Kolosebii 4 - ŊMALƐ KRƆŊKRƆŊ LƐ

¹ Nyɛ nuŋtsɔmɛi lɛ nyɛkɛ nɔ ni ja kɛ nɔ ni sa pɛ ahãa nyɛtsuji lɛ, ni nyɛlea akɛ nyɛ hu nyɛyɛ Nuŋtsɔ yɛ ŋwɛi.

Ŋaawoi

² Nyɛhiɛa sɔlemɔ mli, ni nyɛshia kpe yɛ mli kɛ shidaa.

³ Ni nyɛsaa nyɛsɔlea nyɛhãa wɔ hu, koni Nyɔŋmɔ agbele gbɛ ahã wɔ hã wiemɔ lɛ, ni wɔwie Kristo teemɔ sane lɛ, nɔ hewɔ hu ni mikã kpãa mli nɛɛ.

⁴ Nyɛsɔlea koni majie no shi faŋŋ bɔ ni sa akɛ mawie lɛ.

⁵ Nyɛbaa nyɛjeŋ yɛ nilee mli yɛ mɛi ni yɔɔ sɛɛ lɛ ahiɛ, ni nyɛtsu nyɛbe he nii.

⁶ Nyɛhãa nyɛwiemɔ he abaa nyam daa ni ŋoo ahi mli, ni nyɛle bɔ ni sa akɛ nyɛhãa mɔ fɛɛ mɔ hetoo.

Naagbee ŋamɔi

⁷ Tihiko, ni ji suɔmɔ nyɛmi kɛ anɔkwa sɔ̃ɔlɔ kɛ naanyo tsulɔ yɛ Nuŋtsɔ lɛ mli lɛ, aaagba nyɛ mihe saji fɛɛ.

⁸ Enɛ nɔŋŋ hewɔ mitsu lɛ nyɛŋɔɔ, koni nyɛle bɔ ni wɔyɔɔ, ni eshɛje nyɛmii.

⁹ Mitsu lɛ kɛ Onesimo ni ji anɔkwa kɛ suɔmɔ nyɛmi ni jɛ nyɛteŋ lɛ; amɛaagba nyɛ biɛ saji fɛɛ.

¹⁰ Aristarko, minaanyo gboklɛfonyo lɛ, miibi nyɛ; kɛ Marko ni ji Barnaba nyɛmi bi (mɔ ni miwo nyɛ shi yɛ ehe akɛ nyɛhere lɛ atuu kɛ eba nyɛŋɔɔ lɛ)

¹¹ Yoshua ni atsɛɔ lɛ Yusto lɛ, ni ji mɛi ni jɛ ketiafolɔi lɛ ateŋ lɛ, miibi nyɛ. Mɛnɛɛmɛi pɛ ji minanemɛi nitsulɔi yɛ Nyɔŋmɔ maŋtsɛyeli lɛ gbɛfaŋ ni etsɔ̃mɔ tsuiwoo ehã mi.

¹² Epafra ni jɛ nyɛteŋ ni ji Kristo tsulɔ ni daa nɛɛ ekɛ mɔdɛŋbɔɔ hiɛ sɔlemɔi amli waa kɛhã nyɛ, koni nyɛdamɔ shi akɛ mɛi ni eye emuu ni amɛyimɔ obɔ̃bɔ̃ kɛ Nyɔŋmɔ suɔmɔnaanii fɛɛ feemɔ lɛ, miibi nyɛ.

¹³ Ejaakɛ miiye ehe odase akɛ ebɔɔ mɔdɛŋ naakpa yɛ nyɛ kɛ mɛi ni yɔɔ Laodikea kɛ mɛi ni yɔɔ Hierapoli lɛ ahe.

¹⁴ Luka, tsofatsɛ ni asumɔɔ lɛ kɛ Dema miibi nyɛ.

¹⁵ Wɔmiibi nyɛmimɛi ni yɔɔ Laodikea lɛ, kɛ Nimfa kɛ asafo ni yɔɔ ewe lɛ.

¹⁶ Kɛ akane nɛkɛ wolo nɛɛ yɛ nyɛŋɔɔ lɛ, nyɛhãa akanea yɛ Laodikea asafo lɛ mli hu, ni nyɛ hu nyɛkane nɔ ni jɛ Laodikea lɛ.

¹⁷ Ni nyɛkɛa Arkipo akɛ, “Kwɛmɔ ni ogbe sɔ̃ɔmɔ ni atu awo odɛ̃ŋ yɛ Nuŋtsɔ lɛ mli lɛ naa kwraa!”

¹⁸ Mi Paulo diɛŋtsɛ minine naa bimɔ ni miŋma nɛ. Nyɛkaia mikɔ̃sɔ̃ŋkɔ̃sɔ̃i lɛ! Dromɔ lɛ kɛ nyɛ ahi shi!