Kojolɔi 20 - ŊMALƐ KRƆŊKRƆŊ LƐ

Israel saa ehe hã ta

¹ Kɛkɛ ni Israelbii lɛ fɛɛ, kɛjɛ Dan yɛ kooyigbɛ aahu kɛyashi Beersheba yɛ wuoyigbɛ kɛ Gilead shikpɔŋ lɛ yɛ bokãgbɛ fã kɛba. Amɛbabua amɛhe naa amɛfee asafo kpele kome yɛ Yehowa hiɛ yɛ Mizpa.

² Israel akutsei lɛ fɛɛ amli onukpai lɛ badamɔ shi yɛ Nyɔŋmɔ maŋ lɛ gwabɔɔ lɛ mli. Asafo lɛ yibɔ ji, hii ni nyiɛ amɛnane nɔ, mɛi akpei ohai ejwɛ sɔŋŋ ni le tawuu.

³ Kɛkɛ ni Benyaminbii lɛ nu he akɛ Israelbii lɛ efã kɛtee Mizpa. Agbɛnɛ Israelbii lɛ kɛɛ, “Nyɛtsɔ̃a wɔ bɔ ni fee ni aye nɛkɛ sane fɔŋ nɛɛ.”

⁴ Levinyo lɛ ni ji yoo ni agbe lɛ wu lɛ hã hetoo ni ekɛɛ, “Mikɛ mihemɔ ba Benyaminbii amaŋ ni ji Gibea koni wɔbawɔ jɛi.

⁵ Gibea hii lɛ te shi wo mi, ni amɛgba nyɔɔŋ amɛbɔle shĩa ni miyɔɔ mli lɛ, ni amɛmiitao mi amɛgbe. Amɛgbɔnyɔ mihemɔ lɛ aahu ni egbo.

⁶ Miwo mihemɔ lɛ, ni mifolɔ emli dukuduku ni mikɛmaje Israelbii ashikpɔŋ ni ji amɛgboshinii lɛ nɔ he fɛɛ he, ejaakɛ Benyaminbii ebɔ musu ni amɛfee hiɛgbejianii yɛ Israel.

⁷ Naa, nyɛ Israelbii fɛɛ nɛ. Mɛni nyɛkɛɔ; nyɛwoa he ŋaa!”

⁸ Kɛkɛ ni maŋ muu lɛ fɛɛ te shi damɔ shi tamɔ gbɔmɔ kome, ni amɛkɛɛ akɛ, “Wɔteŋ mɔ ko mɔ ko eyaŋ ebuu mli, ni wɔteŋ mɔ ko ekuŋ esɛɛ eyaŋ eshĩa.

⁹ Shi nɔ ni wɔbaafee ji akɛ wɔbaafɔ̃ oshiki koni wɔkɛna bɔ ni wɔbaatua lɛ wɔhã.

¹⁰ Wɔbaajie hii nyɔŋma yɛ mɛi oha fɛɛ oha mli, hii oha yɛ akpe fɛɛ akpe mli, hii akpe yɛ akpei nyɔŋma fɛɛ akpei nyɔŋma mli kɛjɛ Israel akutsei lɛ fɛɛ amli koni amɛyaŋɔ niyenii amɛbahã maŋ lɛ. Ni mɛi ni eshwɛ lɛ baaya amɛyagbala Gibeabii atoi yɛ hiɛgbejianii ni amɛtsu yɛ Israel lɛ hewɔ.”

¹¹ No hewɔ lɛ, Israelbii lɛ fɛɛ fĩ tɔo, ni amɛfee jwɛŋmɔ kome amɛwo Gibea maŋ lɛ.

¹² Israel akutsei lɛ tsu mɛi kɛtee Benyamin akutso muu lɛ fɛɛ ŋɔɔ ayakɛɛ akɛ, “Mɛɛ yiŋsha sane pam aye yɛ nyɛteŋ nɛɛ?

