Kojolɔi 16 - ŊMALƐ KRƆŊKRƆŊ LƐ

Samson yɛ Gaza

¹ Samson yiŋ etee Filistibii amaŋ ko ni atsɛɔ lɛ Gaza lɛ mli. Eyana yoo ajwamãŋ ko yɛ jɛi, ni etee eyawɔ eŋɔɔ.

² Ayagba Gazabii lɛ akɛ, “Samson eba biɛ.” Kɛkɛ ni amɛsa eyi, ni amɛwo lɛ ka nyɔɔŋnyɔɔŋ fɛɛ yɛ maŋ lɛ agbo lɛ naa. Amɛsɛ̃ koniŋŋ nyɔɔŋ lɛ mli fɛɛ amɛkɛɛ: “Nyɛhãa wɔmɛa kɛyashi je aaatsɛre koni wɔgbe lɛ.”

³ Shi Samson kã shi kɛyashi nyɔɔŋteŋ, ni ete shi nyɔɔŋ te lɛ mli. Emɔmɔ maŋ lɛ agbo lɛ shinai lɛ kɛ shinaatsei enyɔ lɛ amli, ni efã kɛ esɛɛlaa adabaŋ lɛ fɛɛ. Ekɛtswa ekɔŋ, ni etere kɛtee gɔŋ ni yɔɔ Hebron hiɛ lɛ yiteŋ.

Samson kɛ Delila

⁴ Enɛ sɛɛ lɛ Samson tsui mɔ yoo ko yɛ Sorek jɔɔ lɛ mli. Egbɛi ji Delila.

⁵ Filistibii alumɛi lɛ ba Delila ŋɔɔ, ni amɛkɛɛ lɛ akɛ, “Lakamɔ lɛ ni ona nɔ mli ni ehewalɛ kpele lɛ yɔɔ kɛ gbɛ nɔ ni wɔɔtsɔ̃ ni wɔɔnyɛ lɛ wɔmɔ koni wɔfĩ lɛ ni wɔjɔɔ ehe. Kɛkɛ lɛ wɔteŋ mɔ fɛɛ mɔ aaahã bo jwiɛtɛi kukuji akpe kɛ oha.”

⁶ No hewɔ lɛ, Delila kɛɛ Samson akɛ, “Ofainɛ, tsɔ̃ɔmɔ mi nɔ mli ni ohewalɛ kpele lɛ yɔɔ kɛ bɔ ni aaafee afĩ bo ni anyɛ ohe ajɔɔ.”

⁷ Samson kɛɛ lɛ akɛ, “Kɛji amɛkɛ kpãi hei ŋmɔji kawekawee kpawo fĩ mi lɛ, no dani magbɔjɔ ni matamɔ gbɔmɔ fɛɛ gbɔmɔ.”

⁸ Kɛkɛ ni Filistibii alumɛi lɛ kɛ kpãi hei ŋmɔji kawekawee kpawo bahã Delila, ni ekɛfĩ Samson.

⁹ Shi Delila yɛ mɛi ni ewo antɛo yɛ pia lɛ mli. No hewɔ lɛ, ekɛɛ Samson akɛ, “Samson, Filistibii lɛ eshwie onɔ.” Kɛkɛ ni Samson tserɛ kpãi lɛ amli tamɔ anaanu kpãa hwiãa tseɔ kɛ esa la he lɛ. No hewɔ lɛ, Samson hewalɛ lɛ teemɔŋ sane lɛ ejeee kpo.

¹⁰ Delila kɛɛ Samson akɛ, “Naa, mihe fɛo sɔŋŋ oyeɔ nɛɛ, ni olaka mi. Ofainɛ, agbɛnɛ tsɔ̃ɔmɔ mi bɔ ni aaafee afĩ bo.”

¹¹ Samson kɛɛ lɛ akɛ, “Kɛji amɛkɛ taŋkpee kpãi hei ni akɛtsuko nɔ ko dã fĩ mi lɛ, no dani magbɔjɔ ni matamɔ gbɔmɔ fɛɛ gbɔmɔ.”

