Kojolɔi 3 - ŊMALƐ KRƆŊKRƆŊ LƐ

Jeŋmaji ni ashi yɛ shikpɔŋ lɛ nɔ

¹ No hewɔ lɛ, Yehowa shi jeŋmaji komɛi koni ekɛka Israelbii fɛɛ ni leee Kanaan tai lɛ ahe nɔ ko nɔ ko lɛ ekwɛ.

² Efee enɛ bɔ ni afee kɛkɛ ni Israelbii ayinɔi lɛ, titri lɛ amɛteŋ mɛi ni wuko ta dã lɛ, ale ta he nɔ ko ni ekɛtsɔ̃ɔ amɛ tawuu.

³ Jeŋmaji ni ashi lɛ ji Filistibii alumɛi enumɔ lɛ kɛ Kanaanbii lɛ fɛɛ kɛ Sidonbii kɛ Hivbii ni yɔɔ Lebanon gɔŋ lɛ nɔ lɛ, kɛjɛ Baal-Hermon gɔŋ lɛ he kɛyashi he ni gɔji ateŋ gbɛ ni akɛyaa Hamat lɛ kã lɛ tɔ̃ɔ.

⁴ Ashi jeŋmaji nɛɛ ni akɛ amɛ aka Israelbii lɛ akwɛ akɛ amɛaaye Yehowa kitãi ni etsɔ̃ Mose nɔ ewo amɛtsɛmɛi lɛ anɔ lo.

⁵ No hewɔ lɛ, Israelbii lɛ hi Kanaanbii lɛ kɛ Hitbii lɛ kɛ Amorbii kɛ Perizbii lɛ kɛ Hivbii lɛ kɛ Yebusbii lɛ ateŋ.

⁶ Israelbii lɛ ŋɔ gbɔmɛi nɛɛ abiyei; amɛ hu amɛkɛ amɛbiyei hãahãa Israelbii lɛ abihii agbãla; ni Israelbii lɛ sɔ̃mɔ jeŋmaji nɛɛ anyɔŋmɔi lɛ.

Otniel

⁷ Israelbii lɛ fee efɔŋ amɛshi Yehowa. Amɛhiɛ kpa Yehowa, amɛNyɔŋmɔ lɛ nɔ, ni amɛyasɔmɔ Baal nyɔŋmɔi lɛ kɛ Ashera nyɔŋmɔi lɛ.

⁸ No hewɔ lɛ, Yehowa mli wo Israelbii lɛ ala, ni ehã Mesopotamia maŋtsɛ Kushan-Rishataim ye amɛnɔ kunim ni amɛsɔmɔ lɛ afii kpaanyɔ.

⁹ Kɛkɛ ni Israelbii lɛ bolɔ tsɛ Yehowa, ni etee herelɔ ko shi ehã amɛ, ni ehere amɛ. Lɛ ji Otniel, Kaleb nyɛmi gbekɛ Kenaz bi lɛ.

¹⁰ Yehowa Mumɔ lɛ bayi Otniel nɔ, ni etsɔ̃ Israelbii lɛ ahiɛnyiɛlɔ. Efã ta, ni Yehowa hã enine tsɔ̃ Mesopotamia maŋtsɛ Kushan Rishataim lɛ nɔ ni eye enɔ kunim.

¹¹ No hewɔ lɛ, shikpɔŋ lɛ nɔ jɔ afii nyɔŋmai ejwɛ. No sɛɛ lɛ, Otniel, Kenaz bi lɛ gbo.

Ehud

¹² Israelbii lɛ saa fee efɔŋ ekoŋŋ amɛshi Yehowa. No hewɔ lɛ, Yehowa hã Moab maŋtsɛ Eglon na hewalɛ fe Israelbii lɛ.

¹³ Eglon bua Amonbii lɛ kɛ Amalekbii lɛ anaa eshi enɔ, ni eba ebaye Israelbii lɛ anɔ yɛ ta mli. Eŋɔ Yeriko, tɛŋ maŋ lɛ.

¹⁴ Israelbii lɛ sɔ̃mɔ Moab maŋtsɛ Eglon afii nyɔŋma kɛ kpaanyɔ.

¹⁵ Kɛkɛ ni Israelbii lɛ bolɔ tsɛ Yehowa, ni etee yiwalaherelɔ shi ehã amɛ. Lɛ ji Ehud, Gera Benyaminnyo lɛ bi lɛ, abɛkulɔ ni. Israelbii lɛ tsu lɛ ekɛ nikeenii tee yahã Moab maŋtsɛ Eglon.

¹⁶ Ehud sɔ̃ klante kɛ enaa nta. Ekɛlɛ ji ninetalɔ kome. Ehud kɛfi enanejurɔ shuɔ yɛ etade lɛ shishi.

