Kojolɔi 7 - ŊMALƐ KRƆŊKRƆŊ LƐ

Gideon ye Midianbii anɔ kunim

¹ Kɛkɛ ni Yerubaal ni ji Gideon lɛ kɛ maŋ lɛ fɛɛ ni fata ehe lɛ te shi leebi maaŋkpa, ni amɛyato shi yɛ Harod nubu lɛ naa. Midianbii atabilɔi lɛ jwere jɔɔ lɛ ni kã More gɔŋkpɔ lɛ kooyigbɛ lɛ mli.

² Yehowa kɛɛ Gideon akɛ, “Mɛi ni fata ohe lɛ ayi fa tsɔ̃ hã mi bɔ ni matsɔ̃ amɛnɔ mahã oye Midianbii lɛ anɔ kunim, koni Israel akabashwã etsɔ̃ɔ mi akɛ, ‘Mi diɛŋtsɛ mihewalɛ mikɛhere miyiwala.’

³ No hewɔ lɛ, agbɛnɛ, hã ashiɛ yɛ maŋ lɛ toiŋ akɛ, ‘Mɔ fɛɛ mɔ ni sheɔ gbeyei ni ŋmiŋmi emɔ lɛ lɛ eku esɛɛ eya shĩa.’ ” Gideon ka amɛ ekwɛ ni mɛi akpei nyɔŋmai enyɔ kɛ enyɔ ku amɛsɛɛ, ni mɛi akpei nyɔŋma hi shi.

⁴ Kɛkɛ ni Yehowa kɛɛ Gideon akɛ, “Mɛi lɛ ayi fa tsɔ̃ lolo. Okɛ amɛ akpeleke shi kɛya nu lɛ he, ni maka amɛ yɛ jɛi mahã bo. Mɔ ni makɛɛ bo yɛ ehe akɛ, ‘Okɛ mɔnɛ akaya lɛ,’ okɛ lɛ akaya.”

⁵ Kɛkɛ ni Gideon kɛ mɛi lɛ kpeleke shi kɛtee nu lɛ he. Yehowa kɛɛ Gideon akɛ, “Mɔ fɛɛ mɔ ni kɛ elilɛi aaalɛmɔ nu lɛ tamɔ gbei lɛmɔɔ nu lɛ, akɛ lɛ adamɔ afã; ni nakai nɔŋŋ ofee mɔ fɛɛ mɔ ni aaakula enakutsei anaa ni eeenu nu lɛ.”

⁶ Mɛi ni kɛ amɛnine to amɛnaa ni amɛlɛmɔ lɛ fɛɛ ayibɔ ji mɛi ohai etɛ̃; shi mɛi ni eshwɛ lɛ fɛɛ kula amɛnakutsei anaa amɛnu nu lɛ.

⁷ Kɛkɛ ni Yehowa kɛɛ Gideon akɛ, “Hii ohai etɛ̃ ni lɛmɔ nu lɛ mikɛaahere nyɛ, ni mahã nyɛye Midian nɔ kunim; shi mɛi ni eshwɛ lɛ fɛɛ aya; mɔ fɛɛ mɔ aya eshĩa.”

⁸ No hewɔ lɛ, Gideon he nu kpuji lɛ kɛ tɛtɛrɛmantɛrɛi lɛ yɛ mɛi ni hiɛ lɛ adɛŋ. Ewo amɛteŋ mɔ fɛɛ mɔ gbɛ kɛtee ebuu mli; shi ehã hii ohai etɛ̃ lɛ hi shi. Midian nsra lɛ yɛ Gideon shishigbɛ yɛ jɔɔ lɛ mli.

⁹ Nakai nyɔɔŋ lɛ mli nɔŋŋ lɛ, Yehowa kɛɛ Gideon akɛ, “Tee shi ni okpeleke shi oyatua Midian nsra lɛ, ejaakɛ mibahã oye amɛnɔ kunim.

¹⁰ Shi kɛji ooshe gbeyei akɛ oooyatua amɛ lɛ, no lɛ, kɛ otsulɔ Pura akpeleke shi kɛya nsra lɛ mli,

¹¹ koni oyabo nii ni amɛwieɔ lɛ toi; kɛkɛ lɛ no sɛɛ lɛ ooona ekãa kɛkpeleke shi kɛyatua nsra lɛ.” Kɛkɛ ni Gideon kɛ etsulɔ Pura kpeleke shi kɛtee tabilɔi ni yɔɔ nsra lɛŋ lɛ amasɛi kpaakpa.

¹² Shi Midianbii lɛ kɛ Amalekbii kɛ bokãgbɛbii lɛ fɛɛ bua jɔɔ lɛ mli babaoo tamɔ baalabii. Amɛyoomai lɛ aleee amɛyibɔ; amɛyifalɛ tamɔ ŋshɔnaa shia.

¹³ Be ni Gideon shɛ jɛi lɛ, naa mɔ ko ni eegba enaanyo ko lamɔ ni ela. Mɔ ni gbaa lɛ kɛɛ: “Naa, mila lamɔ ko. Mila ni aboloo akwaabɔ ko koklo kɛba Midian nsra lɛ mli kɛbanina buu ko. Ebatswa buu lɛ, ni etoo lɛ ebu shi, ni buu lɛ butu kwraa eshwie shi.”

