Hiob 16 - ŊMALƐ KRƆŊKRƆŊ LƐ

Hiob wiemɔ

¹ Kɛkɛ ni Hiob to he akɛ,

² “Minu saji ni tamɔ enɛɛmɛi aahu; miishɛjelɔ gbohii ji nyɛ fɛɛ.

³ Aso yaka wiemɔi nɛɛ agbeŋ naa? Ni mɛni ta omli hewɔ ni ohere wiemɔ lɛ nɔ nɛɛ?

⁴ Eji nyɛgbɔmɔtso baje migbɔmɔtso mli jikulɛ, mi hu mawie tamɔ nyɛwieɔ nɛɛ; mawie mashi nyɛ, ni mahoso miyitso mawo nyɛ.

⁵ Nakai nɔŋŋ kulɛ mawo nyɛ hewalɛ kɛ midaaŋ wiemɔ, ni midaaŋ wiemɔ baahã nyɛwerɛho lɛ naa aba shi.

⁶ Kɛji miwie lɛ, mipiŋmɔ lɛ ejɔɔɔ, ni kɛji mifee dioo hu, enɔ enyiɛ po ni gbɔɔ?

⁷ Anɔkwa, Nyɔŋmɔ ehã eje mitsine; ehã mihe gbɔmɛi fɛɛ etã.

⁸ Ehã mikũakũai ni enɛ yeɔ odase eshiɔ mi; milootãa lɛ yeɔ odase shiɔ mi faŋŋ.

⁹ Nyɔŋmɔ kɛ mlifu etserɛ mimli; ebɛ mi ewo emli; ekpe enyanyɔji ashi ewo mi; etsu ehiŋmɛi eshwie minɔ tamɔ henyɛlɔ feɔ.

¹⁰ Mɛi gbɛɔ amɛdaaŋ amɛwoɔ mi kɛ naakpɛɛ; amɛgbalaa mitoiiaŋ ma kɛbɔɔ mi ahora; amɛbuaa amɛhe naa amɛwoɔ mi.

¹¹ Nyɔŋmɔ eŋɔ mi ehã mɛi fɔ̃ji, ni etu mi ewo yiwalɔi adɛŋ.

¹² Kulɛ mihe ejɔ mi, ni Nyɔŋmɔ kɔ miyinɔ tɛ; emɔ mikuɛ, ni ekɛ mi tswia shi, ni ekumɔ mi dukuduku.

¹³ Egãitsɛ̃lɔi lɛ bɔle mi kɛkpe kpula; ekɛ kakla gbala misabai amli, ni ekɔ̃ɔɔ efiliii kwraa; efɔse midrɔ eshwie shikpɔŋ.

¹⁴ Epila mihei srɔtoi; ni etsɛ̃ kɛba minɔ oookɛɛ henyɛlɔ tabilɔ.

¹⁵ Mikpɛ kpekpe miha miheloo he. Naa mi, mita mlu mli tamɔ mɔ ni aye enɔ kunim.

¹⁶ Yaafo ehã mihiɛ etsu fɔɔ, ni mihiŋmɛii anaa etitii, ni edi tuŋŋ;

¹⁷ tsɛbelɛ mikɛ minine yeko awui ko, ni misɔleɔ mikpaa Nyɔŋmɔ fai kɛ tsui krɔŋŋ.

¹⁸ Oo shikpɔŋ, kaaha milá lɛ nɔ! Oo, shikpɔŋ, kaatsimɔ sane fɔŋ ni aye mi lɛ nɔ; hã miyaafo ashɛ hei fɛɛ.

¹⁹ Naa, amrɔmrɔ nɛɛ tete midasefonyo yɛ ŋwɛi; mɔ ni baawie ehã mi lɛ yɛ ŋwɛi flooflo.

²⁰ Minanemɛi miiye mihe fɛo; shi miifo miitsɔ̃ɔ Nyɔŋmɔ.

²¹ Mina mɔ ko ni ekɛ Nyɔŋmɔ awie ahã mi, tamɔ bɔ ni gbɔmɔ damɔɔ mli hãa enaanyo gbɔmɔ lɛ.

²² Ejaakɛ biɛ afii fioo ko sɛɛ lɛ, mibaya he ni mikuŋ misɛɛ kɛjɛŋ kɛbaŋ dɔŋŋ.