Hiob 23 - ŊMALƐ KRƆŊKRƆŊ LƐ

Hiob wiemɔ

¹ Kɛkɛ ni Hiob here nɔ akɛ,

² “Ŋmɛnɛ hu mikɔmɔyeli lɛ naa wa; minyɛɛɛ mitsɔidɔɔmɔ lɛ naa mamɔ.

³ Oo, mile he ni mana lɛ yɛ kulɛ maya esɛi lɛ hiɛ tɔ̃ɔ.

⁴ Mikɛ misane lɛ baafɔ̃ ehiɛ, ni mibakɔlɔ misane lɛ fɛɛ yɛ ehiɛ.

⁵ Mana male nɔ hetoo ni eeehã mi ni mana manu nɔ ni eeekɛɛ mi lɛ shishi.

⁶ Aso Nyɔŋmɔ kɛ mi aaatao naa yɛ ehewalɛ kpeteŋkple lɛ naa? Dabida; eeebo mi toi kɛ̃.

⁷ Mɔ ni feɔ jalɛnii kɛ Nyɔŋmɔ aaayiyi yɛ jɛi; ni mikojolɔ lɛ aaabu mi bem ni maye mihe kɛaatee naanɔ.

⁸ Naa, kɛji mitee bokãgbɛ lɛ, ebɛ jɛi, ni miba anaigbɛ hu, minaaa lɛ.

⁹ Mitao lɛ yɛ kooyigbɛ, shi minaaa lɛ; mitsɔ̃ mihe kɛtee wuoyigbɛ hu, shi mihiŋmɛi gbaaa enɔ.

¹⁰ Shi Nyɔŋmɔ le minanefaamɔi fɛɛ; kɛji eka mi ekwɛ lɛ ebaana mi akɛ shika ŋmiiŋmi.

¹¹ Minyiɛ enanefãamɔ sɛɛ pɛpɛɛpɛ; no mli minyiɛ; migbako afã.

¹² Mitswako Nyɔŋmɔ naa wiemɔ ko mifɔ̃ko afã dã; mikɛto mitsui shishi tɔ̃ɔ.

¹³ Etsakeee; ni Lɛ lɛ eyɛ bɔ ni eyɔɔ kɛjɛ sa, ni namɔ aaanyɛ enaa eku. Nɔ ni esumɔɔ lɛ, no efeɔ.

¹⁴ Nɔ ni eto ehã mi lɛ, ebaafee kɛgbe naa; ni nibii ni tamɔ enɛɛmɛi pii yɛ eyiŋ.

¹⁵ No hewɔ lɛ, ŋmiŋmi mɔɔ mi yɛ ehiɛ; kɛji mishwie miyiŋ lɛ, misheɔ lɛ gbeyei.

¹⁶ Nyɔŋmɔ ehã mitsui efã; Ofe lɛ ewo mihe gbeyei,

¹⁷ ejaakɛ duŋ ebɔle mi kɛkpe ni duŋ kabitii ha mihiɛ.