Hosea 14 - ŊMALƐ KRƆŊKRƆŊ LƐ

Sane ni Hosea kɛfɔ̃ Israel hiɛ

¹ Nyɛ Israelbii, nyɛkpalea kɛbaa Yehowa, nyɛNyɔŋmɔ lɛ, ŋɔɔ. Nyɛnishaianii lɛ ehã nyɛtɛrɛ, ni nyɛgbee shi.

² Nyɛkpalea kɛyaa Yehowa ŋɔɔ, nyɛyakpaa lɛ fai kɛ wiemɔi nɛɛ akɛ, “Kɛ efɔŋ ni wɔfee lɛ afa koni omɔ wɔfaikpamɔ nɛɛ mli, ni wɔɔkafo bo.

³ Asiria nyɛŋ wɔyiwala ahere gbi ko gbi ko; ni tayaa okpɔŋɔi hu nyɛŋ afã wɔhe. Asaŋ amãgã ni wɔkɛ wɔniji fee lɛ wɔtsɛŋ lɛ wɔNyɔŋmɔ dɔŋŋ. Yehowa, bo lɛ omusuŋ tsɔ̃ɔ bo yɛ awusãi ahe.”

Yehowa wo Israel shi yɛ wala hee he

⁴ Yehowa kɛɛ, “Mibahã amɛkpa anɔkwa ni amɛyeee lɛ. Mibasumɔ amɛ kɛ mitsui fɛɛ, ejaakɛ miŋmɛɛ mimli ni fu amɛ lɛ he.

⁵ Mibatsɔ̃ tamɔ bɔ ni enyɔ shiaŋa nɔ mahã Israelbii. Amɛbaagba floŋŋ tamɔ fɔfɔi; ni amɛfãi aaaya su mli shɔŋŋ tamɔ Lebanon tsei.

⁶ Eniji ni ebaatsɛ̃rɛ aaalɛɛ shi, ni ehe fɛo aaatamɔ mu tso nɔ. Eeeje ŋma tamɔ Lebanon seda tsei lɛ.

⁷ Amɛbaaba amɛbahi mifiji ashishi hɔ̃ɔŋ lɛ mli ekoŋŋ. Amɛaafɛo tamɔ abɔɔ, ni amɛaafrɔke tamɔ wain tso, ni amɛgbɛi aaahehe tamɔ Lebanon wain.

⁸ Israelbii kɛ wɔji naŋ nɔ ko feemɔ dɔŋŋ. Mibabo amɛsɔlemɔ toi. Mibatsɔ̃ tso ni eyi baa kpalaaa mahã amɛ, ni mibabaa amɛyi; nyɛjɔɔmɔi fɛɛ baajɛ mi midɛŋ.”

Sane lɛ naamuu

⁹ Mɔ ni le nii lɛ, enu saji nɛɛ ashishi; ni hiɛshikãlɔ lɛ ekɔ sɛɛ. Naa, Yehowa gbɛi fɛɛ ja, ni nomɛi mɔ ni feɔ jalɛnii kɛbaa ejeŋ; nomɛi anaa mɔ ni feɔ jalɛnii hiɔ shi yɛ; shi eshafeelɔi tswaa egbɛi lɛ amɛfɔ̃ɔ, ni no hewɔ lɛ, amɛtɛrɛɔ, ni amɛgbeɔ shi.