¹³ No hewɔ lɛ, agbɛnɛ nyɛjiea hii, yakagbɔmɛi lɛ ni yɔɔ Gibea lɛ kɛbaa, koni wɔgbea amɛ ni wɔkɛjie nɔ fɔŋ lɛ yɛ Israel.”

¹⁴ Shi Benyaminbii lɛ booo amɛnyɛmimɛi Israelbii lɛ atoi. Shi moŋ amɛbua amɛhe naa kɛjɛ maji lɛ amli kɛtee Gibea, koni amɛkɛ Israelbii lɛ ayawu.

¹⁵ Nakai gbi lɛ Benyaminbii lɛ bua hii tawulɔi akpei nyɔŋmai enyɔ kɛ ekpaa naa kɛjɛ amɛmaji lɛ amli;

¹⁶ esoro hii ohai kpawo ni jɛ Gibea ni aje gbɛ ahala amɛ. Hii abɛkulɔi ji amɛ, ni amɛteŋ mɔ fɛɛ mɔ nyɛɔ yitsɔi gaŋŋ kome akromia efɔ̃ɔ ni eŋmɛ̃ɛɛ.

¹⁷ Kɛ Benyaminbii lɛ bɛ mli lɛ, Israel tabilɔi lɛ anaa shiɔ hii akpei ohai ejwɛ ni emĩa kɛ klante; ni atsɔse amɛ jogbaŋŋ hã tawuu.

Ta ni afã ashi Benyaminbii lɛ

¹⁸ Israelbii lɛ yiŋ kɛtee Betel, ni amɛyabi Nyɔŋmɔ dɛŋ ŋaawoo akɛ, “Wɔteŋ namɔ tsutsu afã kɛya ni ekɛ Benyaminbii lɛ ayawu?” Yehowa kɛɛ, “Yuda tsutsu afã.”

¹⁹ No hewɔ lɛ, Israelbii lɛ te shi leebi ni amɛyabɔ nsra amɛwo Gibea.

²⁰ Amɛfã kɛtee koni amɛkɛ Benyaminbii lɛ ayawu. Israelbii lɛ gba ta wo Benyaminbii lɛ yɛ Gibea.

²¹ Kɛkɛ ni Benyaminbii lɛ fã kpo kɛjɛ Gibea, ni amɛbakpãtã Israelbii lɛ ateŋ hii akpei nyɔŋmai enyɔ kɛ enyɔ ahiɛ kɛmɔ shi kwraa nakai gbi lɛ.

²² Shi Israelbii lɛ na ekãa, ni amɛgba ta lɛ ekoŋŋ yɛ he ni amɛgba yɛ klɛŋklɛŋ gbi lɛ nɔŋŋ.

²³ Kɛkɛ ni amɛyiŋ kɛtee ni amɛyafo yɛ Yehowa hiɛ kɛyashi gbɛkɛ, ni amɛbi Yehowa nii akɛ, “Ani wɔtsi wɔbɛŋkɛ ekoŋŋ ni wɔkɛ wɔnyɛmimɛi, Benyaminbii lɛ, ayawu?” Yehowa kɛɛ akɛ, “Nyɛfãa ni nyɛkɛ amɛ ayawua.”

²⁴ No hewɔ lɛ, gbi ni ji enyɔ lɛ nɔ lɛ, Israelbii lɛ tsi bɛŋkɛ Benyaminbii lɛ ekoŋŋ.

²⁵ Benyaminbii lɛ fã kɛjɛ Gibea gbi ni ji enyɔ lɛ nɔ, ni amɛbakpãtã Israelbii lɛ ateŋ hii akpei nyɔŋma kɛ kpaanyɔ hiɛ; amɛ fɛɛ lɛ hii tawulɔi ni.

²⁶ Kɛkɛ ni Israelbii lɛ fɛɛ ni ji ta muu lɛ fɛɛ yiŋ kɛtee Betel ni amɛyafo. Amɛho amɛtara shi yɛ jɛi yɛ Yehowa hiɛ, ni amɛhi ŋmãa nakai gbi lɛ kɛyashi gbɛkɛ. Amɛshãshãa shãa afɔlei kɛ shidaa afɔlei yɛ Yehowa hiɛ.

