Kojolɔi 6 - ŊMALƐ KRƆŊKRƆŊ LƐ

Gideon

¹ Israelbii lɛ fee efɔŋ amɛshi Yehowa. No hewɔ lɛ, ehã Midianbii ye Israelbii lɛ anɔ afii kpawo.

² Midianbii lɛ anineshi wa naakpa yɛ Israelbii lɛ anɔ. Midianbii lɛ ahewɔ lɛ, Israelbii lɛ tao bui yɛ gɔji lɛ anɔ, kɛ tɛkploi kɛ mɔji amɛhã amɛhe.

³ Kɛji Israelbii lɛ du nii lɛ, kɛkɛ lɛ Midianbii kɛ Amalekbii kɛ bokãgbɛbii lɛ efã kɛbatua amɛ.

⁴ Amɛbɔɔ nsra amɛwoɔ Israelbii lɛ, ni amɛfiteɔ shikpɔŋ lɛ nɔ nibaanii lɛ kɛyashiɔ Gaza kpokpai anɔ tɔ̃ɔ. Amɛshiii niyenii ko aloo too loo tsina loo teji yɛ Israel.

⁵ Ejaakɛ amɛbaa kɛ amɛkooloi kɛ amɛbuui. Amɛbaa babaoo tamɔ baalabii; ni amɛ kɛ amɛyoomai lɛ fɛɛ lɛ anyɛɛɛ akane. Amɛbaa shikpɔŋ lɛ nɔ amɛbakpãtãa hiɛ.

⁶ Midianbii lɛ hã Israelbii lɛ ahewalɛ nɔ gbɔ kwraa. Kɛkɛ ni Israelbii lɛ bolɔ amɛtsɛ Yehowa.

⁷ Be ni amɛbolɔɔ amɛtsɛɔ Yehowa yɛ Midianbii lɛ ahewɔ lɛ,

⁸ Yehowa tsu gbalɔ ko kɛba maŋbii lɛ aŋɔɔ, ni ebakɛɛ amɛ akɛ, “Bɔ ni Yehowa, Israel Nyɔŋmɔ lɛ, kɛɛ nɛ, ‘Miŋɔ nyɛ kɛjɛ Ijipt kɛba, ni mijie nyɛ kɛjɛ nyɔŋyeli mli.

⁹ Ni mijie nyɛ kɛjɛ Ijiptbii lɛ adɛŋ kɛ mɛi fɛɛ ni waa nyɛ yi lɛ adɛŋ; ni mishwie amɛ yɛ nyɛhiɛ, ni miŋɔ amɛshikpɔŋ lɛ mihã nyɛ.

¹⁰ Mikɛɛ nyɛ akɛ mi ji Yehowa nyɛNyɔŋmɔ lɛ, shi nyɛkashea Amorbii ni yɔɔ amɛshikpɔŋ lɛ nɔ lɛ anyɔŋmɔi lɛ agbeyei.’ Shi nyɛbooo migbee toi.”

¹¹ Agbɛnɛ Yehowa bɔfo lɛ ba ebata Yoash, Abiezernyo lɛ, blɔfo yɔɔyitso ni yɔɔ Ofra lɛ shishi. Nakai be lɛ, Yoash bi Gideon lɛ miigbee ŋmãa yɛ wainbu mli, bɔ ni afee ni Midianbii lɛ akana.

¹² Kɛkɛ ni Yehowa bɔfo lɛ jie ehe kpo etsɔ̃ɔ Gideon ni ekɛɛ lɛ akɛ, “Bo nuu kãkãlɔ, Yehowa kɛ bo yɛ.”

¹³ Gideon kɛɛ bɔfo lɛ akɛ, “Ofainɛ, minuŋtsɔ, kɛ Yehowa kɛ wɔ yɛ lɛ, mɛɛba mɔ ni enɛɛmɛi fɛɛ eba wɔnɔ nɛɛ? Nɛgbɛ enaakpɛɛnii lɛ fɛɛ ni wɔtsɛmɛi lɛ gbaa wɔ ni amɛkɛɔ akɛ, ‘Ani jeee Ijipt Yehowa jie wɔ kɛjɛ’ lɛ yɔɔ? Ejaakɛ agbɛnɛ Yehowa eshɛ wɔ efɔ̃, ni eŋmɛɛ wɔhe ehã Midianbii lɛ.”

