Hiob 30 - ŊMALƐ KRƆŊKRƆŊ LƐ

¹ Shi agbɛnɛ mɛi ni miye amɛ onukpa miiŋmɔ mi; mɛi ni mibuŋ amɛtsɛmɛi bɔ ni maŋɔ amɛ mafata gbei ni buɔ tookui tete ahe lɛ anɔ.

² Mɛɛ sɛɛ mibana yɛ mɛi ni egbɔlɔ ahe?

³ Ohia kɛ hɔmɔ ni naa wa hãa amɛkpeɔ ŋa gbiŋ nɔ tsei ashishifãi.

⁴ Amɛfamɔɔ shiaŋaŋ tsei, ni amɛtsɛrɛɔ koowie bai ni amɛshɛreɔ blɔtsei amɛwereɔ.

⁵ Ashwieɔ amɛ kɛjeɔ gbɔmɛi ateŋ, ni awɔɔ amɛyi tamɔ awɔɔ julɔ yi.

⁶ Nujɔi ajɔi amli kɛ shikpɔŋ bui kɛ tɛkploi amli amɛaahi.

⁷ Koowiei ashishi amɛbolɔɔ yɛ; sɔŋsrɔ shishi amɛbuaa amɛhe naa yɛ.

⁸ Kwashiai yakagbɔmɛi abii; ayi amɛ, ashwie amɛ kɛje shikpɔŋ lɛ nɔ.

⁹ Shi agbɛnɛ, mitsɔ̃ amɛdaaŋ kotsa, ni mitsɔ̃ fɛoyeli wiemɔ mihã amɛ.

¹⁰ Amɛnyaŋeɔ mi; amɛwiɔ amɛhe yɛ mihe, kɛji amɛna mi lɛ amɛtsɛ̃ɔ lajɔ̃.

¹¹ Akɛni Nyɔŋmɔ ehã migbɔjɔ ni eba mi shi hewɔ lɛ, amɛhiɛ gbooo nɔ ni amɛfeɔ he yɛ mihiɛ.

¹² Yakagbɔmɛi teɔ shi yɛ mininejurɔ nɔ, ni amɛshwieɔ mi kɛyaa sɛɛ, ni amɛkaa mihiɛ kpãtãmɔ tete.

¹³ Amɛtsimɔɔ migbɛ ni matsɔ̃ nɔ lɛ, ni amɛbɔɔ mihiɛkpãtãmɔ he mɔdɛŋ, ni mɔ ko ebooo amɛ tswai!

¹⁴ Amɛkeɔ kɛbaa tamɔ mɛi ni egbu gbogbo ewo mli ni amɛbashwieɔ minɔ.

¹⁵ Adɔ gbeyei nibii ayi kɛba minɔ, minunyam etã oookɛɛ kɔɔyɔɔ ni etswa kɛtee; kɔɔyɔɔ etswa nii ni mina fɛɛ kɛtee tamɔ atatu.

¹⁶ Agbɛnɛ eshɛ migbele be, ni mikã nɔnaa mli gbii abɔ nɛɛ.

¹⁷ Duŋ lɛ hãa miwui amli kpeɔ mi, mipiŋmɔ lɛ ejɔɔɔ.

¹⁸ Enaawalɛ lɛ kpitiɔ mitade lɛ: efiɔ lɛ kɛmɔɔ misɛ̃.

¹⁹ Nyɔŋmɔ eshɛ mi efɔ̃ ŋmɔtɔ mli, ni mitsɔ̃ tamɔ mlu kɛ lamlu.

²⁰ Mibolɔɔ mitsɛɔ bo, shi ohereee mi nɔ; mihoɔ midamɔɔ shi misɔleɔ; shi okwɛɛɛ mi po.

²¹ Oowa mi yi; okɛ ohewalɛ fɛɛ miipiŋ mi.

²² Owoɔ mi owoɔ kɔɔyɔɔ mli, ni etswaa mi kɛfoɔ shi; ni otswiaa mi shi kɛbɔleɔ shi yɛ ahum mli.

²³ Hɛɛ, mile akɛ okɛ mi baaya ayahã gbele, ni ji shĩa ni ato ahã hiɛkãalɔi fɛɛ lɛ.

²⁴ Kɛ̃lɛ aso mɔ ni kã hiɛkpãtãmɔ mli kpãaa enineŋ yɛ emanehulu lɛ mli ni ebi yelikɛbuamɔ lo?

²⁵ Ani mifooo mihãaa mɔ ni yɔɔ haomɔ mli? Ani misusuma werɛ hooo hãaa ohiafo?

²⁶ Shi be ni mikwɛ nɔ kpakpa gbɛ lɛ, nɔ fɔŋ moŋ ni ba; ni be ni mimɛ la lɛ, duŋ moŋ wo mi.

²⁷ Mitsui miitswa kɛ hejaramɔ, ni enyɔɔɔ shi; amanehulu gbii enina mi.

²⁸ Duŋ ewo mi kɛmiiya kɛmiiba; ni hulu etsooo ehãaa mi kwraa, mihoɔ midamɔɔ shi yɛ maŋ, ni mibiɔ yelikɛbuamɔ.

²⁹ Mitsɔ̃ ŋaŋgbei anyɛmi kɛ okpɔŋɔloofɔji anaanyo.

³⁰ Mihewolo edĩ, ni eekpɔlɔ yɛ mihe eeshwie shi; ni miwui amli miishã mi.

³¹ Mikpãa saŋku lɛ gbɛɛmɔ etsɔ̃ ŋkɔmɔyeli, ni mibɛlɛ gbɛɛmɔ etsɔ̃ yaafolɔi agbee.