²⁷ Nakai bei lɛ amli lɛ, Nyɔŋmɔ Kpãŋmɔ Adeka lɛ yɛ jɛi,

²⁸ ni mɔ ni sɔmɔɔ yɛ jɛi yɛ Yehowa hiɛ ji Finehas, Aaron bi Eleazar bi lɛ. Israelbii lɛ bi Yehowa akɛ, “Ani wɔfã ekoŋŋ ni wɔkɛ wɔnyɛmimɛi Benyaminbii lɛ ayawu aloo wɔfɔ̃ɔ?” Yehowa kɛɛ, “Nyɛfãa kɛyaa, ejaakɛ wɔ lɛ, mahã nyɛye amɛnɔ kunim.”

²⁹ Kɛkɛ ni Israelbii lɛ to kawolɔi kɛbɔle Gibea kɛkpe.

³⁰ Gbi ni ji etɛ̃ lɛ nɔ lɛ, Israelbii lɛ fã kɛyanina Benyaminbii lɛ ekoŋŋ, ni amɛgba ta amɛwo Gibea tamɔ tsutsu lɛ.

³¹ Kɛkɛ ni Benyaminbii lɛ fã kpo kɛbanina Israelbii lɛ. Agbala Benyaminbii lɛ kɛjɛ maŋ lɛ mli, ni amɛbɔ̃i Israelbii lɛ nitswiamɔ kɛ amɛgbee tamɔ tsutsu lɛ yɛ gbɛjegbɛ ni kã kɛyaa Betel kɛ nɔ ni kã kɛyaa Gibea yɛ ŋã lɛ nɔ lɛ nɔ. Amɛgbe Israel hii aaafee nyɔŋmai etɛ̃.

³² Benyaminbii lɛ kɛɛ, “Wɔgbɛ amɛta lɛ tamɔ tsutsu lɛ nɔŋŋ.” Shi Israelbii lɛ kɛɛ, “Nyɛhãa wɔjoa foi ni wɔkɛgbala amɛ kɛjɛ maŋ lɛ mli kɛba gbɛjegbɛi lɛ anɔ.”

³³ Kɛkɛ ni Israel hii lɛ fɛɛ tetee shi yɛ amɛgbɛhei lɛ ni amɛyagba ta yɛ Baal-Tamar. Kɛkɛ ni Israelbii ni ewo ka lɛ fãfãa kpo kɛjɛ amɛgbɛhei lɛ yɛ Gibea anaigbɛ;

³⁴ ni hii akpei nyɔŋma ni aje gbɛ ahala amɛ kɛjɛ Israel fɛɛ lɛ te shi wo Gibea. Ta lɛ mli bawa po ni ehiii; shi Benyaminbii lɛ leee akɛ sane fɔŋ eye amɛ etã.

³⁵ Yehowa hã Israelbii lɛ ye amɛnɔ kunim. Nakai gbi lɛ Israelbii lɛ kpãtã Benyaminbii lɛ ateŋ hii akpei nyɔŋmai enyɔ kɛ enumɔ kɛ oha hiɛ; amɛ fɛɛ lɛ hii tawulɔi sɔŋŋ.

³⁶ Agbɛnɛ Benyaminbii lɛ na faŋŋ akɛ aye amɛnɔ. Akɛni Israelbii lɛ ahiɛ kã mɛi ni amɛhã amɛwo ka kɛbɔle Gibea lɛ anɔ hewɔ lɛ, amɛnaa sɛɛsɛɛ amɛhã Benyaminbii lɛ.

Bɔ ni Israelbii fee ye kunim

³⁷ Hii ni ewo ka lɛ he fee oya, ni amɛtsɛ̃ kɛba Gibea nɔ. Amɛgba amɛyi maŋ lɛ mli, ni amɛkɛ klante gbe maŋ muu lɛ fɛɛ.

