Kojolɔi 1 - ŊMALƐ KRƆŊKRƆŊ LƐ

Yuda kɛ Simeon akutsei lɛ mɔ Adonibezek

¹ Be ni Yoshua egbo sɛɛ lɛ, Israelbii lɛ bi Yehowa akɛ, “Mɛɛ akutso tsutsu afã yɛ wɔteŋ ni ekɛ Kanaanbii lɛ ayawu?”

² Yehowa kɛɛ, “Yuda tsutsu afã; mibahã eye shikpɔŋ lɛ nɔ.”

³ Kɛkɛ ni Yuda kɛɛ enyɛmi Simeon akɛ, “Okɛ mi afã kɛya shikpɔŋ ni ji migbɛfaŋnɔ lɛ nɔ ni wɔkɛ Kanaanbii lɛ ayawu, ni mi hu mikɛ bo aaatee onɔ lɛ nɔ.” No hewɔ lɛ,

⁴ Yuda kɛ Simeon fã kɛtee. Yehowa hã amɛye Kanaanbii kɛ Perizbii lɛ anɔ kunim, ni amɛye mɛi akpei nyɔŋma anɔ kunim yɛ Bezek.

⁵ Amɛyanina Adonibezek yɛ Bezek. Amɛkɛ lɛ wu, ni amɛye Kanaanbii lɛ kɛ Perizbii lɛ anɔ kunim.

⁶ Adonibezek jo foi; shi amɛtiu lɛ, ni amɛyamɔ lɛ. Amɛfolɔ enine gɔntii kɛ enane gɔntii.

⁷ Adonibezek kɛɛ: “Maŋtsɛmɛi nyɔŋmai kpawo ni afolɔ amɛnine gɔntii lɛ kɛ amɛnane gɔntii lɛ kɔlɔ niyenii fufuji yɛ mikpɔlɔ̃ lɛ shishi. Bɔ ni mifee lɛ, nakai pɛ Nyɔŋmɔ efee mi eto najiaŋ nɛɛ.” Amɛkɛ Adonibezek ba Yerusalɛm, ni ebagbo yɛ jɛi.

Yuda akutso lɛ ye Yerusalɛm kɛ Hebron nɔ kunim

⁸ Yuda akutso lɛ kɛ Yerusalɛm maŋ lɛ bawu. Amɛŋɔ maŋ lɛ. Amɛkɛ klante gbe emli bii lɛ, ni amɛma maŋ lɛ naa la.

⁹ No sɛɛ lɛ, Yudabii lɛ fã koni amɛkɛ Kanaanbii lɛ ni yɔɔ gɔji lɛ anɔ kɛ wuoyigbɛ shikpɔŋ lɛ nɔ kɛ ŋa nɔ shikpɔŋ gbiŋ keketee lɛ nɔ lɛ ayawu.

¹⁰ Yudabii lɛ fã kɛyanina Kanaanbii ni yɔɔ Hebron lɛ. Shi sa lɛ Hebron gbɛi ji Kiriat-Arba. Yudabii lɛ ye Sheshaibii kɛ Ahimanbii kɛ Talmaibii lɛ anɔ kunim.

Otniel ŋɔ Debir maŋ lɛ

¹¹ Yudabii lɛ fã kɛjɛ Hebron kɛyanina Debirbii lɛ. Shi Debir lɛ, sa lɛ atsɛɔ lɛ Kiriat-Sefer.

¹² Yudabii lɛ ateŋ mɔ kome ni atsɛɔ lɛ Kaleb lɛ kɛɛ: “Mɔ ni aaayatua Kiriat-Sefer ni eeeŋɔ maŋ lɛ, mikɛ mibiyoo Aksa baahã lɛ gbãlã.”

¹³ Otniel, Kaleb nyɛmi gbekɛ Kenaz bi lɛ, yaŋɔ maŋ lɛ; ni Kaleb kɛ ebiyoo Aksa lɛ hã lɛ gbãlã.

¹⁴ Be ni Aksa tee ewu Otniel ŋɔɔ lɛ, Otniel wo eyiŋ akɛ ebi etsɛ shikpɔŋ ko. Be ni Aksa shɛ etsɛ ŋɔɔ ni ejɛ teji ni eta nɔ lɛ nɔ eyi shi lɛ, etsɛ bi lɛ akɛ, “Mɛni otaoɔ?”

¹⁵ Aksa kɛɛ lɛ akɛ, “Hã mi gbɛwoo nii; akɛni ohã mi wuoyigbɛ shikpɔŋ gbiŋ keketee lɛ, no hewɔ lɛ, hã mi nubui hu.” No hewɔ lɛ, Kaleb hã lɛ nubui ni yɔɔ gɔŋ nɔ kɛ nubui ni yɔɔ jɔɔ mli hu.

Kunim ni Yuda kɛ Benyamin akutsei lɛ ye

¹⁶ Mose shaanuu Kennyo lɛ shwiei kɛ Yudabii lɛ yiŋ kɛjɛ Yeriko tɛ̃ŋ maŋ lɛ mli kɛba Yuda ŋã lɛ ni yɔɔ Arad wuoyigbɛ lɛ nɔ, ni amɛtee amɛkɛ jɛi bii lɛ yahi shi.

