Hosea 1 - ŊMALƐ KRƆŊKRƆŊ LƐ

¹ Yehowa wiemɔ ni ekɛ Hosea, ni ji Beeri bi lɛ, wie yɛ Yuda maŋtsɛmɛi Uzia kɛ Yotam kɛ Ahaz kɛ Hezekia ayinɔ lɛ nɛ. No mli lɛ Yeroboam, Yoash bi lɛ, miiye maŋtsɛ yɛ Israel.

Hosea ŋa kɛ ebii

² Be ni Yehowa kɛ Hosea bɔ̃i wiemɔ lɛ, ekɛɛ Hosea akɛ, “Yaa ni oyaŋɔ yoo ajwamãŋ koni okɛ lɛ afee oŋa; ni bii ni okɛ lɛ baafɔ lɛ baafee ajwamãŋ bii tamɔ bɔ ni shikpɔŋ lɛ nɔ bii lɛ ekwa mi, ni amɛyeee mi anɔkwa lɛ.”

³ No hewɔ lɛ, Hosea tee ni eyaŋɔ Diblaim biyoo ni atsɛɔ lɛ Gomer lɛ. Gomer na musu ni efɔ binuu.

⁴ Yehowa kɛɛ Hosea akɛ, “Wo abifao lɛ gbɛi akɛ, ‘Yezreel’, ejaakɛ eshwɛ fioo kɛkɛ ni lá shi ni Yehu shwie yɛ Yezreel maŋ lɛ mli lɛ mibatɔ he owele yɛ eshwiei anɔ, ni mibagu Yehu we lɛ maŋtsɛyeli yɛ Israel.

⁵ Nakai gbi lɛ nɔ lɛ mibafite Israel tawuu hewalɛ fɛɛ yɛ Yezreel jɔɔ lɛ mli.”

⁶ Gomer na musu ekoŋŋ, ni efɔ biyoo. Kɛkɛ ni Yehowa kɛɛ Hosea akɛ, “Wo abifao lɛ gbɛi akɛ, Lo-Ruhama: ‘Mɔbɔnalɛ etã’, ejaakɛ mikaŋ he mihaŋ mimusuŋ atsɔ̃ mi yɛ Israelbii ahe, ni mikɛfaŋ amɛ dɔŋŋ.

⁷ Shi mimusuŋ aaatsɔ̃ mi yɛ Yuda he, ni mi Yehowa, amɛNyɔŋmɔ lɛ, mibahere amɛyiwala; shi moŋ mitsɔ̃ŋ gãi loo klante loo ta loo okpɔŋɔi loo tayaa okpɔŋɔnɔtalɔi anɔ mihereŋ amɛyiwala.”

⁸ Be ni Gomer etse ebi Lo-Ruhama fufɔ lɛ, esaa ena musu, ni efɔ binuu ekoŋŋ.

⁹ Kɛkɛ ni Yehowa kɛɛ Hosea akɛ, “Wo abifao lɛ gbɛi akɛ, Lo-Ammi ‘Nyɛjeee mimaŋ,’ ejaakɛ Israelbii jeee mimaŋ dɔŋŋ, ni mi hu jeee amɛNyɔŋmɔ ji mi.”

Abaatee Israel shi ekoŋŋ

¹⁰ Shi kɛ̃lɛ Israelbii ayikulɛ aaatamɔ ŋshɔnaa shia ni anyɛŋ asusu aloo akane. Kɛji nakai be lɛ shɛ lɛ, he ni akɛɛ amɛ yɛ akɛ, ‘Nyɛjeee mimaŋ lɛ,’ jɛi nɔŋŋ abaakɛɛ amɛ yɛ akɛ, “Nyɔŋmɔ hiɛkãalɔ lɛ bii ji nyɛ.”

¹¹ No mli Yudabii kɛ Israelbii anaa aaabakpe shi kɛfee ekome, ni amɛaato mɔ koome akɛ amɛ fɛɛ amɛhiɛnyiɛlɔ, ni amɛaashwere yɛ shikpɔŋ lɛ nɔ ekoŋŋ, ejaakɛ Yezreel gbi lɛ gbi wulu ni.