Hebribii 9 - ŊMALƐ KRƆŊKRƆŊ LƐ

Levibii asɔfoyeli ni yeee emuu lɛ

¹ Agbɛnɛ klɛŋklɛŋ kpãŋmɔ lɛ hu yɛ Nyɔŋmɔjamɔ he gbɛjianɔtoo kɛ shikpɔŋ nɛɛ nɔ he krɔŋkrɔŋ.

² Ejaakɛ ashi buu ko amã shi, ni he ni oyiɔ klɛŋklɛŋ lɛ, kanetso kɛ okplɔ̃ kɛ hiɛmaa aboloi lɛ yɔɔ jɛi; atsɛɔ jɛi akɛ He Krɔŋkrɔŋ.

³ Shi muhɔɔ ni ji enyɔ lɛ sɛɛ lɛ buu yɛ jɛi ni atsɛɔ lɛ He Krɔŋkrɔŋ Fe Fɛɛ!

⁴ Jɛi shika tsofakɛŋma shãa nɔ lɛ kɛ Kpãŋmɔ Adeka ni akɛ shika eha he fɛɛ lɛ yɔɔ; no mli shika kpulu kɛ emli mana lɛ kɛ Aaron tso ni gba afofro lɛ kɛ kpãŋmɔ tɛi tɛtɛrɛbii lɛ yɔɔ.

⁵ Ni no nɔ anunyam kerubim ni ha kpãtãmɔ sɛi lɛ nɔ lɛ yɔɔ; nii ni amrɔ nɛɛ wɔnyɛŋ amɛhe wɔwie ekomekome lɛ.

⁶ Ni be ni asaa nibii nɛɛ nɛkɛ lɛ, osɔfoi lɛ yaa klɛŋklɛŋ buu lɛ mli daa gbi, amɛyatsuɔ sɔ̃ɔmɔ nitsumɔ lɛ;

⁷ shi buu ni ji enyɔ lɛ, osɔfonukpa lɛ kɛkɛ yaa mli shi kome daa afi, ni eyaaa ni ehiɛɛɛ lá, ni ekɛyahãa yɛ lɛ diɛŋtsɛ kɛ maŋ lɛ tɔ̃mɔi ni amɛleee lɛ ahewɔ lɛ.

⁸ Enɛ Mumɔ Krɔŋkrɔŋ lɛ kɛtsɔ̃ɔ faŋŋ akɛ gbii abɔ ni klɛŋklɛŋ buu lɛ mã shi lolo nɛɛ, belɛ gbɛ ni akɛyaa He Krɔŋkrɔŋ lɛ anako ajie shi atsɔ̃ɔ.

⁹ Eji benɛ be lɛ he okadi ni tsɔ̃ɔ akɛ nikeenii kɛ afɔlei ni akɛbahãa lɛ nyɛŋ ahã mɔ ni jaa lɛ aye emuu yɛ henilee gbɛfaŋ,

¹⁰ ejaakɛ nibii nɛɛ kɔɔ niyenii kɛ ninumɔnii kɛ hejuu srɔtoi ni ji heloo gbɛnaanii ni ato akɛ afee kɛkɛ ahe kɛyashi be ni aaasaa nibii fɛɛ afee amɛ ehee.

Kristo osɔfoyeli ni ye emuu lɛ

¹¹ Shi Kristo ni ba akɛ nibii kpakpai ni baaba lɛ ahe Osɔfonukpa lɛ, etsɔ̃ buu ni da ni hi kɛwula shi fe klɛŋklɛŋ nɔ lɛ mli; buu ni jeee niji akɛfee, no ji akɛ jeee je nɛɛ mli bɔɔnii amli ejɛ;

¹² ni asaŋ jeee too kpakpoi loo tsinabii alá nɔ etsɔ̃, shi moŋ etsɔ̃ lɛ diɛŋtsɛ elá lɛ nɔ ebote He Krɔŋkrɔŋ lɛ mli shi kome nyɔŋlo ekɛna naanɔ kpɔ̃mɔ lɛ.

¹³ Ejaakɛ kɛ too kpakpo kɛ tsinai alá kɛ tsina yoo lamlu ni atsɔɔ ashwãa mɛi ni ebule amɛhe lɛ anɔ lɛ tsuuɔ amɛhe ni amɛhe tseɔ yɛ heloo gbɛfaŋ lɛ,

¹⁴ enyiɛ nɔŋŋ ni Kristo ni tsɔ̃ naanɔ Mumɔ lɛ nɔ eŋɔ ehe ni kpa ko bɛ he lɛ ehã Nyɔŋmɔ akɛ afɔle lɛ lá lɛ tsumɔŋ wɔhenilee lɛ he kɛjɛŋ nitsumɔi gbohii amli, koni wɔsɔ̃mɔ Nyɔŋmɔ hiɛkãalɔ lɛ?