¹⁷ Yudabii kɛ amɛnyɛmimɛi Simeonbii lɛ fã kɛtee amɛyaye Kanaanbii ni yɔɔ Zefat lɛ nɔ kunim, ni amɛfite maŋ lɛ butuu. No hewɔ lɛ, amɛwo maŋ lɛ gbɛi akɛ, Horma.

¹⁸ Asaŋ Yuda yaŋɔ Gaza kɛ ehe shikpɔji lɛ kɛ Ashkelon kɛ ehe shikpɔji lɛ kɛ Ekron kɛ ehe shikpɔji lɛ.

¹⁹ Yehowa wa Yuda, ni Yuda shwie gɔji anɔ bii lɛ. Shi Yuda nyɛɛɛ eshwie jɔɔ lɛ mli bii lɛ, ejaakɛ amɛyɛ dade shwiilii.

²⁰ Akɛ Hebron hã Kaleb tamɔ bɔ ni Mose ekɛɛ lɛ, ni Kaleb shwie Anakbii etɛ̃ lɛ kɛje jɛi.

²¹ Shi Benyaminbii lɛ eshwieee Yebusbii ni yɔɔ Yerusalɛm lɛ. No hewɔ lɛ, Yebusbii lɛ kɛ Benyaminbii lɛ hi Yerusalɛm kɛbashi ŋmɛnɛ.

Efraim kɛ Manase akutsei lɛ ŋɔ Betel

²² Efraim kɛ Manase yatua Betel, ni Yehowa ye ebua amɛ.

²³ Amɛtsu ayasara Betel maŋ, ni sa lɛ egbɛi ji Luz lɛ.

²⁴ Saralɔi lɛ na nuu ko ni jɛ maŋ lɛ mli miiba, ni amɛkɛɛ lɛ akɛ, “Ofainɛ, tsɔ̃ɔmɔ wɔ gbɛ ni akɛboteɔ maŋ lɛ mli, ni wɔkɛ bo baaye yɛ mlijɔlɛ naa.”

²⁵ Etsɔ̃ɔ amɛ gbɛ ni akɛboteɔ maŋ lɛ mli. Amɛgbe maŋ lɛ mli bii lɛ; shi amɛshi nuu lɛ kɛ eŋã kɛ ebii fɛɛ.

²⁶ Nuu lɛ yiŋ etee Hitbii ashikpɔŋ lɛ nɔ, ni eyato maŋ yɛ jɛi. Etsɛ maŋ lɛ gbɛi akɛ Luz, ni no ji maŋ lɛ gbɛi kɛbashi ŋmɛnɛ.

Mɛi ni Israelbii lɛ eshwieee

²⁷ Manase akutso lɛ eshwieee Bet-Shean kɛ ehe maji lɛ amli bii lɛ, kɛ Taanak kɛ ehe maji lɛ amli bii lɛ, kɛ Dor kɛ ehe maji lɛ amli bii lɛ kɛ Ibeam kɛ ehe maji lɛ amli bii lɛ, kɛ Megido kɛ ehe maji lɛ amli bii lɛ. Kanaanbii nɛɛ kã he hi shi yɛ shikpɔŋ lɛ nɔ.

²⁸ Be ni Israelbii lɛ na hewalɛ lɛ, amɛhã Kanaanbii lɛ sɔmɔ amɛ, shi shwiemɔ kɛkɛ ni amɛshwieee amɛ.

²⁹ Efraim akutso lɛ eshwieee Kanaanbii ni yɔɔ Gezer lɛ, shi moŋ Kanaanbii lɛ hi amɛteŋ yɛ jɛi.

³⁰ Zebulon akutso lɛ eshwieee Kitronbii lɛ kɛ Nahalalbii lɛ, shi moŋ Kanaanbii nɛɛ hi amɛteŋ, ni amɛhã Kanaanbii lɛ sɔmɔ amɛ.

³¹ Asher akutso lɛ eshwieee Akonbii lɛ kɛ Sidonbii lɛ kɛ Ahelabbii kɛ Akzibbii kɛ Helbabii kɛ Afekbii kɛ Rehobbii lɛ,

³² shi Asherbii lɛ hi Kanaanbii ni yɔɔ shikpɔŋ lɛ nɔ lɛ ateŋ, ejaakɛ amɛshwieee Kanaanbii lɛ.

³³ Naftali akutso lɛ eshwieee Bet-Shemeshbii lɛ kɛ Bet-Anatbii lɛ, shi amɛbahi Kanaanbii nɛɛ ni yɔɔ shikpɔŋ lɛ nɔ lɛ ateŋ, ni Bet-Shemeshbii lɛ kɛ Bet-Anatbii lɛ sɔ̃mɔ amɛ.

³⁴ Amorbii lɛ tsi Danbii lɛ kɛtee gɔji lɛ anɔ, ni amɛhãaa Danbii lɛ akpeleke shi kɛba jɔɔ lɛ mli.

³⁵ Amorbii lɛ kã he amɛhi Heres gɔŋ lɛ kɛ Aiyalon kɛ Shalbim; shi Efraimbii lɛ kɛ Manasebii lɛ anine shi wa yɛ amɛnɔ, ni amɛhã Amorbii lɛ sɔmɔ amɛ.

³⁶ Amorbii lɛ ahusu lɛ jɛ Akrabim ŋmeŋme lɛ he yɛ Sela kɛtee yiteŋgbɛ.