¹⁴ Enaanyo lɛ to he hã lɛ akɛ, “Enɛ lɛ jeee nɔ ko nɔ ko ni, Yoash, Israelnyo lɛ, bi Gideon lɛ klante lɛ ni. Nyɔŋmɔ eto akɛ Gideon aye Midian ta lɛ fɛɛ nɔ kunim.”

¹⁵ Be ni Gideon nu lamɔ ni agba lɛ kɛ eshishitsɔ̃ɔmɔ lɛ, eho ekula shi ni esɔle. Kɛkɛ ni eku esɛɛ kɛtee Israelbii lɛ nsra lɛ mli, ni ekɛɛ amɛ akɛ, “Nyɛtea shi, ejaakɛ Yehowa eto akɛ nyɛbaaye Midian ta lɛ fɛɛ nɔ kunim.”

¹⁶ Eja hii ohai etɛ̃ lɛ mli kui etɛ, ni ekɛ tɛtɛrɛmantɛrɛ kɛ kpulu ni kɔti hɔ mli hã mɔ fɛɛ mɔ hiɛ edɛŋ.

¹⁷ Ekɛɛ amɛ akɛ, “Nyɛkwɛa mi ni nyɛfea bɔ ni mafee lɛ. Kɛ miyashɛ nsra lɛ naa lɛ, bɔ ni mafee lɛ, nyɛ hu nyɛfea nakai nɔŋŋ.

¹⁸ Kɛ mikɛ mɛi ni fata mihe lɛ kpã tɛtɛrɛmantɛrɛ lɛ, no lɛ nyɛ hu nyɛkpãa tɛtɛrɛmantɛrɛi lɛ kɛbɔlea Midian nsra lɛ fɛɛ, ni nyɛbɔa oshe nyɛkɛa akɛ, ‘Kɛhã Yehowa kɛ Gideon!’ ”

¹⁹ Gideon kɛ hii oha ni fata ehe lɛ yashɛ Midian nsra lɛ naa nyɔɔŋteŋ buube lɛ shishijee mli be ni amɛtsake bulɔi lɛ sɛɛ pɛ. Kɛkɛ ni Gideon kɛ ewebii lɛ kpã tɛtɛrɛmantɛrɛi lɛ, ni amɛjwara kpuji ni amɛhiɛ yɛ amɛdɛŋ lɛ.

²⁰ Agbɛnɛ kui etɛ̃ lɛ fɛɛ kpãkpãa tɛtɛrɛmantɛrɛi lɛ, ni amɛjwara kpuji lɛ. Amɛhiɛ kɔtii lɛ yɛ amɛbɛku kɛ tɛtɛrɛmantɛrɛi lɛ yɛ amɛninejurɔ. Amɛkpã tɛtɛrɛmantɛrɛi lɛ, ni amɛbɔ oshe akɛ, “Yehowa kɛ Gideon klante!”

²¹ Mɔ fɛɛ mɔ damɔ egbɛhe kɛbɔle Midian nsra lɛ kpula. Midian ta lɛ bu, ni amɛjo foi kɛ blɔmɔ.

²² Be ni akpã tɛtɛrɛmantɛrɛi ohai etɛ̃ lɛ, Yehowa hã Midianbii lɛ ateŋ mɔ fɛɛ mɔ dɔ eklante eto enyɛmi nɔ yɛ nsra muu lɛ fɛɛ mli. Kɛkɛ ni Midian ta muu lɛ fɛɛ jo foi kɛtee Bet-Shita ni yɔɔ kɛyaa Zerera gbɛ lɛ, kɛtee Abel-Mehola ni yɔɔ Tabat masɛi lɛ tɔ̃ɔ.

²³ Ayatsɛ Israel hii lɛ kɛjɛ Naftali kɛ Asher kɛ Manase fɛɛ, ni amɛtiu Midianbii lɛ.

²⁴ Agbɛnɛ Gideon tsu mɛi kɛtee Efraim gɔji lɛ anɔ fɛɛ ayakɛɛ akɛ, “Nyɛkpelekea shi ni nyɛkɛ Midianbii lɛ abakpea. Nyɛtsimɔa faafoohei gbɛi lɛ kɛyashia Bet-Bara kɛ Yordan naa.” No hewɔ lɛ, ayakpee Efraim hii lɛ fɛɛ kɛba, ni amɛtsimɔ gbɛi ni akɛyaa fai lɛ anaa kɛyashi Bet-Bara kɛ Yordan naa.

²⁵ Amɛmɔmɔ Oreb kɛ Zeeb, Midian lumɛi enyɔ lɛ. Amɛgbe Oreb yɛ Oreb tɛsaa lɛ he, ni amɛgbe Zeeb yɛ Zeeb wain bu lɛ he. Amɛnyiɛ Midianbii lɛ asɛɛ, ni amɛkɛ Oreb kɛ Zeeb yitsei lɛ bahã Gideon yɛ Yordan faa lɛ sɛɛ.