¹⁴ Kɛkɛ ni Yehowa tsɔ̃ ehiɛ ehã Gideon ni ekɛɛ lɛ akɛ, “Yaa kɛ ohewalɛ nɛɛ koni oyahere Israel yɛ Midianbii lɛ adɛŋ! Mi ji mɔ ni tsuɔ bo lɛ?”

¹⁵ Gideon kɛɛ lɛ akɛ, “Ofainɛ, minuŋtsɔ, te mafee tɛŋŋ manyɛ mahere Israel lɛ? Naa, miweku lɛ ji weku ni bɛ hewalɛ fe fɛɛ yɛ Manase, ni mi, mi ji bibioo fe fɛɛ yɛ mitsɛ we lɛ.”

¹⁶ Yehowa kɛɛ lɛ akɛ, “Mibaye mabua bo, ni ooogbe Midianbii lɛ butuu tamɔ agbeɔ mɔ kome.”

¹⁷ Gideon kɛɛ Yehowa akɛ, “Agbɛnɛ kɛ ona mihe tsuijurɔ lɛ, no lɛ hã mi okadi ko akɛ bo okɛ mi wieɔ nɛɛ.

¹⁸ Ofainɛ, kaaje biɛ kɛyashi be ni maba mikɛ nikeenii aaabama ohiɛ.” Yehowa to he akɛ; “Mahi shi kɛyashi be ni oooku osɛɛ oba.”

¹⁹ No hewɔ lɛ, Gideon tee ni eyasaa abotiabi. Ekɛ ma kiloi nyɔŋma fee akpiti. Ekɛ loo lɛ wo kafu mli ni ekɛ ehe nu lɛ wo kukwɛi mli. Ekɛ je kpo kɛba bɔfo lɛ ŋɔɔ yɛ tso lɛ shishi, ni ekɛbama ehiɛ.

²⁰ Shi Nyɔŋmɔ bɔfo lɛ kɛɛ Gideon akɛ, “Okɛ loo lɛ kɛ akpiti lɛ ashwie tɛsaa lɛ nɔ, ni ofɔse ehe nu lɛ oshwie nɔ.”

²¹ Gideon fee nakai. Kɛkɛ ni Yehowa bɔfo lɛ kpã edɛhiɛmɔtso lɛ mli, ni ekɛ tso lɛ naabu sa loo lɛ kɛ akpiti lɛ he. La jɛ tɛsaa lɛ mli ni ebashã loo lɛ kɛ akpiti lɛ wɛɛ. Kɛkɛ ni Yehowa bɔfo lɛ laaje yɛ Gideon hiɛ.

²² Be ni Gideon yoo akɛ Yehowa bɔfo ni lɛ, ekɛɛ, “Ei! Nuŋtsɔ Nyɔŋmɔ! Yehowa bɔfo pam mina hiɛ kɛ hiɛ nɛkɛ nɛɛ!”

²³ Shi Yehowa kɛɛ lɛ akɛ, “Na tsui, kaashe gbeyei, ogboŋ!”

²⁴ Kɛkɛ ni Gideon ma afɔleshãa latɛ yɛ jɛi ehã Yehowa, ni etsɛ lɛ akɛ, “Yehowa ji hejɔlɛ.” Afɔleshãa latɛ lɛ yɛ Ofra ni ji Abiezerbii anɔ lɛ kɛbashi ŋmɛnɛ.

²⁵ Nakai nyɔɔŋ lɛ mli nɔŋŋ lɛ, Yehowa kɛɛ Gideon akɛ, “Yaaŋɔ otsɛ tsinanuu nɔ ni ji enyɔ lɛ, ni eye afii kpawo lɛ, koni oyakumɔ Baal afɔleshãa latɛ ni ji otsɛ nɔ lɛ. Asaŋ foo nyɔŋmɔ yoo Ashera tso ni ma afɔleshãa latɛ lɛ masɛi lɛ.

²⁶ Maa afɔleshãa latɛ ohã Yehowa, oNyɔŋmɔ lɛ, yɛ tɛsaa ni yɔɔ biɛ nɛɛ yiteŋ. Too tɛi ni okɛbaama lɛ gbɛjianɔ bɔ ni sa akɛ ato lɛ; koni oŋɔ tsinanuu ni ji enyɔ lɛ, ni okɛshã shãa afɔle. Okɛ Ashera tso ni obaafo lɛ afee lai ni okɛshã.”