³⁸ Shi okadi ni Israel hii lɛ kɛ kawolɔi lɛ eto yɛ amɛteŋ ji akɛ kɛ kawolɔi lɛ na lasu te shi kɛjɛ maŋ lɛ mli akɛ okadi lɛ,

³⁹ Israelbii lɛ adɔ amɛyi kɛjɛ ta lɛ mli. Agbɛnɛ Benyaminbii lɛ ebɔ̃i Israelbii lɛ ateŋ hii aaafee nyɔŋmai etɛ̃ nitswiamɔ kɛ amɛgbee, ni amɛmiikɛɛ akɛ, “Wɔnine etsɔ̃ amɛnɔ tamɔ bɔ ni ba yɛ tsutsu ta lɛ mli lɛ.”

⁴⁰ Shi be ni lasu kutuu lɛ bɔ̃i shitee kɛjɛ maŋ lɛ mli kɛ ŋwɛiyaa lɛ, Benyaminbii lɛ kwɛ amɛsɛɛ, ni amɛna akɛ maŋ muu lɛ fɛɛ miitso kɛmiiya ŋwɛi.

⁴¹ Kɛkɛ ni Israel hii lɛ dɔ amɛhe. Ŋmiŋmi mɔ Benyamin hii lɛ, ejaakɛ amɛna akɛ sane fɔŋ eye amɛ.

⁴² No hewɔ lɛ, amɛtsɔ̃ amɛsɛɛ amɛ̃hã Israelbii lɛ, ni amɛjo foi kɛtee ŋã lɛ nɔ gbɛ; shi ta lɛ nyiɛ amɛsɛɛ waa. Kɛkɛ ni Israelbii lɛ fã nɔŋŋ kɛjɛ maŋ lɛ mli kɛbote Benyaminbii lɛ ateŋ, ni amɛgbegbee Benyaminbii lɛ.

⁴³ Israelbii lɛ sa Benyaminbii lɛ ayi, ni amɛnyiɛ Benyaminbii lɛ asɛɛ kɛyashi Noha. Amɛnaanaa Benyaminbii lɛ anɔ aahu kɛyashi Gibea ŋlɛnɔ yɛ bokãgbɛ.

⁴⁴ Benyaminbii lɛ ateŋ hii akpei nyɔŋma-kɛ-kpaanyɔ nyɔnyɔɔi; amɛ fɛɛ lɛ hii kãkãlɔi sɔŋŋ ni.

⁴⁵ Mɛi ni shwɛ lɛ tsɔ̃ amɛhe, ni amɛjo foi kɛtee ŋã lɛ nɔ gbɛ kɛyaa Rimon tɛsaa lɛ he gbɛ lɛ. Agbe amɛteŋ hii akpei enumɔ yɛ gbɛjegbɛi lɛ anɔ; anyiɛ amɛsɛɛ waa kɛtee Gidom, ni asaa agbe amɛteŋ hii akpei enyɔ.

⁴⁶ No hewɔ lɛ, mɛi fɛɛ ni nyɔ nakai gbi lɛ yɛ Benyaminbii lɛ ateŋ ji hii akpei nyɔŋmai enyɔ kɛ enumɔ, amɛ fɛɛ lɛ tawulɔi kãkãlɔi sɔŋŋ ni.

⁴⁷ Shi hii ohai ekpaa pɛ tse yɛ ta lɛ naa, ni amɛjo foi kɛtee ŋã lɛ nɔ gbɛ kɛtee Rimon tɛsaa lɛ he. Amɛhi jɛi nyɔji ejwɛ.

⁴⁸ Kɛkɛ ni Israelbii lɛ tsɔ̃ amɛhe amɛwo Benyaminbii krokomɛi lɛ. Amɛkɛ klante gbegbee Benyaminbii lɛ; amɛgbe gbɔmɛi ni yɔɔ maŋ fɛɛ maŋ mli kɛ kooloi fɛɛ kɛ nɔ fɛɛ nɔ ni baje amɛgbɛ nɔ. Asaŋ maji fɛɛ ni amɛyanina lɛ, amɛmamɔ fɛɛ naa la.