¹² No hewɔ lɛ, Delila ŋɔ taŋkpee kpãi hei ekɛfĩ lɛ, ni ekɛɛ lɛ akɛ, “Samson, Filistibii lɛ eshwie onɔ!” Shi mɛi ni ewo antɛo lɛ yɛ pia lɛ mli. Kɛkɛ ni Samson tserɛ taŋkpee kpãi lɛ yɛ eniji oookɛɛ kpãa hwiãa ko kɛkɛ ni.

¹³ Delila kɛɛ Samson akɛ, “Kɛbashi amrɔ nɛɛ, mihe fɛo sɔŋŋ oyeɔ, ni olakaa mi. Tsɔ̃ɔmɔ mi bɔ ni aaafee afĩ bo.” Ni ekɛɛ Delila akɛ, “Kɛji omɔmɔ miyitsɔi akuklu kpawo lɛ ofĩ, ni okɛ piŋ mɔ lɛ kpɛŋŋ lɛ, no dani magbɔjɔ, ni matamɔ gbɔmɔ fɛɛ gbɔmɔ.”

¹⁴ No hewɔ lɛ, be ni Samson ewɔ lɛ, Delila mɔmɔ Samson, yitsɔi akuklui kpawo lɛ efĩ, ni ekɛ piŋ mɔ lɛ kpɛŋŋ. Kɛkɛ ni ekɛɛ Samson akɛ, “Samson, Filistibii lɛ eshwie onɔ.” Shi Samson hiɛ tsɛ̃ kɛjɛ wɔ lɛ mli, ni efã piŋ lɛ yɛ eyitsɔi lɛ mli.

¹⁵ No hewɔ lɛ, Delila kɛɛ Samson akɛ, “Te feɔ tɛŋŋ ni okɛɔ akɛ oosumɔ mi be ni otsui bɛ mihe lɛ? Shii etɛ̃ sɔŋŋ nɛ ni olakaa mi, ni otsɔ̃ko mi nɔ mli ni ohewalɛ kpele lɛ yɔɔ.”

¹⁶ Bɔ ni Delila yeɔ Samson tsui sɔŋŋ daa gbi kɛ ewiemɔi lɛ, ni ehiɛ Samson doo lɛ, ehã jeŋshihilɛ po je Samson tsine. No hewɔ lɛ,

¹⁷ egba Delila eyitsoŋ sane fɛɛ ekɛɛ, “Asooyi naa esako miyiteŋ pɛŋ, ejaakɛ mɔ ni ajɔɔ enɔ ahã Nyɔŋmɔ ji mi kɛjɛ minyɛ musuŋ beebe. Kɛji ashɛ miyi lɛ, no dani mihewalɛ lɛ aaaje mimli, ni magbɔjɔ ni matamɔ gbɔmɔ fɛɛ gbɔmɔ.”

¹⁸ Be ni Delila na akɛ Samson egba lɛ eyitsoŋ sane fɛɛ lɛ, etsu koni ayakpee Filistibii lɛ alumɛi lɛ kɛba; ekɛɛ akɛ, “Nyɛbaa shi kome nɛɛ hu, ejaakɛ egba mi eyitsoŋ sane fɛɛ.” Kɛkɛ ni Filistibii alumɛi lɛ ba. Amɛhiɛ shika lɛ kɛba.

¹⁹ Delila wɔle Samson be ni Samson yitso kã enakutsei anɔ. Etsɛ nuu ko, ehã ebashɛ Samson yitsɔi akuklui kpawo lɛ, ni ehewalɛ lɛ je emli.

²⁰ Kɛkɛ ni Delila kɛɛ “Samson, Filistibii lɛ eshwie onɔ.” Samson hiɛ tsɛ̃ kɛjɛ ewɔ lɛ mli ni ekɛɛ ehe akɛ, “Maje kpo tamɔ tsutsu lɛ ni mahoso mihe.” Shi eleee akɛ Yehowa ekpa yɛ esɛɛ.

