹⁹ Ejaakɛ Yehowa jɛɔ ŋwɛi shɔŋŋ, ehe krɔŋkrɔŋ lɛ, ekwɛɔ shikpɔŋ lɛ.

²⁰ Koni ebo gboklɛfoi lɛ akɛ̃ɛmɔ toi koni ekpɔ̃ mɛi ni abu amɛ gbele fɔ lɛ.

²¹ Bɔ ni afee ni ashiɛ Yehowa gbɛi lɛ yɛ Zion; ni ajie eyi hu yɛ Yerusalɛm;

²² be mli ni majimaji kɛ maŋtsɛyelii aaabuabua amɛhe naa amɛja Yehowa lɛ.

²³ Yehowa egbɔjɔ mi yɛ miblahiaŋ; etse miwala gbii lɛ anɔ.

²⁴ Mikɛɛ akɛ, “Oo miNyɔŋmɔ, Bo mɔ ni oyɔɔ kɛjɛ yinɔ kɛmiiya yinɔi fɛɛ lɛ, kaaŋɔ mi kɛmiiya yɛ miwala be lɛ teŋ tuuŋtu.

²⁵ Blema beebe oto shikpɔŋ lɛ shishi, ni ŋwɛi lɛ, onijianaa nitsumɔ ni.

²⁶ Nomɛi ahiɛ aaakpãtã, shi bo lɛ oyɛ daa. Amɛ fɛɛ amɛaatserɛ tamɔ atade; otsakeɔ amɛ tamɔ mama, ni amɛhoɔ amɛyaa.

²⁷ Shi bo lɛ oyɛ bɔ ni oyɔɔ lɛ nɔŋŋ, ni ofii lɛ bɛ naagbee.

²⁸ Otsuji abii aaahi shi, ni amɛshwiei hu aaahi shi shweshweeshwe yɛ ohiɛ.