Hosea 12 - ŊMALƐ KRƆŊKRƆŊ LƐ

¹ “Israelbii agbi muu mli tɔlɛ kɛ deŋme lɛ, ehe baaa sɛɛnamɔ ko, shi moŋ efiteɔ nii. Amɛhã amale kɛ yiwalɛ ebu yɛ amɛteŋ. Amɛ kɛ Asiria ekpãŋ, ni amɛ kɛ Ijipt miiye mu jara.”

² “No hewɔ lɛ, Yehowa kɛ Yudabii lɛ yɛ sane. Ebaawo Israelbii nyɔmɔ yɛ amɛjeŋba naa; eeegbala amɛtoi yɛ amɛnifeemɔnii anaa.

³ Amɛtsɛ Yakob lɛ ekɛ enyɛmi lɛ na be ni ekɛ lɛ fɛɛ yɔɔ musuŋ; ni be ni eda lɛ Yakob kɛ Nyɔŋmɔ nɔ hu.

⁴ Yakob kɛ bɔfo lɛ nɔ, ni eye kunim; efo etsɔ̃ɔ bɔfo lɛ ni ebi edɛŋ jɔɔmɔ. Yakob kɛ Nyɔŋmɔ kpe yɛ Betel, ni jɛi Nyɔŋmɔ kɛ lɛ wie yɛ.

⁵ Ni Yehowa, ji Tai aNyɔŋmɔ lɛ ni Yakob kɛwie lɛ, ni egbɛi ji Yehowa, ni no akɛkaiɔ lɛ.

⁶ Nyɛ hu, enɛ hewɔ lɛ nyɛhea nyɛNyɔŋmɔ lɛ nɔ nyɛyea, ni nyɛkpalea kɛbaa eŋɔɔ. Nyɛnaa mɛi amɔbɔ; nyɛyea jalɛ sane, ni nyɛyea anɔkwa daa kɛkwɛa lɛ gbɛ.”

Fɔ kroko hu ni abu Israel kɛ Yuda

⁷ Yehowa kɛɛ, “jarayelɔ ni kɛ nsɛni ni atse etɛ nɔ ŋmɛɔ nii lɛ, shishiulɔ ji lɛ.

⁸ Israel kɛɔ akɛ, ‘Shi bɛ mitsɔ̃ niiatsɛ, bɛ mina nii babaoo?’ Mideŋmegbomɔ mli nii lɛ fɛɛ mli lɛ anaaa tɔ̃mɔ ko ni tamɔ esha yɛ mihe?

⁹ Mi ji Yehowa, nyɛNyɔŋmɔ lɛ, mɔ ni kɛ nyɛ jɛ Ijipt shikpɔŋ lɛ nɔ beebe kɛba lɛ. Mahã nyɛhi bui amli ekoŋŋ tamɔ bɔ ni nyɛfee yɛ gbii juji anɔ lɛ.

¹⁰ “Mi mikɛ gbalɔi lɛ wie, ni mijie ninaa srɔtoi mitsɔ̃ɔ amɛ; asaŋ mitsɔ̃ amɛnɔ mibubuu mimɛi lɛ abɛi lɛ.

¹¹ Shi kɛ̃lɛ aaja amãgãi yɛ Gilead; shi mɛi fɛɛ ni jaa amɛ lɛ aaagboi. Aagbe tsinai akɛmiishã afɔle yɛ Gilgal; shi afɔleshãa latɛi nɛɛ baatsɔ̃mɔ tɛi kuikui kɛkɛ yɛ amɛŋmɔjiashi akofii lɛ ateŋ.”

¹² Yakob jo foi kɛtee Mesopotamia. Eyasɔ̃mɔ yɛ jɛi yɛ ŋa hewɔ; eyakwɛ mɔ ko toi yɛ ŋa hewɔ.

¹³ Yehowa tsu gbalɔ ni eyahere Israelbii lɛ ayiwala kɛje Ijipt kɛba, ni gbalɔ nɛɛ nɔŋŋ nɔ etsɔ̃ ekura amɛ.

¹⁴ Israelbii ewo Yehowa mli la naakpa; ni no hewɔ lɛ, esa akɛ amɛgboi; ni amɛmusu aaatere amɛ. Yehowa baagbala amɛtoi ejaakɛ amɛwo lɛ hiɛgbele.