Hiob 32 - ŊMALƐ KRƆŊKRƆŊ LƐ

Elihu wiemɔ

¹ Kɛkɛ ni hii etɛ̃ lɛ fɔ̃ɔ Hiob hetoohãmɔ, ejaakɛ amɛna akɛ Hiob wiemɔ lɛ miitsɔ̃ɔ akɛ efeko nɔ fɔŋ ko.

² Kɛkɛ ni Elihu, Buznyo Barakel ni jɛ Ram weku lɛ mli lɛ, mli wo la. Emli wo la ewo Hiob, ejaakɛ Hiob bu ehe jalɔ ni eshwa Nyɔŋmɔ.

³ Emlifu Hiob nanemɛi etɛ̃ lɛ hu, ejaakɛ amɛnaaa hetoo ko amɛhã Hiob, tsɛbelɛ amɛtsɔ̃ hiɛ amɛbua he akɛ Hiob yeɔ fɔ.

⁴ Elihu mɛ be fioo dani ekɛ Hiob wie, ejaakɛ Hiob nanemɛi lɛ ye lɛ onukpa.

⁵ Be ni Elihu na akɛ hii etɛ̃ nɛɛ bɛ nɔ ko dɔŋŋ ni amɛkɛɔ Hiob lɛ, emli wo la.

⁶ Kɛkɛ ni Elihu, Buznyo Barakel bi lɛ, here nɔ ni ekɛɛ akɛ, “Gbekɛ ji mi yɛ afii amli, shi nyɛ lɛ nyɛdara; no hewɔ lɛ, mishe gbeyei ni mikɛ misusumɔ aŋmɛ nyɛhiɛ.

⁷ Mikɛɛ mihe akɛ nyɛ ji mɛi ni esa akɛ nyɛwie; nyɛ waŋtsɛmɛi nyɛwieɔ ni akaseɔ nii kɛjɛɔ nyɛdɛŋ.

⁸ Shi kɛ̃lɛ mumɔ ni yɔɔ adesa mli, Ofe lɛ mumɔ ni ekɛmuɔ lɛ, no hãa enaa jwɛŋmɔ.

⁹ Jeee dalɛ ni hãa mɔ leɔ nii, ni jeee gbɔlɛ hu ni hãa anuɔ sane shishi.

¹⁰ No hewɔ lɛ, nyɛboa mi toi koni mi hu mawie mijwɛŋmɔ.

¹¹ Naa, mito mitsui shi mibo nyɛwiemɔi lɛ atoi, mimɛ beiaŋ ni nyɛtaoɔ nɔ ni nyɛaakɛɛ lɛ.

¹² Mibo nyɛ toi aahu; ni naa, nyɛteŋ mɔ ko mɔ ko ekuuu ewooo Hiob naa; aloo nyɛteŋ mɔ ko ehã ewiemɔi lɛ ahetoo.

¹³ Nyɛkwɛa ni nyɛkakɛa akɛ, ‘Wɔle nii. Nyɔŋmɔ ni aaaku enaa, shi jeee gbɔmɔ.’

¹⁴ Ewieko eshiko mi, ni mikɛ nyɛnaa wiemɔi lɛ haŋ lɛ hetoo.

¹⁵ Ashi amɛ shi, amɛhãaa hetoo dɔŋŋ; amɛbɛ nɔ ko ni amɛkɛɔ dɔŋŋ.

¹⁶ Ni esa akɛ mimɛɔ ejaakɛ amɛwieee; amɛdamɔ shi diŋŋ ni amɛhãaa wiemɔ ko hetoo dɔŋŋ?

¹⁷ Mi hu makɛɛ minɔ; ni mi hu mawie nɔ ni misusuɔ.

¹⁸ Ejaakɛ minyɛɛɛ mamua minaa dɔŋŋ; mumɔ ni yɔɔ mimli lɛ ekpɛlɛ̃ɛɛ mi dɔŋŋ.

¹⁹ Naa, mitsui etsɔ̃ tamɔ wain ni atsi naa kpɛŋŋ, ni ebɛ mumɔhe, etamɔ wain wolotɔi hei ni heɔ aflɛ.

²⁰ Mawie koni mana hejɔlɛ. Ja migbele minaa mihã hetoo.

²¹ Mikwɛŋ mɔ ko mɔ ko hiɛ, ni midɔkɔŋ minaa mihaŋ mɔ ko.

²² Ejaakɛ mileee mɔhɔlɔmɔ; nakai ni kulɛ Nyɔŋmɔ, miBɔlɔ lɛ, aaafo miwala sɛɛ biɛ be kukuoo mli.”