Kolosebii 1 - ŊMALƐ KRƆŊKRƆŊ LƐ

Ŋamɔ

¹ Paulo ni ji Yesu Kristo bɔfo yɛ Nyɔŋmɔ suɔmɔ naa kɛ wɔnyɛmi Timoteo

² ŋma yahã nyɛmimɛi hetselɔi kɛ heyelɔi yɛ Kristo mli ni yɔɔ Kolose lɛ. Dromɔ kɛ hejɔlɛ ni jɛ wɔTsɛ Nyɔŋmɔ lɛ dɛŋ lɛ ahã nyɛ.

Shidaa sɔlemɔ

³ Wɔdaa Nyɔŋmɔ ni ji wɔNuŋtsɔ Yesu Kristo Tsɛ lɛ shi yɛ nyɛhewɔ daa nɛɛ yɛ wɔsɔlemɔi amli.

⁴ Ejaakɛ wɔnu nyɛKristo Yesu nɔ hemɔkɛyeli kɛ nyɛsuɔmɔ ni nyɛkɛ sumɔɔ hetselɔi lɛ fɛɛ he

⁵ yɛ hiɛnɔkãmɔ ni akɛto ahã nyɛ yɛ ŋwɛi lɛ hewɔ lɛ. Nyɛnu enɛ momo yɛ Sanekpakpa lɛ anɔkwale wiemɔ lɛ mli.

⁶ Sanekpakpa lɛ eshɛ nyɛŋɔɔ tamɔ bɔ nɔŋŋ ni eyɔɔ yɛ jeŋ muu lɛ fɛɛ mli, ni eewo yibii ni eeshwere, tamɔ bɔ ni efeɔ yɛ nyɛ hu nyɛteŋ kɛjɛ gbi nɔ ni nyɛnu ni nyɛna nyɛle Nyɔŋmɔ dromɔ lɛ yɛ anɔkwale mli lɛ.

⁷ Nyɛkase enɛ yɛ Epafra, wɔnaanyo tsulɔ ni wɔsumɔɔ, ni ji Kristo anɔkwa sɔ̃ɔlɔ hã nyɛ lɛ naa.

⁸ Lɛ ebagba wɔ nyɛsuɔmɔ ni Mumɔ lɛ kɛwoɔ nyɛmli lɛ he sane.

⁹ Enɛ hewɔ lɛ, wɔ hu, kɛjɛ gbi nɔ ni wɔnu lɛ, wɔfɔ̃ko sɔlemɔ kɛ faikpamɔ kɛ nyɛ hãmɔ, koni nyɛyimɔ obɔ̃bɔ̃ kɛ esuɔmɔnaanii alee yɛ mumɔŋ nilee kɛ shishinumɔ fɛɛ mli.

¹⁰ Koni nyɛnyiɛ bɔ ni sa Nuŋtsɔ lɛ ni asa ehiɛ kwraa ni nyɛwo yibii yɛ nitsumɔ kpakpa fɛɛ nitsumɔ kpakpa mli. Enɛ ahã nyɛshwere yɛ Nyɔŋmɔ he nilee mli

¹¹ ni awaje nyɛ kɛ hewalɛ fɛɛ yɛ enunyam nyɛmɔ lɛ naa. No ahã nyɛnyɛ nyɛmia nyɛhiɛ ni nyɛto nyɛtsui shi kɛ miishɛɛ yɛ nɔ fɛɛ nɔ mli.

¹² Ni nyɛdaa Tsɛ lɛ shi, mɔ ni hã wɔfee mɛi ni sa krɔŋkrɔŋbii ni yɔɔ la lɛ mli lɛ agboshinii lɛ eko yeli.

¹³ Ni ejie wɔ kɛjɛ duŋ hewalɛ lɛ mli kɛtee esuɔmɔ Bi lɛ maŋtsɛyeli lɛ mli lɛ;

¹⁴ lɛ emli wɔna kpɔ̃mɔ lɛ ni ji wɔhe eshai faa lɛ yɛ.

Nyɔŋmɔ su ni Kristo hiɛ kɛ enitsumɔ

¹⁵ Kristo ji Nyɔŋmɔ ni anaaa lɛ subaŋ, lɛ enɔ atsɔ abɔ nii fɛɛ.

¹⁶ Ejaakɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ, nii ni anaa kɛ nii ni anaaa, maŋtsɛ sɛii jio, nɔyelii jio, onukpayelii jio, hegbɛi jio, nii lɛ fɛɛ lɛ, enɔ atsɔ̃ abɔ, ni lɛ nɔŋŋ abɔ ahã.

