Hiob 31 - ŊMALƐ KRƆŊKRƆŊ LƐ

¹ Mikã mihiŋmɛi kitã ni no hewɔ lɛ, te aaafee tɛŋŋ mahã oblayoo foro he afee mi akɔnɔ hu?

² Mɛni mana kɛaajɛ Nyɔŋmɔ ni yɔɔ ŋwɛi nɛɛ dɛŋ? Ni mɛni aaafee migbɛfaŋ nɔ ni Ofe ni yɔɔ ŋwɛi lɛ baahã mi?

³ Ani jeee hiɛkpãtãmɔ kã shi hã mɛi ni feɔ nɔ fɔŋ? Kɛ osharã hã mɛi ni feɔ nishaianii?

⁴ Ani Nyɔŋmɔ leee mijeŋba, ni ekaneee minanefaamɔi?

⁵ Kɛji miba mijeŋ kɛ kutumpɔo, ni miye oyai mishishiu mɔ ko lɛ,

⁶ no lɛ Nyɔŋmɔ kɛ nsɛni ni ja aŋmɛ mi koni ena akɛ kpako bɛ mihe.

⁷ Kɛji migba afã yɛ minyiɛmɔŋ, ni mitsui eyadi mihiŋmɛi sɛɛ, ni muji ko kpɛtɛ miniji ahe lɛ,

⁸ no lɛ nii ni madu lɛ, mɔ kroko aaaye, ni ŋmɔshinii ni aaakwɛ̃ ahã mi lɛ, afãmɔ ashwie.

⁹ Kɛji minaanyo ŋa he efee mi akɔnɔ pɛŋ, ni miyawo ka yɛ minaanyo shinaa shi pɛŋ lɛ,

¹⁰ no lɛ hã miŋa ahoo nii ahã nuu kroko, ni mɛi krokomɛi kɛ lɛ ana bɔlɛ.

¹¹ Ejaakɛ hiɛgbeji asane kpeteŋkple ni; eji nɔ fɔŋ ni kojolɔi lɛ baagbala etoi,

¹² ejaakɛ tɔ̃mɔ lɛ baatsɔ̃ la ni baashã nii kɛshɛ abonsamiiaje, ni ebaashã nii ni miyɔɔ fɛɛ wɛɛ kɛmɔ shi.

¹³ Kɛji miyeee mitsulɔ nuu loo mitsulɔ yoo jalɛ sane be ni amɛ kɛ mi ena lɛ,

¹⁴ no lɛ te mafee tɛŋŋ kɛji Nyɔŋmɔ te shi wo mi lɛ? Kɛji eba kojomɔ lɛ, te majie minaa makɛɛ tɛŋŋ?

¹⁵ Ani mɔ ni bɔ mi ewo musuŋ lɛ jeee lɛ nɔŋŋ ebɔ amɛ? Ani jeee mɔ koome shɔ̃ wɔ fɛɛ yɛ musuŋ?

¹⁶ Kɛji mikãma ohiafoi anii ni amɛtaoɔ, aloo mihã jeŋ fee okulafo awerɛho,

¹⁷ aloo miye nii mikome pɛ, ni mihãaa awusãi eko

¹⁸ tsɛbelɛ mi mihiɛ lɛ akɛ tsɛ kɛjɛ eblahiiaŋ, ni kɛjɛ enyɛ musuŋ beebe lɛ mi miwa lɛ.

¹⁹ Kɛji mina mɔ ko ni efĩ lɛ ni mama bɛ ehe, loo ohiafo ko ni bɛ nɔ ni ehaa lɛ,

²⁰ no lɛ mahã lɛ mama ni akɛ mi diɛŋtsɛ mitoo he tsɔi lo koni ehe afee kulɔɔ, kɛkɛ lɛ ebaajie miyi kɛ etsuiŋ fɛɛ.

²¹ Kɛji miwo minine nɔ yɛ awusã ko nɔ, ejaakɛ mile akɛ abaabu mi bem yɛ kojomɔhe lɛ,

²² no lɛ mikɔ̃ŋ lɛ akpɔ yɛ mikɔ̃ŋ wu lɛ he, ni minine hu atse kɛje kɔ̃ŋ wu lɛ he.

²³ Ejaakɛ misheɔ Ofe lɛ dɛŋ hiɛkpãtãmɔ lɛ gbeyei. Ni minyɛŋ Ofe lɛ hiɛ madamɔ.

²⁴ Kɛji miŋɔ shika mifee mihiɛnɔkãmɔ, aloo mitsɛ shika ŋmiiŋmi mihiɛnɔkãmɔ,

²⁵ ni minya ejaakɛ minii ni mina fa babaoo, ni minine eshɛ nii babaoo nɔ

²⁶ kɛji mikwɛ hulu ni eetso, loo nyɔɔŋtsere bɔ ni ekpɛɔ fɛɛfɛo kɛhoɔ.

²⁷ Kɛji nɔ ko elaka mitsui ni miwo amɛ yɛ teemɔŋ ni mishwɔ minine naa kɛ hiɛsɔlɛ mihã amɛ lɛ,

²⁸ no hu nifɔɔjianii ni esa akɛ kojolɔi lɛ awo he nyɔmɔ ni. Ejaakɛ kulɛ miyeko Nyɔŋmɔ ni yɔɔ ŋwɛi lɛ anɔkwa.

²⁹ Minyako yɛ osharã ni esharã mihenyɛlɔ hewɔ, ni mimli efiliko mi be ni amanehulu eba enɔ.

³⁰ Miŋmɛko minaabu gbɛ ni efee esha, ni mitaoko egbele kɛ kitãkãmɔ.

³¹ Mishĩaŋbii ekɛŋ akɛ, ‘Wɔteŋ namɔ yeko edɛŋ niyenii etɔko dã?’

³² Gbɔ ko gbɔ ko etooo blohuŋ; migbeleɔ mishinaa mihãa gbɔ be fɛɛ be.

³³ Mitsimɔko mitɔ̃mɔi anɔ tamɔ Adam, ni mikɛ minɔsha lɛ etoko mimli.

³⁴ Miishe mɛi asafo lɛ gbeyei, ni bɔ ni wekui baanyaŋe mi hu woɔ mihe gbeyei, ni no hewɔ ni mifee diŋŋ, ni mishiii shĩa mijeee kpo ejaakɛ miishe amɛ gbeyei.

³⁵ Oo, mina mɔ ko ni aaabo mi toi! Naa, minine naa okadi! Ofe lɛ ahã mi hetoo! Oo, mina ni kulɛ mɔ ni kɛ mi ena lɛ eŋmala saji ni ekɛshiɔ mi lɛ ewo wolo hiɛ!

³⁶ Anɔkwa, kulɛ makɔ matswa mikɔŋ, ni mikɛbaafee akekre mafi miyitso.

³⁷ Kulɛ matsɔ̃ɔ Nyɔŋmɔ nibii fɛɛ ni mifee, ni matsi mabɛŋkɛ lɛ tamɔ lumɔ

³⁸ kɛji shikpɔŋ ni mihu nɔ bolɔ wo mi ni enɔ akofii wo yara kutuu;

³⁹ kɛji mikpa shikpɔŋ lɛ nɔ yibii miye ni miwooo nyɔmɔ, ni no nɔ tsɔ̃ ni nɔtsɛmɛi lɛ gboi lɛ,

⁴⁰ no lɛ ŋmei akwɛ̃ yɛ ŋmãa najiaŋ, ŋmei gbohii akwɛ̃ yɛ abele najiaŋ.” Hiob wiemɔ lɛ naagbee nɛ.