Kolosebii 3 - ŊMALƐ KRƆŊKRƆŊ LƐ

Nyɛhia shi yɛ Kristo ni ete shi lɛ hewalɛ mli

¹ No hewɔ lɛ, kɛ atee nyɛ kɛ Kristo shi lɛ, nyɛtaoa nii ni yɔɔ ŋwɛi, he ni Kristo yɔɔ ni eta Nyɔŋmɔ ninejurɔ nɔ yɛ lɛ.

² Nii ni yɔɔ ŋwɛi lɛ ahe nyɛjwɛŋa, jeee nii ni yɔɔ shikpɔŋ lɛ nɔ.

³ Ejaakɛ nyɛgboi, ni akɛ nyɛwala lɛ kɛ Kristo etee yɛ Nyɔŋmɔ mli.

⁴ Be ni Kristo, mɔ ni ji wɔwala lɛ, aaapue lɛ, no lɛ nyɛ hu nyɛkɛ lɛ aaapue yɛ anunyam mli.

Shihilɛ momo lɛ kɛ ehee lɛ

⁵ No hewɔ lɛ, nyɛgbea nyɛhenii ni yɔɔ shikpɔŋ lɛ nɔ lɛ: ajwamãŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ lɛ.

⁶ Enɛɛmɛi ahewɔ ni Nyɔŋmɔ mlifu baa toigbelebii lɛ anɔ lɛ.

⁷ Enɛɛmɛi amli nyɛ hu nyɛnyiɛ sa, be ni nyɛhi shi yɛ mli lɛ.

⁸ Shi agbɛnɛ lɛ nyɛ hu nyɛshɛrɛa nibii nɛɛ fɛɛ nyɛshwiea: mlifu, mlila kɛ shwee ni ashweɔ mɔ efɔŋ, kɛ oshekuyeli kɛ hiɛgbejiawiemɔ ni jɛɔ nyɛdaaŋ.

⁹ Nyɛkamalemalea nyɛtsɔ̃a nyɛhe, ejaakɛ nyɛjie gbɔmɔ momo lɛ kɛ enitsumɔi lɛ yɛ nyɛhe,

¹⁰ ni nyɛwo gbɔmɔ hee ni aafee lɛ ehee yɛ ebɔlɔ lɛ subaŋ nɔ, koni ele lɛ anɔkwale mli lɛ.

¹¹ Enɛ mli lɛ Helanyo kɛ Yudanyo, ketiafolɔ kɛ foolɔ, gbɔ, Sikitianyo, nyɔŋ kɛ odehe ko bɛ dɔŋŋ, shi moŋ Kristo ji nii fiaa yɛ mɛi fɛɛ mli.

¹² No hewɔ lɛ, akɛni Nyɔŋmɔ halamɔbii, mɛi krɔŋkrɔŋi kɛ suɔmɔ mɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, kpoofeemɔ, tsuishitoo.

¹³ Ni kɛji mɔ ko kɛ mɔ ko na sane ko lɛ, nyɛnanaa nyɛhãa nyɛhe ni nyɛkɛfafaa nyɛhe; tamɔ bɔ ni Kristo hu kɛfa nyɛ lɛ, nakai nyɛ hu nyɛfea.

¹⁴ Shi enɛɛmɛi fɛɛ sɛɛ lɛ nyɛwoa suɔmɔ ni ji kpãa ni fiɔ nibii fɛɛ feɔ lɛ ekome ni ehãa eyeɔ emuu lɛ.

¹⁵ Ni nyɛhãa Kristo hejɔlɛ lɛ ayea lumɔ yɛ nyɛtsuii amli; nɔ he ni atsɛ nyɛ kɛba yɛ gbɔmɔtso kome mli lɛ. Ni nyɛlea shidaa.

¹⁶ Nyɛhãa Kristo wiemɔ lɛ ahia nyɛmli babaoo; ni nyɛkɛ nilee fɛɛ atsɔ̃a nyɛhe nii ni nyɛwiea nyɛtsɔ̃a nyɛhe yɛ saŋkutswai kɛ yijiemɔ lalai kɛ mumɔŋ lalai amli, ni nyɛkɛ shidaa alaa yɛ nyɛtsuii amli nyɛhãa Nyɔŋmɔ.

¹⁷ Ni nɔ fɛɛ nɔ ni nyɛfeɔ yɛ wiemɔ loo nitsumɔ gbɛfaŋ lɛ, nyɛfea fɛɛ yɛ Yesu Kristo gbɛi mli, ni nyɛtsɔ̃a enɔ nyɛdaa Nyɔŋmɔ ni ji Tsɛ lɛ shi.

Kristofoi ashĩa mli shihilɛ

¹⁸ Nyɛ yeigbãyei lɛ, nyɛbaa nyɛhe shi nyɛhãa nyɛwumɛi, tamɔ bɔ ni sa yɛ Nuŋtsɔ lɛ mli lɛ.

¹⁹ Nyɛ wumɛi lɛ, nyɛsumɔa nyɛŋamɛi, ni nyɛmli akajoa yɛ amɛnɔ.

²⁰ Nyɛ bii lɛ, nyɛboa nyɛfɔlɔi atoi yɛ nibii fɛɛ gbɛfaŋ; ejaakɛ no sa Nuŋtsɔ lɛ hiɛ.

²¹ Nyɛ tsɛmɛi lɛ, nyɛkawoa nyɛbii amli la, koni amɛnijiaŋ akaje wui.

²² Nyɛ tsuji lɛ, nyɛboa nyɛheloo gbɛfaŋ nuŋtsɔmɛi lɛ atoi yɛ nibii fɛɛ mli, jeee kɛ hiɛiaŋhiɛiaŋ sɔ̃ɔmɔ, tamɔ mɛi ni taoɔ gbɔmɛi ahiɛ amɛsa, shi moŋ yɛ tsui krɔŋŋ mli akɛ mɛi ni sheɔ Nuŋtsɔ lɛ gbeyei.

²³ Ni nɔ fɛɛ nɔ ni nyɛfeɔ lɛ, nyɛjiea nyɛmusuŋ nyɛtsua, tamɔ akɛ Nuŋtsɔ lɛ nyɛtsuɔ nyɛhã ni jeee gbɔmɛi,

²⁴ ni nyɛle akɛ Nuŋtsɔ lɛ dɛŋ nyɛnine baashɛ gboshinii lɛ anɔ yɛ akɛ nyɛnyɔmɔwoo. Ejaakɛ Nuŋtsɔ Kristo nyɛsɔ̃mɔɔ.

²⁵ Shi mɔ ni feɔ nii ni ejaaa gbɛ lɛ, nii ni ejaaa gbɛ nɔŋŋ he nyɔmɔwoo eeena, ni hiɛiaŋkwɛmɔ ko bɛŋ.