Hiob 1 - ŊMALƐ KRƆŊKRƆŊ LƐ

Abonsam ka Hiob ekwɛ

¹ Nuu ko hi shi yɛ Uz shikpɔŋ lɛ nɔ; egbɛi ji Hiob. Esheɔ Nyɔŋmɔ gbeyei, ni ewiɔ ehe yɛ efɔŋ he. Eji gbɔmɔ ni shwamɔ ko bɛ ehe, asaŋ efeɔ nii ni ja hu.

² Hiob fɔ bihii kpawo kɛ biyei etɛ̃.

³ Eyɛ toi akpei kpawo kɛ yoomai akpei etɛ̃ kɛ tsinai akpe kɛ teji yei ohai enumɔ kɛ tsuji babaoo diɛŋtsɛ. No hewɔ lɛ, Hiob ji bokãgbɛbii lɛ ateŋ niiatsɛ fe fɛɛ.

⁴ Hiob bihii lɛ toɔ naa ekomekome ni amɛŋmɛɔ amɛhe okplɔ̃. Kɛji eshɛ mɔ ko nɔ lɛ, ebihii krokomɛi lɛ fɛɛ yaa mɔ lɛ we lɛ. Hii lɛ tsuɔ kɛyaa, ni ayatsɛɔ amɛnyɛmimɛi yei etɛ̃ lɛ hu kɛbaa, ni amɛkɛ amɛ bayeɔ nii, ni amɛnuɔ dãa.

⁵ Kɛji aŋmɛ okplɔ̃ lɛ kɛbɔle bihii lɛ anɔ kɛkpe lɛ, Hiob teɔ shi daa leebi maŋkpa, ni eyashãa shãa afɔlei ehãa ebii lɛ ateŋ mɔ fɛɛ mɔ, yɛ amɛyibɔ naa koni akɛtsuu amɛhe. Ejaakɛ Hiob kɛɔ akɛ, “Benɛ mibihii lɛ ateŋ mɔ ko efee esha ko ni aleee, ni ekwa Nyɔŋmɔ yɛ etsuiŋ. Enɛ ji nɔ ni Hiob feɔ daa.”

⁶ Be ko lɛ ŋwɛi bɔfoi lɛ ni sɔmɔɔ Nyɔŋmɔ yɛ ŋwɛi lɛ tee Nyɔŋmɔ hiɛ. Abonsam futu amɛ kɛtee, ni lɛ hu eyadamɔ Nyɔŋmɔ hiɛ eko.

⁷ Nyɔŋmɔ bi Abonsam akɛ, “Nɛgbɛ ojɛ obaa nɛɛ?” Abonsam to he akɛ, “Mijɛ shikpɔŋ lɛ nɔ shikpaa kɛ shisharamɔ yɛ nɔ.”

⁸ Kɛkɛ ni Yehowa bi Abonsam akɛ, “Osusu mitsulɔ Hiob he akɛ mɔ ko mɔ ko bɛ shikpɔŋ lɛ nɔ ni tamɔ lɛ ni eji nuu anɔkwafo ni sheɔ Nyɔŋmɔ gbeyei, ni ewiɔ ehe yɛ efɔŋ he, ni shwamɔ ko bɛ ehe, ni efeɔ nɔ ni ja?”

⁹ Abonsam kɛɛ lɛ akɛ, “Ani yaka Hiob sheɔ bo, Nyɔŋmɔ, gbeyei lɛ?

¹⁰ Bɛ ofo afabaŋ okɛbaa lɛ kɛ ewe kɛ nɔ fɛɛ nɔ ni eyɔɔ lɛ yi shweshweeshwe. Ojɔɔ eninenaa nitsumɔ nɔ, ni ekooloi eshwere yɛ shikpɔŋ lɛ nɔ.

¹¹ Shi agbɛnɛ bo lɛ kpã onine mli ofite enii ni eyɔɔ lɛ, koni okwɛ akɛ ekwaŋ bo yɛ ohiɛ lo.”

¹² Ni Yehowa kɛɛ Abonsam akɛ, “Ojogbaŋŋ, mijɔɔ enii fɛɛ ni eyɔɔ nɔ miwo odɛ̃ŋ. Lɛ diɛŋtsɛ ehe kɛkɛ ni okɛ onine akasa.” Kɛkɛ ni Abonsam je Yehowa hiɛ ni etee.

Hiob bii lɛ kɛ ejwetri hiɛ kpãtã

¹³ Gbi ko lɛ Hiob bihii lɛ kɛ ebiyei lɛ eyakpe, ni amɛmiiye nii, ni amɛmiinu wain yɛ amɛnyɛmi nuu onukpa lɛ we lɛ mli.

¹⁴ Bɔfo ko ba Hiob ŋɔɔ ni ebakɛɛ lɛ akɛ, “Tsinai lɛ miihu, ni teji yei lɛ hu miiye nii yɛ amɛmasɛi.

¹⁵ Trukaa ni Sabiabii batua amɛ, ni amɛmɔmɔ kooloi lɛ kɛtee; amɛgbe otsuji lɛ kɛ klante; mikome too pɛ mihe je mli, ni miba mibatswa bo adafi nɛɛ.”

¹⁶ Tsulɔ lɛ hiɛ wiemɔ lɛ mli lolo kɛkɛ ni tsulɔ kroko ko ba, ni ebakɛɛ akɛ, “Srawa gba kɛjɛ ŋwɛi ni ebayi toi lɛ kɛ tsuji lɛ anɔ, ni eplene amɛ fɛɛ; mikome too pɛ mihe je mli, ni miba mibatswa bo adafi nɛɛ.”

¹⁷ Be ni lɛ hu ewieɔ lolo lɛ, tsulɔ kroko ko hu bashɛ shi, ni ebakɛɛ akɛ, “Kaldeabii ba kɛ kui etɛ̃ amɛbatua yoomai lɛ, ni amɛmɔmɔ amɛ kɛtee, ni amɛkɛ klante gbe tsuji lɛ, mikome too pɛ mihe je mli, ni miba mibatswa bo adafi nɛɛ.”

¹⁸ Tsulɔ lɛ wiemɔ lɛ ma enaa lolo kɛkɛ lɛ naa tsulɔ kroko ko hu eba, ni ebakɛɛ akɛ, “Obihii lɛ kɛ obiyei lɛ miiye nii, ni amɛmiinu wain yɛ amɛnyɛmi nuu nukpa lɛ we lɛ mli

¹⁹ kɛkɛ ni ahum kpele ko tswa kɛjɛ shiaŋa lɛ nɔ gbɛ, ni ebabote shĩa lɛ mli, ni eshimɔ shĩa lɛ koji ejwɛ lɛ, ni eshĩa lɛ wule eshwie oblahii lɛ anɔ, ni amɛ fɛɛ amɛgboi; mikome too pɛ mihe je mli ni miba mibatswa bo adafi nɛɛ.”

²⁰ Kɛkɛ ni Hiob te shi, ni ekɛ awerɛho gbala ehe atade lɛ, eshɛ eyi, ni eho ebu shikpɔŋ, ni esɔle.

²¹ Ekɛɛ akɛ, “Yayai mikɛjɛ minyɛ musuŋ miba, ni yayai mikɛaaku misɛɛ kɛaatee. Yehowa ni ŋɔ hã, ni Yehowa ebaŋɔ kɛtee; aaajie Yehowa gbɛi lɛ yi kɛ̃!”

²² Saji ni ba nɛɛ fɛɛ mli lɛ Hiob shwaaa Nyɔŋmɔ ni no atsɔ̃ esha ahã lɛ.