²⁷ No hewɔ lɛ, Gideon ŋɔ etsuji lɛ ateŋ mɛi nyɔŋma, ni efee bɔ ni Yehowa efã lɛ lɛ. Shi akɛni eeshe etsɛ we lɛ kɛ maŋbii lɛ agbeyei hewɔ lɛ, enyɛɛɛ efee nii nɛɛ shwane, shi moŋ nyɔɔŋ efee.

²⁸ Shi be ni maŋbii lɛ te shi leebi maŋkpa lɛ, naa Baal afɔleshãa latɛ lɛ ni akumɔ ashwie shi; afo Ashera tso ni ma emasɛi lɛ, ni akɛ tsinanuu ni ji enyɔ lɛ eshã shãa afɔle yɛ afɔleshãa latɛ ni ama lɛ nɔ.

²⁹ Maŋbii lɛ bibii amɛhe akɛ, “Namɔ ye nɛkɛ sane?” Be ni amɛtao mli ni amɛbi mli lɛ, akɛɛ amɛ akɛ, “Gideon, Yoash bi lɛ, ji mɔ ni ye nɛkɛ sane nɛɛ.”

³⁰ Kɛkɛ ni maŋbii lɛ kɛɛ Yoash akɛ, “Jiemɔ obi lɛ kɛba ni agbe lɛ; ejaakɛ ekumɔ Baal afɔleshãa latɛ lɛ, ni efo Ashera tso ni ma emasɛi lɛ.”

³¹ Shi Yoash bi mɛi fɛɛ ni ebakpe ewo ehe lɛ akɛ, “Ani nyɛ nyɛbaabe nyɛhã Baal lo? Aloo nyɛ, nyɛbaafã Baal he? Mɔ ni baabe ahã Baal lɛ, aaagbe lɛ dani je aaatsɛre. Kɛ nyɔŋmɔ ji Baal lɛ efã lɛ diɛŋtsɛ ehe yɛ efɔleshãa latɛ ni akumɔ lɛ hewɔ.”

³² No hewɔ lɛ, nakai gbi lɛ awo Gideon gbɛi akɛ, “Yerubaal”, eshishi ji “Baal kɛ lɛ atswa, ejaakɛ ekumɔ efɔleshãa latɛ lɛ.”

³³ Kɛkɛ ni Midianbii kɛ Amalekbii kɛ bokãgbɛbii lɛ fɛɛ bua amɛhe naa. Amɛfo Yordan Faa lɛ, ni amɛyato shi yɛ Yezreel jɔɔ lɛ mli.

³⁴ Shi Yehowa Mumɔ lɛ bayi Gideon nɔ. Gideon kpã tɛtɛrɛmantɛrɛ ekɛtsɛ Abiezerbii lɛ koni amɛbanyiɛ esɛɛ.

³⁵ Etsu mɛi kɛtee Manase fɛɛ ni ayakpee amɛ hu koni amɛbanyiɛ esɛɛ. Etsu kɛtee Asher kɛ Zebulon kɛ Naftali; ni amɛba koni amɛkɛ lɛ abakpe.

³⁶ Kɛkɛ ni Gideon kɛɛ Nyɔŋmɔ akɛ, “Kɛji minine nɔ obaatsɔ ohere Israel tamɔ bɔ ni okɛɛ lɛ,

³⁷ mikɛ gwantɛŋ wolo baaha ŋmãashaahe lɛ. Kɛji bɔ nyɔ wolo lɛ pɛ kɛkɛ nɔ, shi shikpɔŋ muu lɛ fɛɛ egbi lɛ, no lɛ mana male akɛ minine nɔ obaatsɔ ohere Israel tamɔ bɔ ni okɛɛ lɛ.”

³⁸ Eba mli nakai. Enɔ jetsɛremɔ lɛ, Gideon te shi leebi mra. Eŋã toowolo lɛ mli, ni nu ni eŋã yɛ mli lɛ fee tsene obɔ̃.

³⁹ Kɛkɛ ni Gideon kɛɛ Nyɔŋmɔ akɛ, “Omli akafu mi; mawie shi kome nɛɛ pɛ. Miikpa bo fai, hã maka shi kome hu makwɛ: hã wolo lɛ kɛkɛ agbi, shi bɔ anyɔ shikpɔŋ lɛ nɔ fɛɛ.”

⁴⁰ Nyɔŋmɔ hã eba mli nakai yɛ nakai nyɔɔŋ lɛ mli; wolo lɛ kɛkɛ gbi, shi shikpɔŋ lɛ nɔ fɛɛ lɛ bɔ enyɔ.