²¹ Kɛkɛ ni Filistibii lɛ mɔ lɛ ni amɛfamɔ ehiŋmɛii. Amɛkɛ lɛ tee Gaza. Amɛkɛ akɔɔble gboklɛi enyɔ wo lɛ, ni amɛhãa ewiɛɔ yɛ wiɛ sɛɛ yɛ gboklɛfoi atsu lɛ mli.

²² Shi eyitsɔi ni ashɛ lɛ, bɔ̃i tsaa ekoŋŋ.

Samson gbele

²³ Eba mli akɛ Filistibii alumɛi lɛ babua amɛhe naa koni amɛshã afɔle kpele amɛhã amɛnyɔŋmɔ Dagon lɛ, koni amɛnya, ejaakɛ amɛkɛɛ, “Wɔnyɔŋmɔ lɛ ehã wɔye wɔhenyɛlɔ Samson lɛ nɔ kunim.”

²⁴ Be ni Filistibii lɛ na Samson lɛ, amɛ jie amɛnyɔŋmɔ lɛ yi, ejaakɛ amɛkɛɛ, “Wɔhenyɛlɔ ni ekpãtã wɔshikpɔŋ lɛ hiɛ ni egbegbee wɔteŋ mɛi babaoo lɛ, wɔnyɔŋmɔ lɛ ehã wɔye enɔ kunim.”

²⁵ Be ni amɛmii eshɛ amɛhe lɛ, amɛkɛɛ, “Nyɛtsɛa Samson kɛbaa ni ebajie wɔhiɛtserɛ.” No hewɔ lɛ, amɛyatsɛ Samson yɛ gboklɛfoi atsu lɛ mli, koni ebajie amɛhiɛtserɛ. Amɛhã edamɔ akulashiŋi lɛ ateŋ.

²⁶ Samson kɛɛ oblanyo ni hiɛ enineshi lɛ akɛ, “Ŋmɛ̃ɛ mi gbɛ ni matara akulashiŋi ni tsu lɛ ma nɔ lɛ ahe makwɛ, ni makpasa amɛ.”

²⁷ Agbɛnɛ shĩa lɛ eyi tɔ kɛ hii kɛ yei. Filistibii alumɛi lɛ fɛɛ hu yɛ jɛi; ni hii kɛ yei aaafee akpei etɛ̃ yɛ tsu lɛ yiteŋ amɛmiikwɛ bɔ ni Samson jieɔ mɛi ahiɛtserɛ lɛ.

²⁸ Kɛkɛ ni Samson tsɛ Yehowa ni ekɛɛ, “Ao Nuŋtsɔ Nyɔŋmɔ, miikpa bo fai, kaimɔ mi ni ohã mi hewalɛ shi kome nɛɛ kɛkɛ. Naa Nyɔŋmɔ, hã matɔ mihiŋmɛii enyɔ nɛɛ he owele shi kome yɛ Filistibii lɛ anɔ!”

²⁹ Kɛkɛ ni Samson mɔmɔ teŋ akulashiŋi enyɔ lɛ ni tsu lɛ ma nɔ lɛ mli; ekɛ eninejurɔ mɔ ekome mli, ni ekɛ ebɛku hu mɔ ekome mli. Ekɛ etsiimɔ ŋmɛ amɛnɔ,

³⁰ ni ekɛɛ, “Hã mi kɛ Filistibii lɛ agboi.” Kɛkɛ ni ekɛ ehewalɛ fɛɛ tsi akulashiŋi lɛ, ni shĩa lɛ wule shwie lumɛi lɛ kɛ mɛi ni yɔɔ mli lɛ fɛɛ anɔ. Mɛi ni Samson gbe yɛ egbele mli lɛ ayi fa fe mɛi ni egbe be ni ehiɛ kã lɛ.

³¹ Kɛkɛ ni enyɛmimɛi lɛ kɛ etsɛ we lɛ mli bii fɛɛ yiŋ kɛtee ni amɛyawo lɛ. Amɛkɛ lɛ ba amɛbafu lɛ yɛ Zora kɛ Eshtaol teŋ yɛ etsɛ Manoa fuuhe lɛ. Samson nyiɛ Israel hiɛ afii nyɔŋmai enyɔ.