Kojolɔi 5 - ŊMALƐ KRƆŊKRƆŊ LƐ

Debora kɛ Barak Lala

¹ Kɛkɛ ni Debora kɛ Barak, Abinoam binuu lɛ, la nɛkɛ lala nɛɛ yɛ nakai gbi lɛ nɔ akɛ,

² “Akɛni tatsɛmɛi nyiɛ Israel ta lɛ hiɛ, ni maŋ muu lɛ fɛɛ here amɛhe hewɔ lɛ, nyɛjiea Yehowa yi!

³ Nyɛboa toi! Nyɛ maŋtsɛmɛi! Nyɛfea toi! Nyɛ lumɛi! La mala, saŋku matswa mahã Israel Nyɔŋmɔ, Yehowa.

⁴ Yehowa, be ni ojɛ Seir obaa lɛ, shikpɔŋ lɛ hoso, ŋwɛi tsere nu shwie shi, Be ni ofã nyiɛmɔ kɛjɛ Edom ŋã lɛ nɔ lɛ! Hɛɛ, nu tue kɛjɛ atatuiaŋ shwie shi.

⁵ Gɔji lɛ hoso yɛ Yehowa hiɛ, nakai nɔŋŋ hu Sinai fee yɛ Yehowa, Israel Nyɔŋmɔ lɛ, hiɛ.

⁶ “Shamgar, Anat bi lɛ, yinɔ, Yael be lɛ mli lɛ, jarayeli gbɛjegbɛi lɛ anɔ kã efolo, ni gbɛnyiɛlɔi juɔ shi nyiɛɔ.

⁷ Mɛi ahe sɛ̃ yɛ Israel maji lɛ amli. Amɛhe sɛ̃ kɛyashi beyinɔ ni bo Debora, ote shi akɛ Nyɛ Awo yɛ Israel.

⁸ Amɛhala nyɔŋmɔi hei, kɛkɛ ni ta shɛ agboi lɛ anaa, Anãaa tsɛŋ loo akplɔ ko yɛ hii akpei nyɔŋmai ejwɛ dɛŋ yɛ Israel.

⁹ Mina Israel tatsɛmɛi lɛ ahe tsui, kɛ mɛi ni here amɛhe yɛ tsuijurɔ naa, yɛ maŋbii lɛ ateŋ lɛ. Nyɛjiea Yehowa yi.

¹⁰ “Nyɛgbaa, nyɛ mɛi ni nyɛtara tejii yɛji anɔ, nyɛ mɛi ni nyɛtara kuŋtui fɛɛfɛji anɔ, kɛ nyɛ mɛi ni nyɛnyiɛ gbɛ lɛ nɔ.

¹¹ Be ni atswaa saŋku yɛ nuyɛɛhei lɛ, amɛaagba Yehowa kunim lɛ, Israel okwaafoi akunim lɛ. Kɛkɛ ni Yehowa mɛi lɛ kpeleke shi kɛjɛ amɛmaji lɛ amli.

¹² Tee shi, Debora! Tee shi! Wo ohe nɔ, Barak, okɛ onomii lɛ aya, Tee shi, tee shi, la lala ko, bo Abinoam bi!

¹³ Kɛkɛ ni abladei lɛ ateŋ mɛi ni eshwɛ lɛ kpeleke shi. Yehowa mɛi lɛ kpeleke shi yɛ Yehowa hewɔ amɛyanina kãkãlɔi lɛ.

¹⁴ Efraim amɛyiŋ kɛjɛ kɛtee jɔɔ lɛ mli, ni bo Benyamin, amɛnyiɛ bo kɛ owekumɛi lɛ asɛɛ, Tatsɛmɛi lɛ kpeleke shi kɛjɛ Makir kɛba, ni Zebulon ji he ni tatsɛmɛi nukpai lɛ jɛ kɛba.

¹⁵ Isakar lumɛi lɛ fata Debora he kɛba, Isakar ni yeɔ Barak anɔkwa, amɛsha foi kɛnyiɛ esɛɛ kpaakpa kɛtee jɔɔ lɛ mli; shi Ruben mli egba. Amɛyiŋ fee amɛ kɔshikɔshi. Amɛnyɛɛɛ amɛjwɛŋmɔ amɛfee akɛ amɛmiiba.

