Kolosebii 2 - ŊMALƐ KRƆŊKRƆŊ LƐ

Nyɛkaŋmɛa gbɛ ni mɔ ko hã nyɛ hemɔkɛyeli lɛ gbugbãa

¹ Ejaakɛ miisumɔ akɛ nyɛle nɔ pelemɔ ni mli wa ni mipeleɔ yɛ nyɛ kɛ mɛi ni yɔɔ Laodikea kɛ mɛi abɔ ni enako mi hiɛ kɛ hiɛ lɛ ahewɔ.

² Miifee enɛ koni amɛtsɛ amɛtsui amɛŋmɛ amɛmli ni amɛfee ekome yɛ suɔmɔ mli ni amɛna hewalɛ falɛ fɛɛ ni anaa kɛjɛɔ niiashishinumɔ mli lɛ ni amɛle Nyɔŋmɔ teemɔ sane lɛ ni ji Kristo.

³ Mɔ mli ni akɛ ŋaa kɛ nilee jwetrii lɛ fɛɛ etee yɛ lɛ.

⁴ Shi miikɛɛ enɛ, koni mɔ ko kɛ naadɔkɔmɔ wiemɔ ko akashishiu nyɛ.

⁵ Ejaakɛ kɛ mikɛ nyɛ bɛ yɛ gbɔmɔtso mli po, mumɔ gbɛfaŋ lɛ mikɛ nyɛ yɛ, ni mimii shɛɔ kɛ mikwɛ bɔ ni nyɛdamɔ shi pɛpɛɛpɛ kɛ nyɛ Kristo nɔ hemɔkɛyeli lɛ shifimɔ lɛ.

Nyɛyia obɔ̃ kɛ Kristo wala

⁶ No hewɔ lɛ, bɔ ni nyɛhere Kristo Yesu, Nuŋtsɔ lɛ atuu lɛ, nyɛnyiɛa yɛ emli.

⁷ Ni nyɛshishifã amɔ̃ shi ni atswa nyɛ ama enɔ ni nyɛfi shi yɛ hemɔkɛyeli lɛ mli, tamɔ bɔ ni atsɔ̃ɔ nyɛ lɛ ni nyɛteke nɔ kɛ shidaa.

⁸ Nyɛkwɛa nyɛhe ni ahĩa, koni mɔ ko kɛ jeŋ nilee kɛ yaka shishiumɔ ni damɔ gbɔmɛi ablema tsɔ̃ɔmɔ kɛ je nɛɛŋ shishijee nibii anɔ, shi jeee Kristo nɔ lɛ, akaŋɔ nyɛ nom.

⁹ Ejaakɛ Kristo mli Nyɔŋmɔ su muu lɛ fɛɛ hiɔ yɛ gbɔmɔtso su mli;

¹⁰ ni nyɛye emuu yɛ emli, lɛ mɔ ni ji onukpayeli kɛ hegbɛ fɛɛ yitso lɛ.

¹¹ Lɛ emli afolɔ nyɛ ketia hu yɛ, jeee ketia ni akɛ nine fo, shi moŋ ketiafoo ni ji heloo gbɔmɔtso lɛ jiemɔ yɛ Kristo ketiafoo lɛ mli.

¹² Ejaakɛ afu nyɛ kɛ lɛ yɛ baptisimɔ lɛ mli; ni emli hu atee nyɛ shi yɛ yɛ Nyɔŋmɔ ni tee lɛ shi kɛjɛ gbohii ateŋ lɛ hewalɛ lɛ nɔ hemɔkɛyeli naa.

¹³ Ni nyɛ ni nyɛ ji gbohii yɛ nyɛnɔtɔ̃mɔi lɛ kɛ nyɛheloofoo lɛ mli lɛ, ehã nyɛ kɛ lɛ fɛɛ wala, ni ekɛ nyɛnɔtɔ̃mɔi lɛ fɛɛ efa nyɛ.

¹⁴ Ni egbe wɔnyɔmɔ ni wɔhiɛ ni aŋma kɛ ekpɔi lɛ, ni ejie kɛtee, ni ekala ekpɛtɛ sɛŋmɔtso lɛ he.

¹⁵ Ni ekpɔlɔ onukpayelii kɛ hewalɛi lɛ ahe nii, ni ebɔ amɛ ahora faŋŋ, ni enyã yɛ amɛnɔ.

¹⁶ No hewɔ lɛ, nyɛkahãa mɔ ko miikojoa nyɛ yɛ niyeli loo ninumɔ loo gbii juji loo nyɔji hei loo hejɔɔmɔ gbii agbɛfaŋ,

¹⁷ ejaakɛ nii ni baaba lɛ asusuma kɛkɛ ni, shi nii lɛ diɛŋtsɛ ji Kristo.

¹⁸ Nyɛkahãa mɔ ko kɛ taomɔ ni etaoɔ akɛ nyɛkɛ heshibaa jwɛŋmɔ aja ŋwɛi bɔfoi miishɔ̃ nyɛjuromɔnii lɛ yɛ nyɛdɛŋ. Gbɔmɔ ni tamɔ nɛkɛ lɛ, nɔ nɔ ni edamɔ ji ninai, ni eheloo jwɛŋmɔ lɛ hãa ewoɔ ehe nɔ efolo,

¹⁹ ni ehiɛɛɛ Kristo ni ji yitso lɛ mli, mɔ mli ni gbɔmɔtso lɛ fɛɛ tsɔ̃ɔ talɔi kɛ fai lɛ anɔ enaa nii ni hiaa lɛ kɛjeɔ ni emɔmɔ̃ɔ ehe kɛshimɔ̃ɔ ehe nɔ kɛdaa bɔ ni Nyɔŋmɔ taoɔ lɛ.

²⁰ No hewɔ lɛ, kɛ nyɛkɛ Kristo egbo ni je nɛɛŋ shishijeenii bɛ nyɛnɔ hewalɛ dɔŋŋ lɛ, mɛɛba mɔ ni nyɛhiɔ shi tamɔ nɔ ni nyɛhiɛ kamɔ̃ lolo yɛ je nɛɛŋ, ni nyɛhãa awoɔ nyɛ akpɔi akɛ,

²¹ “Kaamɔ mli, ni kaasa onaa, ni kaata he tete” lɛ?

²² Enɛɛmɛi fɛɛ ji nibii ni hiɛ kpãtãa yɛ amɛhe nitsumɔ mli; amɛ ji akpɔi ni awo yɛ gbɔmɛi akitãi kɛ tsɔ̃ɔmɔi anaa.

²³ Suɔmɔnaa jamɔ kɛ heshibaa jwɛŋmɔ kɛ gbɔmɔtso yiwaa hãa nibii nɛɛ feɔ tamɔ nɔ ni nilee yɛ mli nɛ, shi yɛ heloo akɔnɔ naatsii gbɛfaŋ lɛ, ehe bɛ sɛɛnamɔ.