Kojolɔi 13 - ŊMALƐ KRƆŊKRƆŊ LƐ

Samson fɔmɔ

¹ Israelbii lɛ fee esha amɛshi Yehowa ekoŋŋ, ni Yehowa hã Filistibii ye amɛnɔ afii nyɔŋmai ejwɛ.

² Nuu ko yɛ Zora ni ejɛ Danbii aweku lɛ mli. Egbɛi ji Manoa. Eŋã lɛ kene ji lɛ, ni ebɛ bi.

³ Yehowa bɔfo jie ehe kpo etsɔ̃ɔ yoo lɛ, ni ekɛɛ lɛ akɛ, “Kene ji bo, ni obɛ bi; shi agbɛnɛ obaana musu, ni obaafɔ binuu.

⁴ No hewɔ lɛ, agbɛnɛ le ohe nɔ kwɛmɔ. Kaanu wain loo dãa ko ni wa, ni kaaye nɔ ko ni he tseee hu.

⁵ Ejaakɛ naa, obaana musu, ni obaafɔ binuu. Asooyi naa akasa eyiteŋ, ejaakɛ gbekɛ lɛ baafee mɔ ni ajɔɔ enɔ ahã Nyɔŋmɔ kɛjɛ musuŋ beebe. Lɛ ebaabɔi Israelbii lɛ heremɔ yɛ Filistibii lɛ adɛŋ.”

⁶ Kɛkɛ ni yoo lɛ ba ni ebakɛɛ ewu akɛ, “Nyɔŋmɔ gbɔmɔ ko ba miŋɔɔ. Ehiɛ tamɔ Nyɔŋmɔ bɔfo hiɛ, ehe yɛ gbeyei naakpa. Shi mibiii lɛ he ni ejɛ, ni lɛ hu etsɔ̃ɔɔ mi egbɛi.

⁷ Ekɛɛ mi akɛ, ‘Naa, obaana musu, ni obaafɔ binuu; no hewɔ lɛ, agbɛnɛ lɛ, kaanu wain loo dãa ko ni wa; ni kaaye nɔ ko ni he tseee; ejaakɛ gbekɛ lɛ baafee mɔ ni ajɔɔ enɔ ahã Nyɔŋmɔ kɛjɛ musuŋ beebe kɛyashi gbi ni eeegbo.’ ”

⁸ Kɛkɛ ni Manoa kpa Yehowa fai ni ekɛɛ, “Ao Yehowa, miikpa bo fai, hã Nyɔŋmɔ gbɔmɔ lɛ ni otsu lɛ aba wɔŋɔɔ ekoŋŋ ni ebatsɔ̃ɔ wɔ bɔ ni wɔhiɛ gbekɛ lɛ ni abaafɔ lɛ wɔhã.”

⁹ Nyɔŋmɔ fee nɔ ni Manoa bi lɛ ehã lɛ. Nyɔŋmɔ bɔfo lɛ ba yoo lɛ ŋɔɔ ekoŋŋ be ni eta shi yɛ ŋmɔ mli; shi ewu Manoa bɛ jɛi.

¹⁰ Yoo lɛ he fee oya, ni esha foi eyakɛɛ ewu lɛ akɛ, “Naa nuu lɛ ni ba miŋɔɔ nyɛsɛɛ lɛ ebajie ehe kpo etsɔ̃ɔ mi.”

¹¹ Kɛkɛ ni Manoa te shi ni enyiɛ eŋã lɛ sɛɛ ni ebanina nuu lɛ. Ebi nuu lɛ akɛ, “Ani bo ji nuu lɛ ni kɛ yoo nɛɛ bawie lɛ?” Nuu lɛ to he akɛ, “Miŋ.”

¹² Manoa kɛɛ lɛ akɛ, “Agbɛnɛ kɛ owiemɔi lɛ na ba mli lɛ, te gbekɛ lɛ shihilɛ baatamɔ ahã tɛŋŋ, ni mɛni ebaafee?”

¹³ Yehowa bɔfo lɛ to he akɛ, “Nibii fɛɛ ni mikɛɛ yoo lɛ, ehiɛ ahi ehe nɔ yɛ he.

¹⁴ Ekaye nɔ ko nɔ ko ni jɛɔ waintso mli, ni asaŋ ekanu wain loo dãa ko ni wa. Asaŋ ekaye nɔ ko nɔ ko ni he tseee. Nibii fɛɛ ni miwo lɛ he kitã lɛ eye nɔ.”

¹⁵ Manoa kɛɛ Yehowa bɔfo lɛ akɛ, “Ofainɛ, hã wɔtsi onaa fioo, ni wɔkɛ too abotiabi afee niyenii ahã bo.”

¹⁶ Shi Yehowa bɔfo lɛ kɛɛ Manoa akɛ, “Kɛji otsi minaa tete po, miyeŋ niyenii lɛ eko; shi kɛji shãa afɔle obaashã lɛ, no lɛ shãa ohã Yehowa.” Manoa leee akɛ Yehowa bɔfo ni.

¹⁷ No hewɔ lɛ, Manoa bi bɔfo lɛ akɛ, “Te atsɛɔ bo tɛŋŋ? Koni kɛ owiemɔi lɛ na ba mli lɛ, ni wɔwo ohiɛ nyam.”

¹⁸ Shi Yehowa bɔfo lɛ kɛɛ Manoa akɛ, “Mɛɛba obiɔ migbɛi? Migbɛi lɛ, naakpɛɛ gbɛi ni.”

¹⁹ No hewɔ lɛ, Manoa ŋɔ too abotiabi ni ekɛ no kɛ ŋmãa afɔle shã afɔle yɛ tɛsaa lɛ nɔ ehã Yehowa mɔ ni tsuɔ naakpɛɛnii lɛ.

²⁰ Be ni lalilɛi lɛ te shi kɛjɛ afɔleshãa latɛ lɛ nɔ kɛyaa ŋwɛi lɛ, Yehowa bɔfo lɛ tsɔ̃ afɔleshãa latɛ lɛ nɔ lalilɛi lɛ mli ekwɔ kɛtee ŋwɛi. Manoa kɛ eŋã lɛ na kɛkɛ ni amɛkɛ amɛhiɛ bumɔ shi.

²¹ Enɛ sɛɛ lɛ, Yehowa bɔfo lɛ ebajieee ehe kpo etsɔ̃ɔɔ Manoa kɛ eŋã lɛ dɔŋŋ. Kɛkɛ ni Manoa na le akɛ Yehowa bɔfo ni.

²² Manoa kɛɛ eŋã lɛ akɛ, “Gboimɔ wɔbaagboi lɛ, ejaakɛ wɔna Nyɔŋmɔ.”

²³ Shi eŋã lɛ here lɛ nɔ akɛ, “Eji Yehowa miitao wɔ egbe kulɛ eheŋ wɔdɛŋ shãa afɔle kɛ ŋmãa afɔle lɛ, ni asaŋ kulɛ etsɔ̃ŋ wɔ enɛɛmɛi fɛɛ, ni ejieŋ saji ni tamɔ enɛɛmɛi kpo etsɔ̃ŋ wɔ.”

²⁴ Yoo lɛ fɔ binuu, ni ewo lɛ Samson. Gbekɛ lɛ bada, ni Yehowa jɔɔ lɛ.

²⁵ Yehowa Mumɔ bɔ̃i Samson nɔ baa be ni eyɔɔ Dan Shitoohe lɛ, yɛ Zora kɛ Eshtaol teŋ lɛ.