Hiob 5 - ŊMALƐ KRƆŊKRƆŊ LƐ

¹ “Agbɛnɛ Hiob, boo ni otsɛ akɛ mɔ ko kwraa yɛ ni aaahere bo nɔ lo? Bɔfoi lɛ ateŋ namɔ ŋɔɔ oootee?

² Eji anɔkwale sane akɛ mlila sɔŋŋ gbeɔ kwashia, ni awuŋayeli gbeɔ mɔ ni hiɛ etɛ̃ɛɛ.

³ Mina kwashiai ni miihe shi ahe dã; shi amrɔ nɔŋŋ ni milomɔ amɛwe lɛ.

⁴ Amɛbii kɛ shweshweeshwefeemɔ teŋ jɛkɛ, anaanaa amɛnɔ yɛ koishi, ni mɔ ko kwraa bɛ ni aaahere amɛ.

⁵ Hɔmɔwɔlɔi aaaye enikpamɔ nii, ŋmei ateŋ nii eeena ekɔlɔ; mɛi aaaye enii he kumai.

⁶ Amanehulu jɛɛɛ mlu mli baaa, ni haomɔ hu ekwɛ̃ɛɛ kɛjɛɛɛ shikpɔŋ;

⁷ shi gbɔmɔ lɛ, afɔ lɛ ahã haomɔ, tamɔ bɔ ni lalilɛi tsɛ̃rɛɔ kɛjɛɔ la mli kɛyaa ŋwɛi lɛ.

⁸ “Mi ji bo kulɛ, matao Nyɔŋmɔ sɛɛgbɛ, ni Nyɔŋmɔ dɛŋ matu misane lɛ mawo,

⁹ lɛ mɔ ni efeɔ nibii wuji ni anaaa naa, kɛ naakpɛɛ nibii hu ni ehiii kanemɔ lɛ.

¹⁰ Ehãa nu nɛɔ shikpɔŋ lɛ nɔ, ni eshwieɔ ŋmɔji anɔ nu;

¹¹ Eholeɔ humii anɔ grɔŋŋ, ni eshɛjeɔ ŋkɔmɔyelɔi amii.

¹² Efiteɔ ŋai ni hiɛtɛ̃lɔi tsɔ̃ɔ, ni ehãa amɛnine nyɛɔ shi.

¹³ Ekɛ ŋaatsɔlɔi nɔŋŋ aŋaa duɔ amɛ, ni efiteɔ mɛi fɔ̃ji ayiŋtoi fɔ̃ji lɛ.

¹⁴ Duŋ woɔ amɛ shwane fintiŋŋ, ni amɛgbugbuɔ shi shwane mlemle tamɔ mɛi ni nyiɛɔ nyɔɔŋ.

¹⁵ Ehereɔ awusai ayiwala kɛjeɔ mɛi fɔ̃ji adaaŋ, ni ehereɔ ohiafo yɛ yiwalɔ dɛŋ.

¹⁶ No hewɔ lɛ, ohiafo yɛ hiɛnɔkãmɔ, ni toikɔdɔmɔ saneyeli muɔ shi kɔ̃i.

¹⁷ “Naa, ajɔɔ mɔ ni Nyɔŋmɔ kãa lɛ lɛ, no hewɔ lɛ, ekafee bo dɔlɛ kɛji Ofe lɛ kã bo.

¹⁸ Ejaakɛ epilaa mɔ, shi lɛ nɔŋŋ efiɔ nɔ, etswaa mɔ nɔ, ni enine nɔŋŋ tsaa.

¹⁹ Ebaajie bo yɛ amanehului babaoo amli hu, nɔ ko nɔ ko efeŋ bo.

²⁰ Hɔmɔ be mli lɛ ebaajie bo yɛ gbele mli, ni ta mli hu lɛ, oooje klante naa.

²¹ Nyɔŋmɔ baabaa oyi kɛjɛ gbɔmɔ naabu fitemɔ mli; ni kɛji hiɛkpãtãmɔ miiba lɛ osheŋ gbeyei.

²² Oooŋmɔ hiɛkpãtãmɔ kɛ hɔmɔ fɛɛ, ni osheŋ ŋaŋ kooloi agbeyei.

²³ Tɛi ehiŋ shikpɔŋ ni ohuɔ nɔ, ni ŋaŋ kooloi kɛ bo aaahi shi kpoo.

²⁴ Enɛ aaahã ole akɛ owe lɛ yɛ shweshweeshwe, ni oookpa otoi anaa, ni ooona akɛ amɛyɛ shweshweeshwe.

²⁵ Ooona hiɛnɔkãmɔ akɛ oshwiei ayi aaafa tamɔ shikpɔŋ nɔ jwɛi.

²⁶ Ooogbɔ kotokoto dani ooogbo, tamɔ bɔ ni ŋmãa tsɛɔ ni esaa dani ebashɛɔ ŋmãagbeemɔhe lɛ.

²⁷ Hiob, nɔ ni wɔkpa shi wɔna nɛ. Anɔkwale ni, no hewɔ lɛ, okɛbu ohe.”