¹⁷ Eyɛ dani nii fiaa yɔɔ, ni emli nii fiaa yɔɔ.

¹⁸ Ni lɛ ji gbɔmɔtso lɛ ni ji asafo lɛ yitso, lɛ ji shishijee lɛ, gbohii ateŋ kromɔbi lɛ, bɔ ni afee ni efee klɛŋklɛŋ mɔ yɛ nii fiaa mli.

¹⁹ Ejaakɛ Nyɔŋmɔ sumɔ akɛ lɛ Nyɔŋmɔ lɛ diɛŋtsɛ esu muu lɛ fɛɛ ahi emli.

²⁰ Nyɔŋmɔ tsɔ̃ esɛŋmɔtso nɔ lá lɛ nɔ ekɛ hejɔlɛ ba, ni etsɔ̃ enɔ ekɛ nibii fɛɛ kpãtã, nii ni yɔɔ shikpɔŋ lɛ nɔ kɛ nii ni yɔɔ ŋwɛi lɛ.

²¹ Nyɛ ni sa ni yɛ nyɛjwɛŋmɔ kɛ nyɛnitsumɔi fɔ̃ji ahewɔ lɛ mɛi kpɔ̃ji kɛ henyɛlɔi ji nyɛ.

²² Agbɛnɛ ekɛ egbɔmɔtso lɛ etsɔ̃ gbele nɔ ekpãtã nyɛ ni ekɛ nyɛ edamɔ shi akɛ mɛi krɔŋkrɔŋi ni he bɛ kpa ko ni sane ko bɛ amɛhe yɛ ehiɛ.

²³ Shi esa ni nyɛhiɛ hemɔkɛyeli lɛ mli ni nyɛdamɔ shi shiŋŋ yɛ shishitoo lɛ nɔ, ni nyɛkatsi nyɛhe kɛjɛ Sanekpakpa lɛ hiɛnɔkãmɔ lɛ he, Sanekpakpa lɛ ni nyɛnu ni ashiɛɔ atsɔ̃ɔ bɔɔnii fɛɛ ni yɔɔ ŋwɛi shishi, ni mi Paulo misɔ̃mɔɔ yɛ he lɛ.

Sɔ̃ɔmɔ nitsumɔ ni Paulo tsu hã Kristo Asafo lɛ

²⁴ Agbɛnɛ mimii shɛɔ yɛ mimanehului ni minaa yɛ nyɛhewɔ lɛ amli, ni mikɛ miheloo naa Kristo amanehului ni shwɛ lɛ mikɛwoɔ amɛ obɔ̃ hã egbɔmɔtso ni ji esafo lɛ.

²⁵ Ni mitsɔ̃ esafo lɛ sɔ̃ɔlɔ yɛ nitsumɔ ni Nyɔŋmɔ etu ewo midɛŋ yɛ nyɛhewɔ lɛ naa, akɛ mashiɛ Nyɔŋmɔ wiemɔ lɛ kɛwula shi lɛ.

²⁶ Enɛ ji teemɔ sane ni akɛtee kɛjɛ teteete kɛ yinɔi lɛ anɔ lɛ, shi agbɛnɛ lɛ ajie lɛ kpo atsɔ̃ɔ emɛi krɔŋkrɔŋi lɛ.

²⁷ Ni Nyɔŋmɔ sumɔ akɛ ahã amɛle nɔ ni ji nɛkɛ teemɔ sane nɛɛ anunyam falɛ lɛ yɛ jeŋmaji lɛ ateŋ. Teemɔ sane nɛɛ ji akɛ Kristo yɛ nyɛmli koni nyɛna anunyam lɛ hiɛnɔkãmɔ lɛ.

²⁸ Lɛ ehe sane wɔjajeɔ, ni wɔwoɔ gbɔmɔ fɛɛ gbɔmɔ ŋaa, ni wɔtsɔ̃ɔ gbɔmɔ fɛɛ gbɔmɔ nilee nɛɛ fɛɛ, koni wɔkɛ gbɔmɔ fɛɛ gbɔmɔ adamɔ shi akɛ mɔ ni eye emuu yɛ Kristo mli.

²⁹ No he deŋme migboɔ ni mipeleɔ yɛ ehewalɛ ni tsuɔ nii kɛ hewalɛ yɛ mimli lɛ naa.