Hiob 2 - ŊMALƐ KRƆŊKRƆŊ LƐ

Abonsam ka Hiob ekwɛ ekoŋŋ

¹ Be ni eshɛ gbi ko ni ŋwɛi bɔfoi ni sɔmɔɔ Nyɔŋmɔ yɛ ŋwɛi lɛ tee amɛyadamɔ Nyɔŋmɔ hiɛ ekoŋŋ lɛ, Abonsam futu amɛ kɛtee, ni lɛ hu eyadamɔ Nyɔŋmɔ hiɛ eko.

² Yehowa bi Abonsam akɛ, “Nɛgbɛ ojɛ obaa nɛ?” Abonsam to he akɛ, “Mijɛ shikpɔŋ lɛ nɔ; miyakpa nɔ; ni miyashara shi yɛ nɔ.”

³ Kɛkɛ ni Yehowa bi Abonsam akɛ, “Osusu mitsulɔ Hiob he akɛ mɔ ko mɔ ko bɛ shikpɔŋ lɛ nɔ ni tamɔ lɛ, ni anɔkwafo ni, ni esheɔ Nyɔŋmɔ gbeyei, ni ewiɔ ehe yɛ efɔŋ he; ni shwamɔ ko bɛ ehe, ni efeɔ nɔ ni ja? Ehiɛ enɔkwayeli lɛ mli kpɛŋŋ lolo tsɛbelɛ ohã mite shi miwo lɛ koni mikpãtã ehiɛ yakatswaa!”

⁴ Abonsam to he hã Yehowa akɛ, “Gbɔmɔ baaŋmɛɛ nii fɛɛ ni eyɔɔ he bɔ ni afee kɛkɛ ni eyi ana wala.

⁵ Shi bo lɛ taa egbɔmɔtso he kɛkɛ okwɛ akɛ ekwaŋ bo yɛ ohiɛ lo?”

⁶ Kɛkɛ ni Yehowa kɛɛ Abonsam akɛ, “Ojogbaŋŋ, mijɔɔ enɔ miwo odɛ̃ŋ; shi obaa ewala yi kɛkɛ.”

⁷ No hewɔ lɛ, Abonsam shi Yehowa hiɛ, ni etee; ni ehã asane ni waa mɔ he waa tsɛ̃rɛ Hiob kɛjɛ enaneshi aahu kɛyashi epampam.

⁸ Hiob kɛ ŋɛsuko wamɔɔ ehe, ni eho eta mlu mli.

⁹ Hiob ŋa bi lɛ akɛ, “Ohiɛ anɔkwayeli nɛɛ mli kpɛŋŋ lolo? Mɛɛba okwaaa Nyɔŋmɔ koni ogbo?”

¹⁰ Hiob kɛɛ eŋa lɛ akɛ, “Oowie tamɔ bɔ ni yei kwashiai lɛ wieɔ lɛ. Nɔ kpakpa lɛ wɔhe kɛjɛ Nyɔŋmɔ dɛŋ. Mɛɛba ni nɔ fɔŋ lɛ wɔkahe?” Enɛ fɛɛ mli lɛ, Hiob naa tɛɛɛ shi, ni ewieee wiemɔ gbonyo ko.

Hiob nanemɛi ba eŋɔɔ

¹¹ Be ni nanemɛi etɛ̃ komɛi ni Hiob yɔɔ lɛ nu amanehulu fɛɛ ni eba Hiob nɔ lɛ he lɛ, amɛjɛjɛɛ amɛshihilɛhei amɛba Hiob ŋɔɔ. Enaanyo Elifaz jɛ Teman, ni Bildad jɛ Shua, ni Zofar jɛ Naama. Nanemɛi nɛɛ ye fua akɛ amɛaatee kutuu amɛyaye Hiob ŋkɔmɔ, ni amɛshɛje emii.

¹² Nanemɛi nɛɛ na Hiob yɛ shɔŋŋ, shi amɛyooo lɛ. Shi be ni amɛyoo Hiob lɛ, amɛfo waa; amɛteŋ mɔ fɛɛ mɔ kɛ dɔlɛ gbala ehe atade, ni amɛloo mlu amɛwo amɛyiteiaŋ.

¹³ Nanemɛi lɛ ho amɛta Hiob masɛi yɛ shikpɔŋ, shwaneshwane kɛ nyɔɔŋnyɔɔŋ gbii kpawo sɔŋŋ. Amɛteŋ mɔ ko mɔ ko kɛ Hiob ewieee wiemɔ kome nɛkɛ, ejaakɛ amɛna akɛ eena nɔ jogbaŋŋ diɛŋtsɛ.