Hosea 9 - ŊMALƐ KRƆŊKRƆŊ LƐ

Hosea tsɔ̃ɔ bɔ ni abaagbala Israel toi ahã

¹ Israel, omli akafili bo, ni kaanya tamɔ wɔŋjalɔi lɛ. Ejaakɛ bo lɛ oje oNyɔŋmɔ lɛ sɛɛ, ni oyeee lɛ anɔkwa. Ohɔ̃ɔ ohe tamɔ ajwamãŋ yɛ he fɛɛ he ohã jemawɔŋ Baal lɛ, ejaakɛ osusuɔ akɛ no hãa anaa abele lɛ.

² Biɛ be kukuoo mli lɛ abele kɛ mu lɛ shɛŋ nyɛnaa, ni anaŋ wain hu.

³ Asaŋ Israel ehiŋ Yehowa shikpɔŋ lɛ nɔ, shi ebaaku sɛɛ eya Ijipt nyɔŋyeli mli; ni amɛaayaye nii ni he tseee yɛ Asiria.

⁴ Amɛnyɛŋ amɛfɔse wain amɛshwie shi yɛ maŋsɛɛ shikpɔŋ lɛ nɔ amɛhã Yehowa, aloo amɛshã afɔlei ni sa amɛhã lɛ. Enɛ hewɔ lɛ, nii ni amɛaaye lɛ aaabule mɛi fɛɛ ni aaaye eko tamɔ yara nɔ nii buleɔ mɔ lɛ. Ejaakɛ nii ni amɛaaye lɛ amɛ diɛŋtsɛ amɛhɔmɔ kɛkɛ amɛkɛaagbe, shi ekoeko shɛŋ Yehowa hiɛ.

⁵ Te nyɛbaafee tɛŋŋ kɛji eshɛ gbijurɔyeli be loo Yehowa gbijurɔ lɛ hu?

⁶ Ejaakɛ amɛbaashi kɛya Asiria, ni Ijipt aaabua amɛgbohii lɛ anaa ni aaafu amɛ yɛ Memfis. Hei ni amɛkɛ amɛjwiɛtɛi nibii fɛɛfɛji lɛ toɔ lɛ amli baatsa kɛ sɔ̃nsɔ̃rɔ̃i, ni ŋmeitsei hu aaatsa yɛ amɛshĩai amli.

⁷ Toigbalamɔ gbii lɛ eshɛ, be ni abaawo mɔ fɛɛ mɔ nyɔmɔ bɔ pɛ ni sa lɛ lɛ eshɛ. Israel baana ele akɛ gbalɔ lɛ buulu ni, ni mumɔŋ gbɔmɔ lɛ sɛkɛyelɔ ni yɛ enishaianii hewɔ.

⁸ Gbalɔ lɛ ato lɛ akɛ bulɔ ahã Israel, miNyɔŋmɔ lɛ webii lɛ. Shi he fɛɛ he ni eeetsɔ̃ lɛ atsɔ̃ lɛ tsɔne, ni eNyɔŋmɔ lɛ shĩa diɛŋtsɛ mli lɛ nyɛɛ anyɛɔ lɛ.

⁹ Amɛbote eshafeemɔ mli vii tamɔ bɔ ni eba yɛ Gibea lɛ. No hewɔ lɛ, agbɛnɛ mibani eshai ni amɛfee lɛ ahe, ni mibawo amɛ nyɔmɔ.

Esha ni Israel fee lɛ kɛ ehe nyɔmɔwoo lɛ

¹⁰ Yehowa kɛɛ akɛ, “Klɛŋklɛŋ be ni mina Israel lɛ etamɔ wain yibii ni atoɔ lɛ ahuu yɛ ŋa nɔ. Mina nyɛtsɛmɛi lɛ tamɔ klɛŋklɛŋ yibii ni tsu yɛ agbãmi tso nɔ. Shi be ni nyɛtsɛmɛi lɛ shɛ Poer Gɔŋ le he lɛ, amɛbɔ̃i jemawɔŋ ni atsɛɔ lɛ Poer lɛ jamɔ. Enɛ hã amɛsane je migugɔŋ fu tamɔ wɔji ni amɛjaa lɛ nɔŋŋ asane.

¹¹ Israel agbojee sɛɛ aaafo tamɔ loofɔlɔ filikiɔ lɛ. Afɔŋ bi dɔŋŋ lɛ, ahiɛŋ musu dɔŋŋ, asaŋ anaŋ musu tete dɔŋŋ yɛ amɛteŋ.

¹² Ni kɛji amɛna bii amɛlɛ tete mibagbe bii nɛɛ, ni mishwɛŋ ekome nɛkɛ. Anɔkwa, kɛji miŋmɛɛ gbɔmɛi nɛɛ ahe lɛ sane kɛ joomɔ baaye amɛ pam.

¹³ “Nɔ nɔŋŋ ni minaa kã shi hã Efraimbii ji hiɛkpãtãmɔ; ni lɛ diɛŋtsɛ nɔŋŋ eeekpala ebii lɛ eyahã koni akpãtã amɛhiɛ.”

¹⁴ Mɛni masumɔ akɛ ofee gbɔmɛi nɛɛ? Yehowa, hã amɛmusu ashrake, ni amɛfufɔi fɛɛ agbi.

Yehowa bu Israel fɔ

¹⁵ Yehowa kɛɛ, “Amɛto amɛnifɔɔjianii lɛ fɛɛ feemɔ shishi yɛ Gilgal, ni jɛi mibɔ̃i amɛ nyɛɛ yɛ. Amɛnifeemɔnii gbohii lɛ ahewɔ lɛ mibashwie amɛ kɛje mishikpɔŋ lɛ nɔ. Misumɔŋ amɛ dɔŋŋ! Amɛlumɛi lɛ fɛɛ etse mihiɛ atua.

¹⁶ Israel lɛ etsɔ̃ tamɔ tso ni egbo; hela emɔ lɛ, ni eha eshishi fãi fɛɛ egboi; ni no hewɔ lɛ, ewooo yibii dɔŋŋ. Kɛji amɛna amɛfɔ lɛ, mibagbe amɛmusuŋbii ni amɛsumɔɔ lɛ.”

Gbalɔ lɛ miiwie Israel he

¹⁷ MiNyɔŋmɔ ni misɔmɔɔ lɛ lɛ, baakwa emɛi lɛ ejaakɛ amɛbooo lɛ toi. Amɛbaatsɔ̃mɔ kobɔfoi yɛ je lɛ mli maji lɛ anɔ bii lɛ ateŋ.