Hiob 13 - ŊMALƐ KRƆŊKRƆŊ LƐ

¹ Naa, mina nibii nɛɛ fɛɛ kɛ mi diɛŋtsɛ mihiŋmɛi, ni mitoi hu enu, ni minu shishi.

² Nɔ ni nyɛle lɛ, mi hu mile; nyɛfeee mi yɛ enɛɛmɛi agbɛfaŋ.

³ Shi mi lɛ Ofe lɛ mitaoɔ mikɛwie, Nyɔŋmɔ ji mɔ ni mitaoɔ mikɛyiyi ni matsɔ̃ɔ lɛ misane lɛ naa.

⁴ Shi nyɛ lɛ, nyɛkɛ abla eto nyɛhiɛ, tsofatsɛmɛi ni bɛ nɔ ko mli ji nyɛ fɛɛ.

⁵ Oo, nyɛmuaa nyɛnaa moŋ kulɛ eeehi pam, ejaakɛ no aaatsɔ̃ nyɛnilee.

⁶ Agbɛnɛ nyɛboa misane lɛ toi, ni nyɛfea toi nyɛhãa minaajiemɔ lɛ.

⁷ Ani nyɛaato abla nyɛwo Nyɔŋmɔ naa, ni nyɛaawie nɔ ni bɛ mli nyɛhã lɛ?

⁸ Ani nyɛmiiwie kɛmiifã Nyɔŋmɔ he lo? Ani nyɛbaawie nyɛhã Nyɔŋmɔ?

⁹ Ani kɛji Nyɔŋmɔ tao nyɛsaji amli lɛ, nyɛaaye nyɛhe? Ani nyɛaanyɛ nyɛlaka Nyɔŋmɔ tamɔ alakaa adesa lo?

¹⁰ Anɔkwa, Nyɔŋmɔ baakã nyɛhiɛ kɛji nyɛkwɛ hiɛiaŋ yɛ dujiaŋ tete.

¹¹ Aso egbojee lɛ woŋ nyɛhe gbeyei ni ehe ŋmiŋmi hu mɔŋ nyɛ?

¹² Abɛi ni nyɛbubuɔ lɛ tamɔ lamlu; wiemɔi ni nyɛkɛfãa nyɛhe lɛ tamɔ magbɛ.

¹³ Nyɛfea dioo koni manyɛ mawie, ni nɔ ni aaaba minɔ lɛ aba.

¹⁴ Mɛɛ hewɔ maŋɔ miheloo makɔ̃ minaa koni mahiɛ miwala yɛ midɛŋ?

¹⁵ Naa, kɛji eeegbe mi tete lɛ, mibɛ sane ko; mibafã mijeŋba he yɛ ehiɛ kɛ̃.

¹⁶ Enɛ nɔŋŋ aaatsɔ̃ miyiwalaheremɔ, ejaakɛ mɔ fɔŋ nyɛŋ Nyɔŋmɔ hiɛ aba.

¹⁷ Nyɛboa nɔ ni mawie nɛɛ toi jogbaŋŋ, ni nyɛhãa minaajiemɔ lɛ aya nyɛtoiiaŋ.

¹⁸ Naa, misaa minaajiemɔ mito; mile akɛ abaabu mi bem.

¹⁹ Namɔ yɔɔ jɛi ni ekɛ mi batao naa? Kɛji Nyɔŋmɔ ni lɛ, no lɛ mibafee diŋŋ koni magbo kɛkɛ.

²⁰ Feemɔ nibii enyɔ nɛɛ pɛ ohã mi, ni miteŋ mihe yɛ ohiɛ.

²¹ Suu onine yɛ mihe kwraa, ni kaahã ohe ŋmiŋmi miimɔ mi.

²² Oo Nyɔŋmɔ, tsɛ mi, ni mibahere bo nɔ, aloo ŋmɛɛ mi gbɛ koni mawie ni ohã mi hetoo.

²³ Minishaianii kɛ mihe eshai lɛ, enyiɛ ni? Hã male minishaianii kɛ mihe eshai lɛ.

²⁴ Mɛɛba okɛ ohiɛ teɔ mi, ni obuɔ mi akɛ ohenyɛlɔ lɛ?

²⁵ Aso obaafã baa ni kɔɔyɔɔ ehuu lɛ tsui; ni obaanyiɛ abele shishi tutuu sɛɛ?

²⁶ Ejaakɛ okɛ saji ni naa wa miishi mi, ootsɛ miblahiaŋ tɔ̃mɔi tete asɛɛ.

²⁷ Obɔ minaji apã, ni ohiŋmɛi kã nɔ fɛɛ nɔ ni mifeɔ he; minanefaamɔi hu owo he husu.

²⁸ Adesa tamɔ nɔ ko ni ekpɔtɔ, etamɔ mama ni omlɛgɛ eye.