Hebribii 8 - ŊMALƐ KRƆŊKRƆŊ LƐ

Yesu, wɔŋwɛi osɔfonukpa lɛ

¹ Shi nii ni wɔwieɔ lɛ mli sane titri nɛ, nɛkɛ Osɔfonukpa wɔyɔɔ; Osɔfonukpa ni ta mɔ ni je agbo lɛ maŋtsɛ sɛi lɛ ninejurɔ nɔ yɛ ŋwɛi

² akɛ He Krɔŋkrɔŋ lɛ kɛ anɔkwa Buu lɛ ni Nuŋtsɔ lɛ diɛŋtsɛ shi ni jeee gbɔmɔ ko shi lɛ mli sɔ̃ɔlɔ.

³ Ejaakɛ osɔfonukpa fɛɛ osɔfonukpa lɛ, awo lɛ koni eŋɔ nikeenii kɛ afɔlei ebahã; no hewɔ lɛ, ehĩa akɛ mɔ nɛ hu ana nɔ ko ni ekɛbahã.

⁴ Shi shikpɔŋ lɛ nɔ eyɔɔ kulɛ, eyeŋ osɔfo tete, ejaakɛ osɔfoi ni kɛ nikeenii yahãa yɛ Mla lɛ naa yɛ,

⁵ tsɛ amɛ lɛ ŋwɛi He Krɔŋkrɔŋ lɛ nɔkwɛmɔnɔ kɛ esusuma kɛkɛ mli amɛsɔ̃mɔ yɛ, tamɔ bɔ ni atsɔ̃ɔ Mose, be ni ebaafee buu lɛ; ejaakɛ Nyɔŋmɔ kɛɛ, “Kwɛmɔ ni ahi koni ofee nibii lɛ fɛɛ yɛ nɔkwɛmɔnɔ ni atsɔ̃ɔ bo yɛ gɔŋ lɛ nɔ lɛ naa.”

⁶ Shi agbɛnɛ lɛ osɔfoyeli ni Kristo ena lɛ hi kwraa fe tsutsunɔ lɛ, tamɔ bɔ ni kpãŋmɔ ni eji emlidaamɔlɔ lɛ hi fe tsutsunɔ ni adamɔ shiwoi ni hi fe tsutsunii lɛ anɔ lɛ akpãŋ lɛ.

⁷ Ejaakɛ eji sane ko bɛ tsutsunɔ lɛ he kulɛ, ataooo gbɛ ahãaa nɔ ni ji enyɔ lɛ.

⁸ Ejaakɛ Nyɔŋmɔ shwa amɛ ekɛɛ, “Naa, gbii miiba, Nuŋtsɔ lɛ kɛɛ, ni mikɛ Israel we lɛ kɛ Yuda we lɛ aaakpãŋ kpãŋmɔ hee,

⁹ jeee tamɔ kpãŋmɔ ni mikɛ amɛtsɛmɛi lɛ kpãŋ Gbi nɔ ni mimɔ amɛnine shi ni mikɛ amɛ je Ijipt shikpɔŋ lɛ nɔ lɛ, ejaakɛ amɛyeee mikpãŋmɔ lɛ nɔ. Ni mi hu mijwɛŋŋ amɛnɔ, Nuŋtsɔ lɛ kɛɛ.

¹⁰ Shi enɛ ji kpãŋmɔ ni mikɛ Israel we lɛ baakpãŋ yɛ nakai gbii lɛ asɛɛ lɛ, Nuŋtsɔ lɛ kɛɛ, Mikɛ mimlai aaawo amɛjwɛŋmɔ mli, Ni maŋma mawo amɛtsui mli, ni matsɔ̃ amɛNyɔŋmɔ, ni amɛ hu amɛaatsɔ̃ mimaŋ.

¹¹ Ni amɛteŋ mɔ ko etsɔ̃ŋ emaŋnyo loo enyɛmi dɔŋŋ akɛ, ‘Le Nuŋtsɔ lɛ.’ Ejaakɛ amɛ fɛɛ amɛaale mi, kɛaajɛ amɛteŋ mɔ bibioo nɔ kɛyashi mɔ wulu nɔ.

¹² Ejaakɛ mana amɛ mɔbɔ yɛ amɛtɔ̃mɔi lɛ agbɛfaŋ, ni amɛhe eshai lɛ hu mikaiŋ dɔŋŋ.”

¹³ Ekɛ wiemɔ “ehee” ni ekɛɛ nɛɛ ehã klɛŋklɛŋ nɔ lɛ efee emomo. Shi nɔ ni efee emomo kɛ nɔ ni egbɔ lɛ, etsɛŋ ni eeelaaje.