¹⁷ Kɛkɛ ni ekɛ nikeenii lɛ yahã Eglon, Moab maŋtsɛ lɛ. Maŋtsɛ nɛɛ eshwi naakpa.

¹⁸ Agbɛnɛ be ni Ehud kɛ nikeenii lɛ ehã Eglon etã lɛ, Ehud wo mɛi ni tere nikeenii lɛ agbɛ ni amɛtee.

¹⁹ Shi Ehud diɛŋtsɛ lɛ, eku esɛɛ yɛ he ni tɛ amãgãi ni yɔɔ Gilgal lɛ yɔɔ lɛ. Ni ebakɛɛ, “Maŋtsɛ, miyɛ teemɔŋ sane ko ni mibagba bo.” Kɛkɛ ni Eglon kɛɛ etsuji lɛ akɛ, “Nyɛjea kpo nyɛshia wɔ!” Kɛkɛ ni Eglon tsuji lɛ fɛɛ gbala amɛhe shi.

²⁰ Be ni Eglon kometoo ta shi yɛ eŋwɛitsu ni ehereɔ kɔɔyɔɔ yɛ mli lɛ mli lɛ, Ehud tsi bɛŋkɛ lɛ ni ekɛɛ Eglon akɛ, “Mihiɛ Nyɔŋmɔ naa wiemɔ ko ni mibakɛɛ bo.” Kɛkɛ ni Eglon te shi yɛ esɛi lɛ nɔ.

²¹ Ehud kpã enine abɛku lɛ mli, ni efã klante lɛ yɛ nanejurɔ shuɔ lɛ he, ni ekɛdu Eglon musuŋ.

²² Klante lɛ tso lɛ nyiɛ dade lɛ sɛɛ kɛbote emusuŋ. Fɔ batsĩ dade lɛ sɛɛ, ejaakɛ Ehud gbalaaa klante lɛ kɛjɛɛɛ Eglon musu mli, shi klante lɛ yaje kpo yɛ esɛɛ.

²³ Kɛkɛ ni Ehud je kpo kɛtee ablanaa lɛ nɔ. Eŋãmɔ shinai lɛ ewo Eglon yi, ni eŋmɛlɛ mli.

²⁴ Be ni Ehud eje kpo etee lɛ, tsuji lɛ ba; ni be ni amɛna akɛ aŋãmɔ ŋwɛitsu lɛ shinai lɛ amɛsusu akɛ, “Benɛ etee niiasɛɛ yɛ kɔɔyɔɔheremɔ tsu lɛ mli.”

²⁵ Amɛmɛ aahu kɛyashi beyinɔ ni amɛjwɛŋmɔ shɛɛɛ he dɔŋŋ. Shi be ni egbeleee shinai lɛ lolo lɛ, amɛyakɔ samfee lɛ. Be ni amɛgbele shinai lɛ, naa amɛnuŋtsɔ lɛ kã shikpɔŋ ni egbo!

²⁶ Be ni amɛlilaa shi lɛ Ehud ejo foi etee momo. Efoŋ yɛ tɛ amãgãi lɛ ahe, ni ejo foi kɛtee Seira.

²⁷ Be ni eshɛ jɛi lɛ, ekpã tɛtɛrɛmantɛrɛ yɛ Efraim gɔji lɛ anɔ. Kɛkɛ ni Israelbii lɛ kɛ lɛ kpeleke shi kɛjɛ gɔji lɛ anɔ, ni enyiɛ amɛhiɛ.

²⁸ Ekɛɛ amɛ akɛ, “Nyɛnyiɛa misɛɛ, ejaakɛ Yehowa baahã nyɛye nyɛhenyɛlɔi Moabbii lɛ anɔ kunim.” No hewɔ lɛ, amɛkpeleke shi kɛnyiɛ esɛɛ. Amɛŋɔ Yordan faafoohei ni atsɔ̃ɔ jɛi kɛyaa Moab lɛ, ni amɛŋmɛɛɛ mɔ ko mɔ ko gbɛ ni efoɔ.

²⁹ Nakai gbi lɛ Israelbii lɛ gbe Moabbii lɛ ateŋ mɛi aaafee akpei nyɔŋma, hii hewalɔi sɔŋŋ; ni mɔ ko mɔ ko naaa hegbɛ ajo foi.

³⁰ Nakai gbi lɛ aba Moab shi awo Israel shishi. Enɛ hã shikpɔŋ lɛ nɔ jɔ afii nyɔŋmai kpaanyɔ.

Shamgar

³¹ Hiɛnyiɛlɔ ni ba ye Ehud sɛɛ ji Shamgar, Anat bi lɛ. Ekɛ tsinakplamɔ tso gbe Filistibii lɛ ateŋ mɛi ohai ekpaa, ni lɛ hu ekɛhere Israelbii lɛ.