Kristo ji kpãŋmɔ hee mlidaamɔlɔ

¹⁵ Ni enɛ hewɔ ni eji kpãŋmɔ hee mlidaamɔlɔ lɛ, bɔ ni afee ni mɛi ni Nyɔŋmɔ etsɛ amɛ lɛ anine ashɛ naanɔ gboshinii lɛ ni ewo he shi lɛ nɔ, akɛni ekɛ egbele kpɔ̃ amɛ kɛjɛ klɛŋklɛŋ kpãŋmɔ lɛ nɔtɔmɔi lɛ amli lɛ.

¹⁶ Ejaakɛ he ni awo shamaŋsheo yɛ lɛ, ehe ehia akɛ atsɔ̃ɔ akɛ mɔ ni wo lɛ egbo,

¹⁷ ejaakɛ shamaŋsheo lɛ, ja agbo dani enaa hewalɛ, akɛni kɛji mɔ ni wo lɛ hiɛ kã lolo lɛ, ebɛ hewalɛ lɛ.

¹⁸ No hewɔ ni klɛŋklɛŋ nɔ lɛ hu ashiii lá sɛɛ awooo lɛ.

¹⁹ Ejaakɛ be ni Mose ejaje kitã etsɔ̃ɔ maŋ muu lɛ fɛɛ yɛ Mla lɛ naa lɛ, eŋɔ tsinabii kɛ too kpakpoi lɛ alá lɛ kɛ nu kɛ too gwantɛŋ hetsɔi tsuru kɛ hisopo, ni ekɛ shwã wolo lɛ diɛŋtsɛ kɛ maŋ muu lɛ fɛɛ nɔ

²⁰ ekɛɛ, “Naa, kpãŋmɔ lɛ ni Nyɔŋmɔ wo nyɛ he kitã lɛ lá lɛ nɛ.”

²¹ Ni buu lɛ hu kɛ Nyɔŋmɔjamɔ he nii lɛ fɛɛ lɛ, ekɛ lá lɛ shwã nɔ nakai nɔŋŋ.

²² Ni shwɛ fioo ni lá akɛtsuuɔ nii fɛɛ he yɛ Mla lɛ naa; ni kɛ ashwieee lá shi lɛ, akɛfaaa.

Kristo kɛ ehe shã afɔle shi kome nyɔŋlo

²³ Belɛ ehe ehĩa akɛ nii ni ji ŋwɛinii lɛ afoniri nɛɛ akɛ enɛɛmɛi atsuu he; shi ŋwɛinii lɛ diɛŋtsɛ lɛ, afɔlei ni hi fe nomɛi akɛtsuuɔ he.

²⁴ Ejaakɛ jeee He Krɔŋkrɔŋ ni akɛ niji fee ni ji nii lɛ diɛŋtsɛ lɛ afoniri kɛkɛ lɛ mli Kristo yabote lɛ; shi moŋ ŋwɛi diɛŋtsɛ eyabote, koni agbɛnɛ eyapue yɛ Nyɔŋmɔ hiɛ ehã wɔ.

²⁵ Asaŋ eyaboteee jɛi koni eŋɔ ehe ehã shii abɔ, tamɔ bɔ ni osɔfonukpa lɛ yaboteɔ He Krɔŋkrɔŋ lɛ daa afi kɛ lá ni jeee lɛ diɛŋtsɛ enɔ lɛ;

²⁶ ejaakɛ nakai ni kulɛ, esa akɛ ena amanehulu kpitiokpitio kɛjɛ jeŋ shishijee beebe; shi agbɛnɛ lɛ shi kome kɛkɛ ajie lɛ kpo yɛ bei lɛ anaagbee lɛ mli, koni ekɛ lɛ diɛŋtsɛ ehe ni ekɛshã afɔle lɛ ajie esha lɛ.

²⁷ Gbii abɔ ni ekã shi ehã gbɔmɛi akɛ shi kome amɛgboiɔ, shi no sɛɛ lɛ abaakojo amɛ lɛ,

²⁸ nakai nɔŋŋ Kristo hu, akɛni aŋɔ lɛ ahã shi kome koni etere mɛi pii ahe eshai kɛya lɛ, nɔ ni ji shii enyɔ lɛ eeeshi esha ebapue ehã mɛi ni kwɛɔ lɛ gbɛ lɛ ni ehere amɛyiwala.