Hosea 11 - ŊMALƐ KRƆŊKRƆŊ LƐ

Suɔmɔ ni Nyɔŋmɔ yɔɔ hã toigbolɔi

¹ Yehowa kɛɛ, “Israel gbekɛbiashi beebe misumɔ lɛ kɛjɛ; Ijipt tɔ̃ɔ eyɔɔ ni mitsɛ lɛ akɛ mibi.

² Shi shii abɔ ni mitsɛɔ lɛ lɛ, shii abɔ ni eyaa sɛɛsɛɛ moŋ eshiɔ mi ji no; ni amɛyaa nɔ amɛshãa afɔlei amɛhãa Baal, ni amɛshãa tsofakɛŋma amɛhãa amãgãi.

³ Tsɛbelɛ mi mifee Israel tataa ni ele nyiɛmɔ. Mihole amɛ mifɔ̃ mikpɔkɔiaŋ, shi amɛŋɔɔɔ nɔ akɛ mi mihere amɛ.

⁴ Mikɛ suɔmɔ kɛ mlitsɔlɛ gbala amɛ kɛba miŋɔɔ; ni mitsɔ̃ tamɔ mɔ ni fãa amɛdaaŋ manyoflɛ, ni mikɛ niyenii ma amɛhiɛ.”

⁵ “Amɛaaku amɛsɛɛ kɛaatee Ijipt shikpɔŋ lɛ nɔ, ni Asiria aaaye amɛnɔ, ejaakɛ amɛkpɛlɛ̃ɛɛ akɛ amɛkpaleɔ kɛbaa miŋɔɔ.

⁶ Taitai baate shi yɛ amɛmaji lɛ anɔ, ni abaakumɔ amɛmaji lɛ agboi lɛ asɛɛ adabaŋi lɛ. Aaakpãtã amɛhiɛ ejaakɛ amɛkɛ amɛhe fɔ̃ amɛ diɛŋtsɛ amɛnilee nɔ.

⁷ Beiaŋ ni mimɛi lɛ ekã akɛ shimɔ nɔŋŋ kɛ̃ amɛaashi mi lɛ, kɛ̃ɛmɔ nɔŋŋ kɛ̃ amɛaakɛ̃mɔ yɛ amɛkɔŋtso ni kã amɛkuɛ lɛ hewɔ, shi mɔ ko woŋ yɛ amɛnɔ.

⁸ “Ao Israel, te mafee tɛŋŋ maŋmɛɛ ohe hu? Te mafee tɛŋŋ makwa bo hu? Aso manyɛ ohiɛ makpãtã tamɔ bɔ ni mifee Adma lɛ; aloo tamɔ bɔ ni mikɛ Zeboim ye lɛ? Mitsui miitswa yɛ mimli, ni mimusuŋ miitsɔ̃ mi yɛ ohe.

⁹ Mikɛ mlifu yeŋ osane lɛ. Mikpãtãŋ Israel hiɛ dɔŋŋ ejaakɛ Nyɔŋmɔ ji mi, shi jeee gbɔmɔ. Mi, Mɔ Krɔŋkrɔŋ, ni yɔɔ nyɛteŋ lɛ, mibaŋ nyɛŋɔɔ kɛ mlifu.

¹⁰ “Mimɛi lɛ baanyiɛ, mi Yehowa, misɛɛ; beyinɔ ni mabo tamɔ jata lɛ amɛaaba kɛ hekpokpomɔ. Amɛhe aaakpokpo kɛaajɛ anaigbɛ kɛba.

¹¹ Amɛaaba kɛaajɛ Ijipt kɛ hekpokpomɔ tamɔ loofɔji; amɛaaba tamɔ okpoi kɛaajɛ Asiria shikpɔŋ lɛ nɔ; ni mikɛ amɛ aaaku sɛɛ kɛaaba amɛ diɛŋtsɛ amɛshĩai amli ekoŋŋ. Mi, Yehowa, mi mikɛɛ.”

Abu Yuda kɛ Israel fɔ

¹² Yehowa kɛɛ, “Israelbii ebɔle mihe kɛkpe kɛ amale kɛ mɔshishiumɔ, ni Yudabii kã he amɛmiitse miihiɛ atua, mi ni ji Nyɔŋmɔ anɔkwafo kɛ mɔ krɔŋkrɔŋ lɛ.”