¹⁶ Mɛɛba omɛɔ yɛ too kui lɛ ateŋ, ni oboɔ blɛ ni akɛtsɛɔ toi lɛ toi? Ruben akutso lɛ mli egba, amɛyiŋ fee amɛ kɔshikɔshi.

¹⁷ Gilead ta shi yɛ Yordan sɛɛ, Mɛɛba Dan mɛɔ yɛ lɛji lɛ amli? Asher esɛ̃ koniŋŋ kɛta ŋshɔ lɛ naa, eta ŋshɔ blei lɛ anaa.

¹⁸ Zebulon ji maŋ ni kɛ ehe wo osharã kɛ gbele mli, Naftali hu nakai nɔŋŋ yɛ gɔji lɛ anɔ.

¹⁹ “Maŋtsɛmɛi lɛ ba amɛbawu ta. Amɛkɛ Kanaan maŋtsɛmɛi lɛ bawu yɛ Taanak yɛ Megido fai lɛ anaa; shi amɛnaaa jwiɛtɛi ko amɛhã.

²⁰ Ŋulamii jɛ ŋwɛi wu, Amɛjɛ amɛgbɛhei lɛ amɛkɛ Sisera wu.

²¹ Kishon Faa lɛ loo amɛ kɛtee, Faa ni keɔ kɛbaa, Kishon Faa lɛ. Misusuma, fãa nyiɛmɔ kɛ hewalɛ.

²² Kɛkɛ ni okpɔŋɔ akoklotoi lɛ shimɔ shi waa, kɛ hurumɔ ni ekpɔŋɔi lɛ huruɔ kɛ foi lɛ.

²³ Yehowa bɔfo lɛ kɛɛ, ‘Nyɛlomɔa Meroz, nyɛlomɔa emli bii lɛ, ejaakɛ amɛbafataaa Yehowa he, amɛbafataaa Yehowa he yɛ kãkãlɔi lɛ ateŋ.’

²⁴ Ajɔɔ Yael yɛ yei fɛɛ ateŋ, Kennyo, Heber ŋã lɛ. Ajɔɔ lɛ fe yei ni hiɔ bui amli lɛ fɛɛ.

²⁵ Eba nu, ni ehã lɛ fufɔ. Ekɛ fufɔ hiɛ fɔ bahã lɛ, yɛ abladei akpulu mli.

²⁶ Ekpã enine mli ekɔ shiŋmlitso. Ekɛ eninejurɔ kɔ nitsulɔi ahamle, ni ekɛka etoi shi. Etswa Sisera nɔ ni ejwara eyitso wɔtsɔwɔtsɔ;

²⁷ Eyrɔde, ni egbee shi, Ekã shi ni etsiii ehe yɛ Yael naji anaa; enaji anaa eyrɔde yɛ, ni egbee shi lɛ. He ni eyrɔde yɛ lɛ, jɛi nɔŋŋ egbee shi yɛ ni enyɔ.

²⁸ “Sisera nyɛ miifili samflɛ lɛ mli, eekwɛ nii kɛmiitsɔ̃ samflɛ fɔji lɛ amli. Mɛɛba eshwiilii lɛ baa lɛ sɛɛ etsɛ nɛkɛ? Mɛɛba ekpɔŋɔi lɛ akoklotoi lɛ agbɛɛmɔ ekpe sɛɛ nɛkɛ?

²⁹ Yei ni yɔɔ ehe lɛ ateŋ nilelɔi lɛ to he hã lɛ, ni lɛ diɛŋtsɛ hu eto he ehã ehe akɛ

³⁰ ‘Amɛna haanii ko kɛ̃ ni amɛmiija, nuu fɛɛ nuu aaana oblayoo kome loo enyɔ tete; blɛ mi, Sisera, hu mana haanii lɛ amli mamai ni awo amɛ tsofa? Mamai enyɔ ni awo amɛ tsofa, ni alo nii awo mli koni mikɛha mikuɛ?’

³¹ Yehowa, bɔ nɔŋŋ ni ohenyɛlɔi fɛɛ ahiɛ aaakpãtã nɛ! Shi mɛi ni sumɔɔ bo lɛ aaatãmɔ hulu, be ni eteɔ shi yɛ ehewalɛ mli lɛ.” No sɛɛ lɛ, shikpɔŋ lɛ nɔ jɔ afii nyɔŋmai ejwɛ.